Read Runyoro - rutooro Kubar 7 Bible Online

Kubar 7 - Runyoro - rutooro bible

Kubar 7

¹Musa, ha kiro eki yamaliireho okwemereza Eheema ya MUKAMA, kandi eki yagisesiireho amagita n'okugyeeza, n'okweza ebintu byayo byona, amazire kuseesaho amagita n'okweza itambiro, n'ebintu ebinyakulikolerwaho,

²abakuru b'abantu ba Isirairi, abakuru b'ebitabu by'amaju aga baisenkurubo, abeebembezi b'enganda, abaarolerraga abo abaabazirwe,

³bakahonga kandi baaleetera MUKAMA ebihongwa byabo, ebigaali mukaaga ebinyakusweekerwe, n'ente ikumi na ibiri, ekigaali kimu habw'abakuru babiri b'abantu kandi ente emu, habwa buli omu, baabiheerayo omumaiso g'Eheema ya MUKAMA.

⁴Nubwo MUKAMA yagambira Musa ati:

⁵“Ebintu ebi obyanukule obibaiheho, nukwo bikozesebwe okukora omulimo ogw'Eheema ey'okutangatanganiramu kandi obihe Abaleevi, buli muntu omulimo gwe nkooku guli.”

⁶Nubwo Musa yakwata ebigaali n'ente yabiha Abaleevi.

⁷Ebigaali bibiri n'ente ina yabiha batabani ba Geresooni, omulimo gwabo nkooku gukaba guli;

⁸Kandi ebigaali bbina n'ente munaana yabiha batabani ba Merali omulimo gwabo nkooku gukaba guli, abo boona nibaroleererwa Itamara mutabani wa Arooni nyakatagara.

⁹Baitu batabani ba Kohati, atabahe kintu na kimu, habwokuba bakaba bakwasiibwe okurolerra ebintu ebirukwera ebyahimbirwaga ha mabega.

¹⁰Ha kiro itambiro eki ryasesiirweho amagita bakuru ba bantu nubwo bahaireyo ebihongwa by'okulyeza, kandi ekihongwa kyabo bakakiheerayo omumaiso g'itambiro.

¹¹MUKAMA yagambira Musa ati: “Ebihongwa byabo babiheyo bati, buli kiro omu ha bebembezi aheyoga, ebihongwa, habw'okweza itambiro.”

¹²Ayahongere ekihongwa kye ha kiro ekyabandize, nuwe Nahasoni mutabani wa Aminadabbu ow'oruganda rwa Yuda.

¹³Binu nibyo yahongere: esahaani emu ey'efeeza erukuhikya obulemeezi obwa kiloguraamu emu n'ekicweeka n'ebbeeseni emu ey'efeeza erukuhikya obulemeezi obwa guraamu runaana noolengesa orulengo orw'Ekiikaro Ekirukwera. Esahaani n'ebbeeseni byombi bikaba biijwire ensaano enungi etabwirwe n'amagita, kibe kihongwa eky'ebyokulya.

¹⁴Orucuba orw'ezaabbu erukuhikya obulemezi obwa guraamu kikumi n'ikumi, ina, ijwire obubbaani,

¹⁵enimi emu ento, entaama empaya emu, ekyana ky'entaama ekihaya eky'omwaka gumu, ebi bibe bihongwa eky'okwokya.

¹⁶Emburabuzi empaya emu kibe kihongwa eky'okuganyiza ebibi.

¹⁷Kandi habw'ekyonzira eky'okusaba obusinge zikaba ente ibiri, entaama empaya itaano, emburabuzi empaya itaano n'entaama empaya itaano ezinyakuhikize omwaka gumu. Eki nikyo kyabaire kihongwa kya Nahasooni mutabani wa Aminadabbu.

