Read Runyoro - rutooro Kubar 8 Bible Online

Kubar 8 - Runyoro - rutooro bible

Kubar 8

¹MUKAMA akagambira Musa ati:

²“Gambira Arooni ngu: Obu araaba naateekaniza etaara, etaara ezi omusanju azigenderre, zaakire omumaiso g'ekikondo ky'etaara nukwo hahweze. Arooni nukwo yakozire;

³etaara yazitaho aziroleriize omumaiso g'ekikondo nukwo hahweze, MUKAMA nkooku yaragiire Musa.

⁴Ekikondo ky'etaara kikakorwa omu mulingo gumu: kikaheeswa omu zaabbu okuruga hansi kuhika hai guru nibahondera omulingo MUKAMA yayolekere Musa.”

⁵Kandi MUKAMA akagambira Musa ati:

⁶“Osoroole Abaleevi, obaihe omu bantu ba Isirairi, kandi obasemeze.

⁷Kubasemeza, okole oti: Obamiisire amaizi aganyakweza, beemwe emibiri yaabu yoona, boogye engoye zaabo, beesemeze.

⁸Nubwo bakwate enimi ento n'ekihongwa eky'ebyokulya ekibahongeraho, ensaano enungi enyakutabwire na amagita, kandi bakwate enimi ento endi, ekihongwa ekinyakuheebwayo kuganyiza ekibi.

⁹Abaleevi obate omumaiso ag'Eheema ey'okutangatanganiramu, osorooze ekitebe kyona eky'abantu ba Isirairi.

¹⁰Obu oraamara kubata omumaiso ga MUKAMA, abantu ba Isirairi babateho emikono,

¹¹Arooni abahongere MUKAMA, basisane ekihongwa ekinyakwimukyaimukiibwe, ekinyakurugire hali abantu ba Isirairi, gube mulimo gwabo kuheerezaaga MUKAMA.

¹²Hanyuma Abaleevi, bate emikono yabo ha mitwe y'enimi ezi, emu ogihonge, ebe kihongwa ekyokuganyiza ebibi, endi ebe kihongwa eky'okwokeza MUKAMA, kubaleherra.

¹³Nubwo obaragire baherezege omumaiso ga Arooni n'abatabani, obahongere MUKAMA bali kihongwa ekyokwimukyaimukya.”

¹⁴“Abaleevi, nukwo olibasoroora oti, obaihe omu bantu ba Isirairi nukwo babe bantu bange.

¹⁵Eki obu kirihwa, Abaleevi nubwo baliikirizibwa kutaaha omu Heema ey'okutangatanganiramu bakole omulimo gwange, omazire kubeeza n'okubahonga nk'ekihongwa ekinyakwimukyaimukiibwe.

¹⁶Habwokuba, abantu baba babampeeriire kimu, babaihire omu ba Isirairi abandi bagarukire omu kiikaro eky'emizigaijo ey'abantu ba Isirairi boona mbeetwaliriire kimu.

¹⁷Habwokuba ekizigaijo kyona omu Isirairi kyange, omu bantu n'ebisoro; obu naisire emizigaijo yoona omunsi Misiri nubwo nabyeyeriize nyenka.

¹⁸Kandi nyetwaliire Abaleevi omu kiikaro eky'emizigaijo ey'abantu ba Isirairi.

¹⁹Kandi Abaleevi, mbaihire omu bantu ba Isirairi nabaha Arooni, nabaihamu nk'ekisembo bakolege omulimo gw'Abaisirairi omu Heema ey'okutangatanganiramu, n'okuhongerraga abantu ba Isirairi, nukwo abantu ba Isirairi obu barairraga haihi Ekiikaro Ekirukwera, baleke kugwibwamu orufu kahwerekereza.”

²⁰Musa, Arooni n'ekitebe kyona eky'abantu ba Isirairi, nukwo baakozire bati Abaleevi, baahondera ebi byona eby'okweza Abaleevi, MUKAMA ebi yaragiire Musa.

²¹Abaleevi baayeyeza bonka, baruga omu kibi, baayogya engoye zaabo; Arooni yabahonga bali nk'ekihongwa ekimukaimukiriziibwe MUKAMA kandi yabasabira nukwo basemezibwe.

²²Ebi obu byahoire, Abaleevi baataaha omu Heema ey'okutangatanganiramu, bakole omulimo gwabo nibaroleererwa Arooni n'abatabani, nkooku MUKAMA yaragire Musa.

²³Kandi MUKAMA akagambira Musa ati:

²⁴“Kinu nikikwata h'Abaleevi: baraatandikaga kukora omulimo gwabo ogw'okuheereza omu Heema ey'okutangatanganiramu, bahikize emyaka abiri n'etaano ey'obukuru n'okweyongerayo,

²⁵kandi obu baraahikyaga emyaka ataano ey'obukuru,

²⁶baleke kweyongera kuheereza, bakonyerege bagenzi baabo omu Heema ey'okutangatanganiramu, baitu batarukukora oruteekerro. Obu oraaba nootegeka emirimo, emirimo y'Abaleevi nukwo ogitegeke oti.”