Read Runyoro - rutooro Kubar 34 Bible Online

Kubar 34 - Runyoro - rutooro bible

Kubar 34

¹MUKAMA akagamba Musa ati:

²“Ragira abantu ba Isirairi kandi obagambire ngu: Obu murataaha omunsi Kanaani, (niyo ensi ei mwahairwe ebe bugwetwa bwanyu, Kanaani nsi yoona yoona kugimarayo)

³ha bukiizi bwanyu obw'obulyo, neetandikira ha irungu lya Ziini, neyekiika orubaju rw'Edomu, omutaano gwanyu ogw'obukiizi obw'obulyo, guratandikira ha nyanja ey'ekisura h'erukugarukira ha rubaju rwayo orwa Burugaizooba;

⁴kandi omutaano gwanyu guragaruka ha bukiizi obw'obulyo, eruguru y'Akurabbimu, gucwanganize guhike Ziini, gugarukire ha bukiizi obw'obulyo obwa Kadeesibarineya; kandi gweyongereyo guhike Haazaraada, gwirreyo gugarukire Azimooni;

⁵guruge Azimooni guhike ha kyambu eky'ensi Misiri, gugarukire ha nyanja.

⁶“Omutaano ogwa Burugaizooba, niyo enyanja enkooto n'omukungu gwayo; ogu nugwo guraaba mutaano gwanyu ogwa Bugwaizooba.

⁷“Kandi gunu nugwo guraaba mutaano gwanyu ogw'obukiizi obw'emoso: muteho emanyikirizo okurugirra ha nyanja Enkooto, okugarukira ha rusozi Hora,

⁸mwongere mubyale obutamura obuhika ha ntaaho ya Hamasi; gugarukire Zedadi,

⁹gwirreyo guhike Zifurooni, gugarukire Hazaleeni, ogu nugwo gube mutaano gwanyu ogw'obukiizi obw'emoso.

¹⁰“Omutaano gwanyu ogwa Bugwaizooba, mubyale oburamura okuruga Hazaaleeni, okugarukira Seefamu;

¹¹gusirimuke okuruga Seefamu, gwesimbe Ribura, ha rubaju orw'obukiizi obwa Burugaizooba obw'Aini; gweyongereyo guhike ha rubaju orw'enyanja eya Kiinereeti, ha bukiizi obwa Bugwaizooba,

¹²gwirreyo gwesimbe ha kisaaru Yorudaani, gugarukire ha Nyanja ey'ekisura. Egi niyo eriba nsi yanyu n'emitaano yaayo ey'orubaju n'orubaju.”

¹³ Musa yaragira abantu ba Isirairi kandi yabagambira ati: “Enu niyo ensi ei murukwija kugweterwa akaruuru MUKAMA ei yaragiire eheebwe enganda mwenda n'ekicweka;

¹⁴Habwokuba oruganda orw'abaana ba Rubbeni, nkooku bahonderana omu bitabu ebya baisenkurubo, oruganda orw'abaana ba Gaadi nkooku bahonderana omu bitabu ebya baisenkurubo, oruganda orw'abaana ba Gaadi nkooku bahonderana omu bitabu ebya baisenkurubo, n'ekicweka eky'oruganda orwa Manaase, bakamara ira kutunga ensi yabo ey'ebiro byona.

¹⁵Enganda ibiri n'ekicweka ky'oruganda, obugwetwa bwazo zikabutunga obuseeri bwa Yorudaani, ha bukiizi obwa Burugaizooba.”

¹⁶MUKAMA yagambira Musa ati:

¹⁷“Ganu nugo mabara g'abantu abaraababaganiriza ensi yaanyu ei mwagambiirwe: Eryeeza Nyakatagara na Yoswa mutabani wa Nuuni.

¹⁸Omu buli ruganda oihemu omwebembezi omu, araabaganiza ensi ey'obugwetwa.

¹⁹Ganu nugo amabara ag'abantu abo: Omu ruganda orw'abaana ba Yuda, Kalebbu mutabani wa Yefune.

²⁰Omu ruganda rwa Simyoni, Serumyeri mutabani wa Amihudi.

²¹Omu ruganda rwa Benyamiini, Eridaadi mutabani wa Kisironi.

²²Omu ruganda orw'abaana ba Daani, omwebembezi ni Buki mutabani wa Yoguli.

²³Omu batabani ba Yosefu: omu ruganda orw'abaana ba Manaase, omwebembezi ni Haanyeri mutabani wa Efodi.

²⁴Omu ruganda orw'abaana ba Efuraimu, omwembezi ni Kemweri mutabani wa Ifutani.

²⁵Omu ruganda orw'abaana ba Isakara, omwebembezi ni

²⁶Palatiyeri mutabani wa Azani.

²⁷Omu ruganda orw'abaana ba Aseri, omwebembezi ni Ahihudi mutabani wa Selomi.

²⁸Omu ruganda orw'abaana aba Nafutaali, omwebembezi ni Pedaheri mutabani wa Amihudi.

²⁹Ago nugo mabara g'abantu MUKAMA aba yakomere okubaganiriza abaana ba Isirairi ensi Kanaani ei baagwetiirwe.”