Read Runyoro - rutooro Kubar 5 Bible Online

Kubar 5 - Runyoro - rutooro bible

Kubar 5

¹MUKAMA akagambira Musa ati:

²“Ragira abantu ba Isirairi baihe abagenge boona omu rukande, buli muntu arukurugwa amasira omu mubiri na buli muntu weena arukuzirwa ayakwasire ha mutumbi gw'omuntu,

³abasaija n'abakazi boona mubaturukye, mubaihe omu rukande, baleke kusiisa orukande oru nyikaramu ndi hagati yanyu.

⁴Abaisirairi nukwo baakozire, abantu abo boona baabaiha omu rukande; MUKAMA nkooku yaragiire Musa, n'abantu ba Isirairi nukwo baakozire.”

⁵MUKAMA yagaruka yagambira Musa ati:

⁶“Gambira abantu ba Isirairi ngu: ‘Omusaija rundi omukazi, kakuba akora ekimu ha bibi abantu ebi bakora, bakasiisa obwesige hali MUKAMA, omuntu ogu ajunaanwege omusango.

⁷Ayatule ekibi kye eki akozire, kandi aheyo endehwa enyakuhikire habw'ensobi ye, naayongeraho kimu kya kataano, nukwo agihe oli ou yasobezeeho.

⁸Baitu kakuba hatabaho muntu ayasobezibwe ow'okulehera, endehwa egendege hali MUKAMA, ekonyere nyakatagara, eyongerweho entaama empaya ey'okusabiraho ekiganyiro nyakatagara eki alimusabira.

⁹Kandi buli kihongwa kyona, ebintu byona ebirukwera, abantu ba Isirairi ebi baraaleeteraga nyakatagara, bibege bye;

¹⁰buli kintu kyona ekirukwera, kibege kye.’ ”

¹¹MUKAMA yagaruka yagamba Musa ati:

¹²“Gambira abantu ba Isirairi ngu: Kakuba muka musaija ayecwamu obugangaale akatandika kugobeza iba,

¹³omusaija ondi kakuba abyama n'omukazi ogu, eki, iba atakimanyire, omukazi ogu tasobora kwomerizibwa ekibi noobu araaba akikozire, habwokuba tiharoho bwakaiso oburukumurumiriza, habwokuba busaho ayamukwasire.

¹⁴Kakuba iba atandika kuteekereza kubi hali mukazi we ogu anyakukozire ekibi, rundi akamuteekerezaaho kubi, kandi kunu ekibi atakikozire,

¹⁵omusaija aleete mukazi we hali nyakatagara. Aleete n'ekihongwa ekirukumusabwa, niyo kiloguraamu eya sairi, atalikiseesaho amagita kandi atalikitaho enkwasi habwokuba, kihongwa eky'ebyokulya ekinyakuleesirwe omusaija arukuteekerezaaho kubi mukazi we, ekinyakuhairweyo okuzoora amazima.”

¹⁶“Omukazi ogu, nyakatagara amwirize haihi, amute omumaiso g'itambiro.

¹⁷Nubwo nyakatagara akwate ha maizi aganyakuli omu kibindi, akwate ecuucu enyakuli omu Heema, agite omu maizi ago.

¹⁸Airize haihi omukazi omumaiso g'itambiro, amusumurre isoke, amukwase ekihongwa eky'ebyokulya eky'ekiijukyo, eki nikyo ekihongwa eki nyakuhairweyo habw'obufuuhi. Nyakatagara akwate amaizi agarukusarra aganyakuleeta omukyeno.

¹⁹Arahize omukazi ogu ati: ‘Obu haraaba hataroho musaija ayakwiriire haihi, rundi obu oliba otarayenagire omu ngeso mbi obu okaba okyali omu mikono ya baro, amaizi ganu agarukusarra, aganyakuleeta omukyeno, gatakukoraho akabi.

²⁰Baitu obu oliba wayenagiriize noobu okaba okyali omwa baro, wayesiisa, rundi omusaija ondi atali baro, obu aliba yatembere ekitabu kyawe,

²¹MUKAMA akusende kandi akukyene. Obe ky'okurorraho kya boona omu bantu b'owanyu, akwomye ekibero, akuzimbye omubiri gwona;

²²amaizi ganu aganyakuleeta omukyeno, gakutaahe omunda, gakuzimbye omubiri gwona, gakwokye ekibero.’ Omukazi agambe ati: ‘Ego, MUKAMA nukwo akole.’

²³“Nubwo nyakatagara, ebigambo ebi eby'okukyena emikyeno egi, abihandiike omu kitabu, abyogyemu n'amaizi ago agarukusarra.

²⁴Amaizi ago kaleeta mukyeno, aganywise omukazi ogu, gamutaahe omunda gamurumye enjoka.

²⁵Amwiheho ekihongwa eky'ebyokulya ekinyakuhairweyo habw'obufuuhi, akiimukyaimukye omumaiso ga MUKAMA, nukwo akireete ha itambiro.

²⁶Akwate orucumite orw'ekihongwa eky'ebyokulya, kibe kiijukyo kyakyo, arwokeze ha itambiro, aruhyange omu maizi, amaizi ago aganywise omukazi ogu.

²⁷Amazire kumunywisa amaizi ago, omukazi obu aliba yakozire ekibi, agobiize iba, amaizi ago kaleeta mukyeno, galimutaaha omunda, gamurumye enjoka, azimbe wena ayome ekibero abe musendwa.

²⁸Baitu obu aliba atarakozire kibi, naayera, talihikwaho kabi, alizaara abaana.

²⁹“Kinu nikyo kiragiro ekinyakukuraatirwa omukazi omuswerwa, obu asobya akeesiisa, kandi ali omwa iba,

³⁰rundi ekinyakukuraatirwa, omusaija obu ataahwamu omwoyo ogw'obufuuhi, akatandika kufuuhira mukaziwe, amuleete omumaiso ga MUKAMA, nyakatagara amukoleho byona ebinyakuragirwa ekiragiro kinu.

³¹Omusaija taliba na musango, baitu omukazi afubirwe habw'ekibi eki.”