Read Runyoro - rutooro Mik 2 Bible Online

Mik 2 - Runyoro - rutooro bible

Mik 2

¹Nibakaigale abo abanyakwikara nibategeka kukora obubi; abanyakwikara babyamire nibacika kukora eby'itima! Omu rukyakya, bakora eki baraire nibateekereza, habwokuba nikibarahukira kukikora.

²Obu beegomba emisiri, baginyaga, obu beegomba amaju, bagatwara; weena anyakwina eka ye n'ebintu bye tibamuha businge.

³Habweki MUKAMA naagamba ati: mmaliriire kubaleetera akabi, akabi ako timulikatabuka muliroorra aho muli omu muhito, nubwo mulekere aho okwekuliriza, habwokuba akasumi ako kaliba k'akabi.

⁴Akasumi ako obu kalihika, abantu balibaganikyaho oruganikyo rube ky'okurorraho eky'akabi aka muliba mugwiremu, kandi balizina ekizina kimu ekimara omuntu amasiko, ekirukukwata ha kintu eki ekiriba kibaiziire nibagamba bati: “Tuhwerekeriire, MUKAMA, ensi yaitu agitwakire, yagiha abo abatunyagire.”

⁵Habweki akasumi obu kalihika, ensi kugarulirwa abantu ba MUKAMA, omuli inywe tihalibaho abalihebwa omugabo.

⁶Abantu bagamba bati: “Twiheho orugambo, omuntu tasemeriire kugambira abantu ebintu nk'ebi; tihalibaho kuswaazibwa kwona.”

⁷Iwe nju ya Yakobbo, ekintu nk'eki kisemeriire kugambwa? MUKAMA tasobora kugumiisiriza? Uwe nukwo akora ati? Omuntu anyakukora ebirungi, ebigambo bye tibimugasira?

⁸Baitu ninywe murukuseesira abantu bange nk'abarukuseesira omunyanzigwa; nimunyaga ebintu by'abantu abataina kabi, omuntu arukuteekereza ati: “ndi kurungi,” nimumuleetera akabi ak'obulemu.

⁹Nimubinga abakazi b'abantu bange, nimubaiha omu maju gaabo agabarukugonza; abaana baabu abato nimubaihaho ekitiinisa eki nabahaire obusinge bwona.

¹⁰Mwimuke mugende; habw'obutahikirra oburukuleeta okuhwerekerra. Okuterambwa, habwokuba enu, teri nfummuro.

¹¹Obu haakubaireho omuntu arukurabanganamu naabaza orwamo, arukuhurumbya kandi embiihi y'ebisuba, akagamba ati: “nimwija kutunga amarwa maingi muno n'ebitamiiza ab'amaani ebindi,” ogu nuwe yakubaire mwegesa nyakabara anyakusemeriire ihanga linu!

¹²Mananukwo, inywe inywena ab'enju ya Yakobbo, endagalikwa eza Isirairi, ninyija kubasorooza; ninyija kubateeraniza hamu nk'entaama ezinyakuli omu isibiko, nk'igana ly'entaama ezinyakuli omu iriisizo lyazo, mugaruke mube kanyanya k'abantu abataina eki barukutiina.

¹³Ogu anyakuhagura, nuwe alibeebembera; nabo nubwo balihagura, barabe omu irembo, kandi niryo barabemu nibaturuka. Omukama wabo nuwe alibaba omumaiso, beebembiirwe MUKAMA.