Read Runyoro - rutooro Mik 6 Bible Online

Mik 6 - Runyoro - rutooro bible

Mik 6

¹Muhurre MUKAMA eki arukugamba: Ai MUKAMA, imuka otongane, ensozi n'obusozi bihurre eki orukugamba.

²Inywe nsozi, na inywe emisingi ey'ensi eya buli na buli; mutege amatu; habwokuba MUKAMA aina empaka n'abantu be, aina eki arukujunaana Isirairi.

³MUKAMA naagamba ati: “Inywe bantu bange, nkabakora ki? Nkabaleetera obulemeezi bwa mulingo ki? Mungarukemu.

⁴Dora, Nkabaiha omunsi Misiri, nkabacungura nabaiha omu bwiru rubaale, kandi natuma: Musa, Arooni na Miriamu babeebembere.

⁵Inywe bantu bange, mwijuke Baraki omukama wa Mowabbu eki akaba ategekere kubakora, kandi mwijuke Bbalaamu mutabani wa Beyora eki yamugarukiremu; mwijuke ebyabaireho okuruga Sitimu okuhika Girigaali, nukwo mumanye ebikorwa bya MUKAMA ebinyakujuna.”

⁶Obu ndiba ningenda kuramya MUKAMA Ruhanga ow'omwiguru, ndimutwarra ki? Ndimutwarra ebihongwa eby'okwokya n'enyana ez'omwaka gumu?

⁷MUKAMA alisiima empaya z'entaama enkumi n'enkumi, rundi amagita agasobora kwijuza ebisaaru emitwaro n'emitwaro? Mutabani wange omuzigaijo ou nayezaalire, nuwe ndihayo habw'obubi bwange na ha bw'ebibi byange?

⁸Iwe muntu, MUKAMA akakikumanyisa; eki akusaba, nukwo kukora eby'obwinganiza okuba n'engonzi ez'amazima, n'okukora Ruhanga wawe abi agonza nooyebundaaza.

⁹MUKAMA naayeta ab'omu rubuga kintu ky'amagezi mali, kutiina ibara lyawe: iwe ruganda, na inywe ekitebe ky'abantu ab'omu rubuga; mutege amatu.

¹⁰Omu maju g'abantu ababi, harumu ebintu ebi baatungire omu bugobya. Beekoonyeza minzaani ezitali z'amazima, kandi eki nikyo ekintu eki nfuuhya.

¹¹Kinsemeriire kuganyira omuntu anyakwina minzaani etali y'amazima, n'ensaho y'amabaale agarukunyaga?

¹²Abantu bawe abaguuda, nubo abahoogozi boonyini, abasi bawe mbiihi z'ebisuba, obucwangya nubwo obwabo.

¹³Nikyo ntandikiire kubateera, mbahwerekereze habw'ebibi byanyu.

¹⁴Mulirya, baitu timuliiguta, enjara eraikaraga neebaruma; mulinyaga ebintu, baitu ebi mulinyaga, timulisobora kubyahura, kyona eki muraayahuraga, ndikihwerekereza omu bulemu.

¹⁵Mulisiga, baitu timuligesa, mulijunga ebijuma by'emitini, baitu amagita gaayo timuligeesiiga; mulijunga emizabbibbu, baitu amarwa timuliganywaho.

¹⁶Habwokuba mukakwata ebiragiro by'Omuli, kandi mwakora byona ebikorwa eka y'Ahabbu, mwahondera amagezi gaabo; nikyo ndaabahwerekerereza, abasi banyu mbafoole kintu eky'okugaywa.