Read Runyoro - rutooro Kubar 6 Bible Online

Kubar 6 - Runyoro - rutooro bible

Kubar 6

¹MUKAMA akagambira Musa ati:

²“Gambira abantu ba Isirairi ngu: ‘Omuntu weena omusaija rundi omukazi obu araakoraga ekiragaano ekinyakwahukaine ha biragaano ebya butoosa, nk'ekiragaano eky'Omunaziri eky'okwehongera MUKAMA uwe wenka

³ayetangege amaarwa n'ebitamiiza byoona eby'amaani. Kandi atalinywa ensande ey'emizaabbibbu rundi kulya emizaabbibbu emibisi rundi enyakwomere.

⁴Akasumi koona aka alimara naayeteekaniza kuragaana, atalirya akantu akanyakurugire ha muzaabbibbu, ensigo rundi ebisusu byagwo.’ ”

⁵Akasumi koona akaalimara amazire kuragaana, orumaiso rutalimuhika ha mutwe; okuhika obu alikamara ebiro ebi yaragaine okwehongera MUKAMA, abege muntu arukwera; isoke rye alireke lijujumukire.

⁶“Ebiro byona ebi alimara ayehongiire MUKAMA, ataliirra haihi omutumbi,

⁷noobu halifa ise rundi nyina, noobu halifa owanyina omwojo rundi munyanya; atalyesiisa habwokuba okwehonga kwe hali Ruhanga, nukwo kukuza isoke.

⁸Ebiro byona ebi amara, amazire kwehonga, aba arukwera wa MUKAMA.”

⁹Omuntu anyakumuheriire kakuba akanguka, omutwe ogw'Omunaziri ogwayeziibwe gukasisikara, Omunaziri ogu ayemwe isoke ha kiro kya musanju.

¹⁰Ha kiro ekya munaana, aleete enduka ibiri rundi amaiba amato abiri, agakwase nyakatagara ha mulyango ogw'Eheema ey'okutangatanganiramu.

¹¹Eriiba erimu, nyakatagara alihonge, libe kihongwa eky'okuganyiza ebibi, erindi alihonge, kibe kihongwa eky'okwokya eky'okumusabira kumuganyiza omusango, habwokuba akasiisikara habw'okuhikwaho omutumbi. Ha kiro eki kyonyini, ayeze omutwe gwe,

¹²ayehongere MUKAMA okumara ebiro ebi yaragaine kwehonga, aleete omwana gw'entaama empaya ogunyakuhikize omwaka gumu, gube kihongwa eky'okumwihisaaho omusango; baitu akasumi ak'okubanza, ako, kaliba kafiire busa; habwokuba okwehonga kwe kukasiisikara.

¹³“Kinu nikyo kiragiro ekirukukwata Omunaziri, akasumi ak'okwehonga kwe kamazire kuhwaho: Aleetwege ha mulyango ogw'Eheema ey'okutangatanganiramu.

¹⁴Ahongere MUKAMA ekisembo kye, ekisembo eki, ebe ntaama empaya etanyina kamogo, ey'omwaka gumu, nikyo kibe kihongwa eky'okwokya; entaama eruusi etanyina kamogo ey'omwaka gumu, ebe kihongwa ekyokuganyiza ekibi.

¹⁵Ekigega eky'emigaati etatumbisiibwe, keeki ezinyakucumbirwe omu nsaano enyakuniinukire enyakutabwirwemu amagita, na capati ezitatumbisiibwe ezinyakusiigirwe amagita g'omuti oliva, n'ekihongwa eky'ebyokulya n'eky'ebyokunywa ekinyakugenderaho.

¹⁶Nyakatagara, ebi abireete omumaiso ga MUKAMA, ahonge ekihongwa kye eky'okuganyiza ebibi, n'ekihongwa kye eky'okwokya.

¹⁷Ahongere MUKAMA empaya y'entaama, ebe kyonzira eky'okusaba obusinge, akihonge hamu n'ekigega ekinyakurumu emigaati etatumbisiibwe; kandi ahonge ekihongwa kye eky'ebyokulya, n'eky'okunywa.

¹⁸Omunaziri amwe omutwe gwe ogwayeziibwe, agumwere ha mulyango ogw'Eheema ey'okutangatanganiramu, isoke erirugire ha mutwe gwe ogwayeziibwe, alikwate alinage omu murro ogurukwokezibwaho ekyonzira eky'okusaba obusinge.

¹⁹Akwate enyama ey'enkwa ey'empaya y'entaama emazire kucumbwa, na keeki emu etatumbisiibwe agiihe omu kigega, bisikwiti emu etatumbisiibwe, abikwase Omunaziri, amazire kwemwa isoke, nukwo ayezibwe.

²⁰Ebintu ebi nyakatagara abihongere MUKAMA, kiri kisembo ekyahukaine ha bindi; ebi, nugwo omugabo ogurukwera ogwa nyakatagara, hamu n'embanda enyakwimukaimukibwa, n'ekirumbu ekinyakuhongwa; ebi bimazire kuhwa, Omunaziri ogu naikirizibwa kunywa eviini.”

²¹Eki nikyo kiragiro eky'Omunaziri anyakukora ekiragaano. Ekihongwa eki arukuhongera MUKAMA, kinganaingane n'ekiragaano kye, otataireho ebindi byona ebi asobora kuleeta; ebi akora obu aba naaragaana, nibyo akole, ha kusoroorwa kwe.

²²MUKAMA akagambira Musa ati:

²³“Ogambire Arooni n'abatabani ebigambo binu, ebi baraagambaga nibasabira abantu ba Isirairi omugisa, bati:

²⁴‘“MUKAMA abahe omugisa kandi abalinde,

²⁵MUKAMA abamulikizeege amaiso ge kandi abagirrege embabazi.

²⁶MUKAMA abarozeege amaiso ag'embabazi kandi abahege obusinge.” ’

²⁷“Obu baraayaturaga ibara lyange, nibasabira abantu ba Isirairi omugisa, ndaagubahaga.”