Read Runyoro - rutooro Kubar 4 Bible Online

Kubar 4 - Runyoro - rutooro bible

Kubar 4

²“Mubale batabani ba Kohati, omu bika byabo n'omu bika ebya baisenkurubo, mubaihe omu batabani b'Abaleevi,

³abanyakuhikize emyaka asatu okuhika ha ab'emyaka ataano ey'obukuru, boona abarukusobora kutaaha omulimo ogw'obuheereza, bakole omulimo omu Heema ey'okutangatanganiramu.

⁴Gunu nugwo omulimo ogwa batabani ba Kohati ogu baraakoraga omu Heema ey'okutangatanganiramu, baroleerrege ebintu ebirukukirra kimu kuba ebirukwera.

⁵Orukande obu ruraabaga nirwimukya kugenda, Arooni n'abatabani be bataahege omu Heema ey'okutangatanganiramu, bahanuule enyigamo erukukinga, bagisweekereze Esanduuko ey'Endagaano.

⁶Hanyuma bagiteho ekisweeko eky'empu ez'engonge, ha ruguru yakyo banjurreho orugoye orwa kaneke yonka, kandi bagisomekemu emigamba.

⁷Ha ruguru y'emeeza ey'omugaati ogw'okwolekwa, banjurreho orugoye orwa kaneke, bagiteho esahaani, encuba, ezinyakurumu eseeta, ebbakuli n'enjooje eby'okutamu ekihongwa eky'okunywa, ha meeza habeho n'omugaati ogwa butoosa.

⁸Ebintu ebi babisweeke n'orugoye orw'erangi erukugaajuka, narwo barusweekereze ekisweeko eky'oruhu orw'engonge, bagisomekemu emigamba.

⁹Bakwate orugoye orwa kaneke, basweeke ekikondo eky'etaara hamu n'etaara zaakyo, n'ebintu byoona ebi bazitaisaamu amagita:

¹⁰ekikondo eky'etaara eki n'ebintu byakyo byoona, babite omu kisweeko eky'empu ez'engonge, bakite ha ruhinyo.

¹¹Itambiro erya zaabbu balisweeke n'orugoye orwa kaneke, balisweeke ekisweeko eky'empu ez'engonge, balisomekemu emigamba yalyo.

¹²Bakwate ebintu byona eby'omulimo ebinyakukozesebwa Omukiikaro ekirukwera, babite omu rugoye orwa kaneke babisweeke n'ekisweeko eky'empu ez'engonge, babite ha ruhinyo.

¹³Baihe iju ha itambiro, itambiro balyanjurreho orugoye orwa kahuukya,

¹⁴baliteho ebintu byalyo byona ebirikoraho ebinyakukozesebwa obu baba nibalikorraho omulimo, ensaniya ez'okuguhisa, empana ez'omurro, ebitiyo by'okuyooza iju, n'ebbeseni, ebintu byona eby'itambiro; balyanjurreho ekisweeko eky'empu ez'engonge, balitemu emigamba yalyo.

¹⁵Arooni n'abatabani obu baraamaraga kusweeka ebintu ebirukwera, na byona ebikora Omukiikaro Ekirukwera, orukande obururaabaga nirwimukya kugenda, batabani ba Kohati baijege kwetweka ebintu ebi; baitu batalikwata ha bintu ebirukwera, bataliija kufa. Ebi nibyo ebintu eby'Eheema ey'okutangatanganiramu, batabani ba Kohati ebibaraayetwekaga.”

¹⁶“Eryeza mutabani na Arooni nyakatagara, araaroleeraga amagita ag'okuta omu taara, eseeta erukuboya, ekihongwa ekya buli kasumi eky'ebyokulya n'amagita aganyakuseeswaho abantu n'ebintu eby'okwezibwa, nuwe mukuru ow'okurolerra enju ya Ruhanga yoona na byona ebinyakugirumu, muroleerezi ow'Ekiikaro Ekirukwera n'ebintu byakyo byona ebinyakukwatirwamu.”

¹⁷MUKAMA yagambira Musa na Arooni ati:

¹⁸“Mutalikiriza oruganda orw'ekika kya Kohati kuhwerekerezibwa rukahwa omu Baleevi.

¹⁹Mubakole muti nukwo boomeere, baleke kufa obu barairirraga ebintu ebirukukirra kimu kuba ebirukwera; Arooni n'abatabani baraataahaga omu Heema, bamuhe buli muntu omulimo gwe n'omutumba gwe,

²⁰kyonka batalitaaha Omukiikaro Ekirukwera kurora ebintu ebirukwera, noobwakuba kubiringuzaaho bataliija kufa.”

²¹MUKAMA yagambira Musa ati:

²²“Kandi bara batabani ba Geresooni omu bika byabo n'omu bitabu ebya baisenkurubo;

²³abanyakuhikize emyaka asatu okugarukira ha myaka ataano ey'obukuru, obale boona abasobora kutaaha omu buheereza, kukora omulimo omu Heema ey'okutangatanganiramu.

²⁴Gunu nugwo omulimo ab'ebika by'Abageresooni ogubaraakoraga kandi binu nibyo ebintu ebi baraayetwekaga.

