Read Runyoro - rutooro Kubar 9 Bible Online

Kubar 9 - Runyoro - rutooro bible

Kubar 9

¹Omu kwezi okw'okubanza okw'omwaka ogwa kabiri, Abaisirairi bamazire kuruga omunsi Misiri, MUKAMA akagambira Musa omwirungu lya Sinai ati:

²“Gambira abantu ba Isirairi, beesemeze ekiro kyokwijuka okuhingurwaho omu kasumi akaaragiirwe.

³Ha kiro ekya ikumi na bbina eky'okwezi kunu orwebagyo, nuko kasumi akaaragiirwe nubwo murakisemezaaga nimukuraatira ebiragiro, n'ebigambo ebyagambirwe.”

⁴Habweki, Musa yagambira abantu ba Isirairi, nukwo baasemeze ekiro eki ekyokwijuka okuhingurwaho.

⁵Abantu nukwo baakozire, basemeze ekiro, eky'okwijuka okuhingurwaho omu kwezi okw'okubanza, ha kiro ekya ikumi na bbina eky'okwezi oku rwebagyo, omu irungu lya Sinai nibahondera byona MUKAMA ebi yaragiire Musa.

⁶Hakaba haroho abantu abamu abakaba nibazira habw'okukwataho omutumbi gw'omuntu, abatarasoboire kusemeza ekiro eky'okwijuka okuhingurwaho, baija omu maiso ga Musa na Arooni ha kiro eki abasaija abo,

⁷baagambira Musa bati: “Nituzira, habw'okukwataho omutumbi gw'omuntu; habwaki, nitutangwa kuha Ruhanga ekihongwa hamu n'abantu ba Isirairi omu kasumi akaataairweho?”

⁸Musa yabagarukamu ati: “Mulindeho, kuhika obundakahurra MUKAMA eki araabagambaho.”

⁹MUKAMA yagambira Musa ati:

¹⁰“Gambira abantu ba Isirairi ngu: Omuntu weena omuli inywe rundi ow'omu baijukuru banyu araabaga nazira habw'okukwataho ekintu ekifiire, rundi obu araabaga ali omu rugendo orwa hara, kandi kunu nayenda okusemeza ekiro ky'okwijuka okuhingurwaho kwa MUKAMA.

¹¹Omukairirizi ha kiro ekya ikumi na bbina eky'okwezi kwa kabiri, nubwo bakisemezeege; balyege emigaati etatumbisiibwe n'emikubi erukusaarra.

¹²Ekyana ky'entaama batalikirya bakakisigaho, okuhika nyenkya kandi batalikiihenda igufa na limu, basemezeege ekiro ky'okwijuka okuhingurwaho nibahondera ebiragiro byakyo byona.

¹³Baitu omuntu atarukuzira kandi atali omu rugendo, anyakwanga okusemeza okuhingurwaho, omuntu ogu asendwege, habwokuba tahaire MUKAMA ekihongwa omu kasumi akakyaragiriirweho, aikale n'ekibi kye.

¹⁴Kakuba omunyaihanga arukwikara na inywe agonza kusemeza obugenyi obw'okuhingurwaho kwa MUKAMA, na uwe asemeriire ahondere ebiragiro, habwokuba uwe, n'omusi w'ensi, musemeriire kuba n'ebiragiro bimu.”

¹⁵Ha kiro ekibamaliireho kwemereza enju ya MUKAMA, niyo Eheema y'endagaano, ekicu kikagisweekerra, kandi rwebagyo, kikaba kiri ha ruguru rw'enju ya Ruhanga, nikisisana omurro okuhika nyenkya,

¹⁶nukwo yaikaraga eti obutoosa, nyamusana yasweekwaga ekicu, ekiro esweekwa ekintu ekirukusisana omurro.

¹⁷Buli kasumi ekicu obu kyarugaga ha nju ya Ruhanga, abantu ba Isirairi baimukyaga kugenda, omu kiikaro ekicu ha kyagarukiraga, abantu ba Isirairi nuho baateeraga orukande.

¹⁸MUKAMA obu yaragiraga, abantu ba Isirairi baimukya, kandi obu yaragiraga, baateeraga orukande; akasumi aka kyamaraga kiri ha nju ya MUKAMA, baikaraga omu rukande.

¹⁹Noobu kyamaraga ebiro bingi, abantu ba Isirairi baahurraga MUKAMA eki aragiire, tibaasoboraga kwimukya kugenda.

²⁰Obundi n'obundi, ekicu kyamaraga ebiro bike ha nju ya MUKAMA, MUKAMA obu yaragiraga baikaraga omu rukande, hanyuma obu yaragiraga, baimukya kugenda.

²¹Obundi, ekicu kyabaga ha nju ya MUKAMA, okuruga rwebagyo okuhika nyenkya, nyenkya ekicu obu kyabaga kirugireho, baimukya kugenda, obu kyayeyongeraga kikarugaho nyamusana rundi ekiro, baimukya.

²²Ekicu obu kyamaraga ha nju ya MUKAMA, ebiro bibiri rundi okwezi, rundi omwanya mukooto, Abaisirairi baikaraga omu rukande, tibaasoboraga kwimukya kugenda, baitu obu kyarugahoga, baimukya kugenda.

²³MUKAMA obu yaragiraga, bateera orukande, kandi obu yaragiraga baimukya kugenda, baalindaga Ruhanga abaragire n'agambira Musa.