¹⁸Ha kiro kyakabiri, Nasanairi mutabani wa Zuhara, omwebembezi w'Abaisakara yahonga ekihongwa kye,

¹⁹akahonga binu: esahaani emu ey'efeeza eyahikyaga obulemeezi bwa kiloguraamu emu n'ekicweeka n'ebbeeseni emu ey'efeeza eyahikyaga guraamu runaana kusigikira ha rulengo orw'Ekiikaro Ekirukwera. Esahaani n'ebbeeseni byombi bikaba biijwire ensaano enungi, enyakutabwire n'amagita, kibe kihongwa eky'ebyokulya,

²⁰Orucuba rumu orwa zaabbu eya guraamu kikumi n'ikumi rwijwire obubbani,

²¹enimi ento emu, entaama empaya emu, ekyana ky'entaama kimu ekinyakuhikize omwaka gumu, kibe kihongwa eky'okwokya.

²²Emburabuzi empaya emu ebe kihongwa eky'okuganyiza ebibi.

²³Kandi ekyonzira ekyahairweyo okusaba obusinge zikaba nte ibiri, entaama empaya itaano, emburabuzi itaano, n'ebyana by'entaama ebihaya bitaano ebinyakuhikize omwaka gumu, ebi nibyo Nasanairi mutabani wa Zuhara yahaireyo.

²⁴Ha kiro ekya kasatu, Eryabbu mutabani wa Heroni, omwebembezi w'abantu ba Zebburuni,

²⁵akahonga binu: esahaani emu ey'efeeza eya kiloguraamu emu n'ekicweeka n'ebbeeseni emu ey'efeeza eya guraamu runaana, noolengesa guraamu ez'Ekiikaro Ekirukwera. Ebi byombi bikaba biijwire ensaano enungi, etabwire n'amagita, kibe kihongwa eky'ebyokulya;

²⁶Orucuba rumu orwa zaabbu orwa guraamu kikumi n'ikumi ijwire obubbaani.

²⁷Enimi ento emu, entaama empaya emu, ekyana ky'entaama ekihaya kimu eky'omwaka gumu, ebi bibe kihongwa eky'okwokya.

²⁸Emburabuzi empaya emu kibe kihongwa eky'okuganyiza ebibi.

²⁹Kandi ekyonzira eky'okusaba obusinge, zikaba nte ibiri, entaama empaya itaano, emburabuzi empaya itaano, ebyana by'entaama ebihaya bitaano eby'omwaka gumu. Eki nikyo kyabaire kihongwa eky'Eryabu mutabani wa Heroni.

³⁰Ha kiro ekya kana, Erizuura mutabani wa Sedura, omwebembezi ow'abantu aba Rubbeni,

³¹akahonga binu: esahaani emu ey'efeeza, eya kiloguraamu emu n'ekicweeka, n'ebbeseni emu ey'efeeza eya guraamu runaana, noolengesa orulengo orw'Ekiikaro Ekirukwera. Ebi byombi bikaba biijwire ensaano enyakuninuukire enyakutabwirwe n'amagita, kibe kihongwa eky'ebyokulya.

³²Orucuba rumu orwa zaabbu orwa guraamu kikumi n'ikumi rwijwiire obubbaani.

³³Enimi ento emu, entaama empaya emu, ekyana ky'entaama ekihaya kimu eky'omwaka gumu, ebi bibe bihongwa eky'okwokya.

³⁴Emburabuzi empaya emu kibe kihongwa eky'okuganyiza ebibi.

³⁵Kandi habw'ekyonzira eky'okusaba obusinge, zikaba ziri nte ibiri, entaama empaya itaano, emburabuzi empaya itaano, n'ebyana bitaano ebinyakuhikize omwaka gumu. Eki nikyo kyabaire kihongwa ky'Erizuura mutabani wa Sedura.

