Read Runyoro - rutooro Mik 3 Bible Online

Mik 3 - Runyoro - rutooro bible

Mik 3

¹Nubwo nagambire nti: Mutege amatu inywe bakuru ba Yakobbo, na inywe abalemi b'enju ya Isirairi! Tikibasemeriire kumanya obwinganiza?

²Inywe abanyakunoba ebirungi mukagonza ebibi, Inywe abanyakubaagaho abantu bange oruhu mukabaiha enyama ha magufa;

³inywe abanyakulya abantu bange, inywe abanyakubabaaga, abanyakubahenda amagufa mukabatematema nk'enyama erukugenda kucumbwa omu bbinika rundi omu kinaga.

⁴Akasumi kalihika muterre MUKAMA omuranga aleme kubaanukura. Talibaha ebi murukusaba, habwokuba mukakora ebibi.

⁵Abantu bange nibabiihwabiihwa abarangi abarukubanihiza obusinge, nukwo bagire eki baabaha, kandi abatabanihiza, bahaya kubacwera obulemu. Abarangi abarukuhabisa abantu, abanyakutoka baina akantu akookulya bati “businge” abanyakucwera obulemu omuntu atabahaire akookulya, MUKAMA naabagambaho ati:

⁶Obwire bulibairirra mulemwe kwolekwa muliswekwa omwirima n'okuragura kubaleme. Izooba lirigorooba, abarangi ekiro kiribairagurra;

⁷abaraguzi balihemurwa abanyakubandwa baliswazibwa; balyekwata ha minwa, habwokuba Ruhanga talibaanukura.

⁸Baitu nyowe, MUKAMA akampa obusobozi, akampa Mwoyo we, akampa obwinganiza n'amaani, nukwo ntebeze Yakobbo obubi bwe, mmanyise Isirairi ekibi kye.

⁹Inywe abakuru b'enju ya Yakobbo na inywe bakuru b'enju ya Isirairi, inywe abanyakufuhya obwinganiza, inywe abanyakuburanganiza obulyo, mutege amatu

¹⁰inywe abanyakwombekesa Siyoni esagama abanyakukora ebitakorwa omu rubuga Yerusaalemu.

¹¹Bakuru b'orubuga oru, bali b'enguzi, banyakatagara beegesa habw'okusasurwa; abarangi barangira kuheebwa sente; baitu nabwo nibakyayesiga MUKAMA nibagamba bati: “Twina MUKAMA, kandi tuliba nituba ki?”

¹²Habweki, habwanyu, Siyoni eririmwa nk'omusiri; Yerusaalemu erikambuurwa etuume hali, akasozi ak'enju ya MUKAMA, kaliba itongo.