²⁵Bahimbege enkingyo z'enju ya MUKAMA n'Eheema ey'okutangatanganiramu, hamu n'ekisweeko kyayo kandi n'ekisweeko eky'empu ez'engonge ekinyakuli ha ruguru yakyo, n'orukingyo orw'Eheema ey'okutangatanganiramu,

²⁶engoye zoona ez'okutimba omu zigati, orukingyo rw'irembo ery'ezigati enyakwehinguliriize enju ya MUKAMA n'itambiro, obuhuuzo obw'engoye ezi n'ebintu byona ebinyakuzikoraho, kandi bakole kyona ekirukwetagwa kuzikoraho.

²⁷Emirimo yoona eya batabani ba Geresooni, eragirwege Arooni n'abatabani, byona ebi baraabaga nibaija kuhimba, na byona ebi baraabaga nibaija kukora. Kandi niwe orabaragira ebibarayetwekaga.

²⁸Ogu nugwo omulimo ogw'ebika ebya batabani ba Geresooni omu Heema ey'okutangatanganiramu, kandi omulimo gwabo, guraaroleererwaga Itamara mutabani wa Arooni nyakatagara.”

²⁹Kandi batabani ba Merali obabale omu bika byabo n'omu bitabu ebya baisenkurubo;

³⁰obale abo boona abanyakuli hagati y'emyaka amakumi asatu okuhika ha myaka ataano, buli muntu arukusobora kutaaha omu mulimo ogw'obuheereza, kukora omulimo ogw'Eheema ey'okutangatanganiramu.

³¹Gunu nugwo omulimo ogu baraakwasibwa kukora, nubo baraakoraga omulimo gwona, omu Heema ey'okutangatanganiramu. Barayetwakaga embaaho ez'enju ya MUKAMA hamu n'emigamba yayo, enyomyo n'obucuba,

³²enyomyo ez'ezigati enyakwehinguliriize, n'obucuba bwazo, enkondo n'obuguha hamu n'ebikwato byazo byona, n'ebindi byona ebinyakwetagwaho kandi iwe okwase buli muntu ebintu ebirukwetaagwa kwetweka.

³³Ogu nugwo omulimo ogw'ebika ebya batabani ba Merali, gwona mulimo gwabo, kukora omu Heema ey'okutangatanganiramu, nibaroleererwa Itamara mutabani wa Arooni nyakatagara.

³⁴Musa, Arooni n'abeebembezi b'ekitebe, baabara batabani ba Kohati omu bika byabo n'omu bitabu ebya baisenkurubo,

³⁵abakaba bahikize emyaka asatu ey'obukuru okuhika ha myaka amakumi ataano, buli muntu arukusobora kutaaha omu mulimo ogw'okukora omu Heema ey'okutangatanganiramu.

³⁶Obu baabazirwe omu bika byabo, omuhendo gwahika enkumi ibiri rusanju n'ataano.

³⁷Ogu nugwo gukaba guli muhendo ogw'ebika eby'Abakohati boona abaakozire omu Heema ey'okutangatanganiramu, Musa na Arooni nubo baabazire nkooku MUKAMA yaragiire Musa.

³⁸Omuhendo ogwa batabani ba Geresooni omu bika byabo kandi omu bitabu ebya baisenkurubo,

³⁹okuruga hab'emyaka amakumi asatu okuhika ha b'emyaka amakumi ataano ey'obukuru, buli muntu ayasoboire kutaaha omu mulimo omu Heema ey'okutangatanganiramu,

⁴⁰omuhendo gwabo omubika byabo n'omu bitabu ebya baisenkurubo, gukaba guli enkumi ibiri rukaaga n'asatu.

⁴¹Ogu nugwo gwabaire omuhendo ogw'ebika ebya batabani ba Geresooni, boona abaakozire omulimo omu Heema ey'okutangatanganiramu, abaabazirwe Musa na Arooni nkooku MUKAMA yaragiire.

⁴²Omuhendo ogw'ebika ebya batabani ba Merali obu baabazirwe omu bika byabo n'omu bitabu ebya baisenkurubo,

⁴³okurugirra ha b'emyaka asatu okuhika ha makumi ataano ey'obukuru, buli omu owakaba naasobora kutaaha omu mulimo ogw'okukora omu Heema ey'okutangatanganiramu,

⁴⁴omuhendo ogw'ebika byabo gukahika enkumi isatu n'ebibiri.

⁴⁵Abo nubo baabazirwe omu bika ebya batabani ba Merali, Musa na Arooni aba baabazire nibahondera MUKAMA ebi yaragiire Musa.

⁴⁶Abo boona abaabazirwe omu Baleevi, Musa na Arooni, abeebembezi aba ba Isirairi, omu bika byabo n'omu bitabu ebya baisenkurubo,

⁴⁷okurugirra ha b'emyaka amakumi asatu okuhika ha myaka amakumi ataano ey'obukuru, buli muntu ayasoboire kutaaha kukora omulimo ogw'okuheereza n'ogw'okurolerra omu Heema ey'okutangatanganiramu,

⁴⁸abo abaabazirwe bakahika kanaana bitaano n'ekinaana.

⁴⁹MUKAMA nkooku yaragiire Musa, baahebwa emirimo, buli muntu eki araakoraga rundi eki araahimbaga; Musa nukwo yababazire ati, nkooku MUKAMA yamuragiire.