³⁶Ha kiro ekya kataano, Serumyeri mutabani wa Zulisadai omwebembezi w'abantu aba Simyoni,

³⁷ekihongwa kye ekaba sahaani emu ey'efeeza eya kiloguraamu emu n'ekicweeka,

³⁸ebbeseni emu eya zaabbu eya guraamu runaana, noolengesa guraamu ez'Ekikaro Ekirukwera. Ebi byombi biijwire ensaano enungi enyakuniinuukire etabwire n'amagita kibe kihongwa eky'ebyokulya. Orucuba rumu orwa zaabbu eya guraamu kikumi n'ikumi rwijwire obubbani.

³⁹Enimi ento emu, entaama empaya emu, ekyana ky'entaama ekihaya kimu eky'omwaka gumu, ebi bibe kihongwa eky'okwokya.

⁴⁰Emburabuzi empaya emu kibe kihongwa eky'okuganyiza ebibi.

⁴¹Kandi ekyonzira eky'okusaba obusinge, zikaba ziri nte ibiri, entaama empaya itaano, emburabuzi empaaya itaano, n'ebyana by'entaama ebihaya bitaano eby'omwaka gumu. Eki nikyo kyabaire kihongwa kya Serumyeri mutabani wa Zulisadai.

⁴²Ha kiro ekya mukaaga, Eriasafu mutabani wa Dehuli, omwebembezi w'abantu ba Gaadi

⁴³ekihongwa kye ekaba sahaani emu ey'efeeza eya kiloguraamu emu n'ekicweeka, n'ebbeseni emu ey'efeeza eya guraamu runaana noolengesa guraamu ez'Ekiikaro Ekirukwera. Ebi byombi biijwire ensaano enungi enyakutabwire n'amagita, kibe kihongwa eky'ebyokulya.

⁴⁴Orucuba rumu orwa zaabbu eya guraamu kikumi n'ikumi rwijwire obubbaani.

⁴⁵Enimi ento emu, entaama empaya emu, ekyana eky'entaama ekihaya kimu eky'omwaka gumu, ebi bibe bihongwa eky'okwokya.

⁴⁶Emburabuzi empaya emu ebe kihongwa eky'okuganyiza ebibi.

⁴⁷Kandi habw'ekyonzira eky'okusaba obusinge, zikaba ziri nte ibiri, entaama empaya itaano, emburabuzi empaya itaano n'ebyana by'entaama ebihaya bitaano eby'omwaka gumu. Eki nikyo kyabaire kihongwa kya Eriasafu mutabani wa Dehuli.

⁴⁸Ha kiro ekya musanju, Erisama mutabani wa Amihudi, omwebembezi w'abantu b'Efuraimu;

⁴⁹akahonga esahaani emu ey'efeeza eya kiloguraamu emu n'ekicweeka, n'ebbeseni emu ey'efeeza eya guraamu runaana noolengesa guraamu ez'Ekiikaro Ekirukweera. Ebi byombi biijwire ensaano enungi enyakuninuukire enyakutabwire n'amagita kibe kihongwa eky'ebyokulya.

⁵⁰Orucuba rumu orwa zaabbu eya guraamu kikumi n'ikumi orwijwire obubbaani.

⁵¹Enimi ento emu, entaama empaya emu, ekyana ky'entaama ekihaya kimu eky'omwaka gumu, ebi bibe kihongwa eky'okwokya.

⁵²Emburabuzi empaya emu, kibe kihongwa eky'okuganyiza ebibi.

⁵³Kandi ekyonzira eky'okusaba obusinge zikaba ziri nte ibiri, entaama empaya itaano, emburabuzi empaya itaano, n'ebyana by'entaama ebihaya bitaano eby'omwaka gumu. Eki nikyo kyabaire kihongwa eky'Erisama mutabani wa Amihudi.

⁵⁴Ha kiro ekya munaana, Gamalyeri mutabani wa Pedazuura omwebembezi w'abantu ba Manaase:

⁵⁵ekihongwa kye ekaba sahaani emu ey'efeeza eya kiloguraamu emu n'ekicweeka n'ebbeseni emu ey'efeeza eya guraamu runaana, noolengesa guraamu ez'Ekiikaro Ekirukwera. Ebi biijwire ensaano enungi enyakuninuukire, etabwirwe na magita, kibe kihongwa eky'ebyokulya.

⁵⁶Orucuba rumu orwa zaabbu eya guraamu kikumi n'ikumi orwijwire obubbaani.

⁵⁷Enimi ento emu, entaama empaya emu, ekyana eky'entaama ekihaya kimu eky'omwaka gumu, ebi bibe bihongwa eky'okwokya.

⁵⁸Emburabuzi empaya emu kibe kihongwa eky'okuganyiza ebibi.

⁵⁹Kandi ekyonzira eky'okusaba obusinge, zikaba ziri nte ibiri, entaama empaya itaano, emburabuzi empaya itaano, n'ebyaana by'entaama ebihaya bitaano, eby'omwaka gumu. Eki nikyo kyabaire kihongwa ekya Gamalyeri mutabani wa Pedazuura.

⁶⁰Ha kiro ekya mwenda, Abidaani mutabani wa Gidyoni, omwebembezi w'abantu ba Benyamiini

⁶¹akahonga esahaani emu ey'efeeza eya kiloguraamu emu n'ekicweeka, n'ebbeeseni emu ey'efeeza eya guraamu runaana noolengesa guraamu ez'Ekiikaro Ekirukwera. Ebi byombi biijwire ensaano enungi enyakutabwirwe n'amagita, kibe kihongwa eky'ebyokulya.

⁶²Orucuba rumu orwa zaabbu eya guraamu kikumi n'ikumi rwijwire obubbaani.

⁶³Enimi ento emu, entaama empaya emu, ekyana ky'entaama ekihaya kimu eky'omwaka gumu, ebi bibe kihongwa eky'okwokya.

⁶⁴Emburabuzi, empaya emu, kibe kihongwa eky'okuganyiza ebibi.

⁶⁵Kandi ekyonzira eky'okusaba obusinge zikaba nte ibiri, entaama empaya itaano, emburabuzi empaya itaano, n'ebyana by'entaama ebihaya bitaano eby'omwaka gumu. Eki nikyo kyabaire kihongwa eky'Abidaani mutabani wa Gidyoni.

⁶⁶Ha kiro ekya ikumi, Ahyezeri mutabani wa Amisadai, omwebembezi ow'abantu ba Daani:

⁶⁷ekihongwa kye ekaba sahaani emu ey'efeeza, eya kiloguraamu emu n'ekicweeka n'ebbeeseni emu ey'efeeza eya guraamu runaana, noolengesa amabaale aga guraamu ez'Ekiikaro Ekirukwera. Ebi byombi biijwire ensaano enungi enyakuninuukire etabwire n'amagita kibe kihongwa eky'ebyokulya.

⁶⁸Orucuba rumu orwa zaabbu eya guraamu kikumi n'ikumi rwijwire obubbaani.

⁶⁹Enimi ento emu, entaama empaya emu, ekyana ky'entaama ekihaya kimu, eky'omwaka gumu, kibe kihongwa eky'okwokya.

⁷⁰Emburabuzi empaya emu, kibe kihongwa eky'okuganyiza ebibi.

⁷¹Kandi habw'ekyonzira eky'okusaba obusinge: zikaba nte ibiri, entaama empaya itaano, emburabuzi empaya itaano n'ebyana by'entaama ebihaya bitaano eby'omwaka gumu. Eki nikyo kyabaire kihongwa ekya Ahyezeri mutabani wa Amisadai.

⁷²Ha kiro ekya ikumi na kimu, Pagyeri mutabani wa Ocurani, omwebembezi ow'abantu ab'Aseeri,

⁷³ekihongwa kye ekaba esahaani emu ey'efeeza, eya kiloguraamu emu, n'ekicweeka n'ebbeseni ey'efeeza eya guraamu runaana noolengesa amabaale aga guraamu eg'Ekiikaro Ekirukwera. Ebi biijwire ensaano enungi enyakutabwire n'amagita, kibe kihongwa eky'ebyokulya.

⁷⁴Orucuba rumu orwa zaabbu, rwijwire obubbaani.

⁷⁵Enimi ento emu, entaama empaya emu, ekyana ky'entaama ekihaya kimu eky'omwaka gumu, kibe kihongwa eky'okwokya.

⁷⁶Emburabuzi empaya emu, kibe kihongwa eky'okuganyiza ebibi.

⁷⁷Kandi habw'ekyonzira eky'okusaba obusinge, zikaba nte ibiri, entaama empaya itaano, emburabuzi empaya itaano, n'ebyana by'entaama ebihaya bitaano eby'omwaka gumu. Eki nikyo kyabaire kihongwa ekya Pagyeri, mutabani wa Ocurani.

⁷⁸Ha kiro ekya ikumi na bibiri, Ahira mutabani wa Enani, omwebembezi ow'abantu ba Nafutaali:

⁷⁹ekihongwa kye ekaba sahaani emu ey'efeeza, eya kiloguraamu emu n'ekicweeka n'ebbeseni, emu ey'efeeza, eya guraamu runaana, noolengesa amabaale aga guraamu eg'Ekiikaro Ekirukwera. Ebi byombi biijwire ensaano enungi enyakutabwire n'amagita, kibe kihongwa eky'ebyokulya.

⁸⁰Orucuba rumu orwa zaabbu orwa guraamu kikumi n'ikumi orwijwire obubbaani.

⁸¹Enimi ento emu, entaama empaya emu, ekyana ky'entaama ekihaya kimu, eky'omwaka gumu, kibe kihongwa eky'okwokya.

⁸²Emburabuzi empaya emu, kibe kihongwa eky'okuganyiza ebibi.

⁸³Kandi habw'ekyonzira eky'okusaba obusinge: zikaba nte ibiri, entaama empaya itaano, emburabuzi empaya itaano, n'ebyana by'entaama ebihaya bitaano eby'omwaka gumu. Eki nikyo kyabaire kihongwa ekya Ahira mutabani wa Enani.

⁸⁴Eki nikyo kyabaire kihongwa eky'okweza itambiro, ekyahairwe abeebembezi ba Isirairi, ha kiro ekiryaseesiirweho amagita. Esahaani ikumi na ibiri ez'efeeza, ebbeseni ikumi na ibiri ez'efeeza, encuba ikumi na ibiri eza zaabbu, buli sahaani emu ey'efeeza neehikya kiloguraamu emu n'ekicweeka.

⁸⁵Kandi buli bbeseni ey'efeeza erukuhikya guraamu runaana. Efeeza yoona ey'ebintu ebikwatwa ekahikya kiloguraamu haihi abiri na munaana, noolengesa amabaale aga kiloguraamu na guraamu ez'Ekiikaro Ekirukwera.

⁸⁶Encuba ikumi na ibiri eza zaabbu, ezinyakwijwire obubbaani, buli emu, ezirukuhikya kiloguraamu abiri na musanju n'ekicweeka.

⁸⁷Enimi ikumi na ibiri, empaya z'entaama ikumi na ibiri n'ebyona by'entaama eby'omwaka gumu, hamu n'ekihongwa ky'ebyokulya ekigenda nabyo, habw'ekihongwa ekyokwokya; embuzi ikumi na ibiri habwekihongwa kyokuganyiza ekibi,

⁸⁸enimi abiri naina, empaya zentaama nkaaga empaya z'embuzi nkaaga, empaya z'entaama ezihikize omwaka gumu, nkaaga. Ebi nibyo byahongerwe ha meeza erukwera, hanyuma y'okuseswaho amagita.

⁸⁹Musa obuyagenzire omu Heema kubaza na MUKAMA, akahurra iraka niribaza nawe kuruga ha ntebe y'okuganyira eyekaba eri ha sanduko ey'ekiragaano nirireetwa hagati y'ebihange ebyamapapa ebibiri.