Read Runyoro - rutooro Mik 7 Bible Online

Mik 7 - Runyoro - rutooro bible

Mik 7

¹Haa imira nyowe! Ninsisana nk'omuntu arukurumwa enjara, kwimukya eriiso kurora ha muti, akasanga hataroho kijuma na kimu, emizabbibbu yoona etaroho kijuma.

²Abantu abarukugonza Ruhanga bakahwerekerra, omunsi tibakyarumu omuli abo abaasigaireho, tiharumu mwesigwa; boona bali aho, nibateekereza ekintu kimu kyonka, nukwo kwita buli muntu naahiiga mugenzi we amwite.

³Boona baina amagezi ag'okukora obubi. Eki barukukora, nubwo obubi, kandi nibabwekambira; abanyoro n'abacwi b'emisango nibenda enguzi, omuntu omukuru naabaza bbwa, obubi bwona obunyakumuli ha mutima; eki arukwenda kukora, nukwo bakitegeke hamu.

⁴Omuntu arukukirra kimu oburungi omuli bo, nuwe arukusisana amakerre, kandi arukukirra kimu amazima, naasisana nk'orukoroba orw'amahwa. Akasumi kahikire, Ruhanga aka araafubirraho abantu, nkooku yabahabwire, naaraba omu balinzi baabu abarangi. Hati basobiirwe.

⁵Otalyesiga omutaahi, otalinanukira enganjani yawe. Omukazi ou waswiire, olekege kumugambira buli kantu.

⁶Omu biro ebi, abaana aboojo nibarora ba isebo nk'abadoma, abaisiki nibateeza empaka ba nyinabo, bakaamwana nibaimukirra banyinazaarabo, abanyanzigwa b'omuntu, nubo abo ab'omuka ye yonyini.

⁷Baitu nyowe, amaiso gange ngahangire MUKAMA Ruhanga, nuwe Ruhanga w'okujunwa kwange; Ruhanga wange nuwe alimpurra.

⁸Iwe omunyanzigwa wange, oleke kunyebugira, noobu ndigwa ndiimuka; obu ndiba omu mwirima, MUKAMA alimmulikira.

⁹Kimpikiriire kwemerra ekiniga kya MUKAMA, okuhika obu alintonganirra akansingirra, habwokuba nkamusobeza. Alinturukya antahye omu kyererezi; nyetegereze nkooku ajuna.

¹⁰Abanyanzigwa bange obu balirora ekintu eki, omukazi ayankagwize ati: “MUKAMA Ruhanga wawe ali nkaha” alikwatwa ensoni ndimwebugira, alirubaatirirwa nk'esaabu ey'omu nguudo.

¹¹Inywe abantu ba Yerusaalemu, akasumi ak'okwombeka ak'okwimukya ebisika byanyu kalihika! Ha kiro eki, omutaano gulyongeerwa muno omumaiso.

¹²Ha kiro eki, abantu abaliruga Asiriya abalikuhikaho, bahike na Misiri, baliruga Misiri bahike ha kisaaru Efurate, baliruga ha nyanja bahike ha nyanja, kandi baliruga ha rusozi bahike ha rusozi.

¹³Baitu ensi, habw'obubi bw'abo abagiikaramu, erifooka ihamba eki nikyo kirisasurwa ebi bakora.

¹⁴MUKAMA, liisa abantu bawe, igana ery'obugwetwa bwawe, abanyakwikara bonka omu kibira, nambere hali ensi ey'orwezo. Leka liriire Basani na Giryadi, nkooku lyakoraga kara.

¹⁵MUKAMA, otukorre ebyamahano nk'ebi wakozire obu watwihire omunsi Misiri.

¹⁶Amahanga agaagiraga ngu gaina obusobozi, garole eki gaswale, geekwate ha munwa gaigale n'amatu;

¹⁷galikomba ecuucu nk'enjoka, nk'ebintu eby'omunsi ebinyakwekurra; galiruga omu bigo byago nigakankana, galihindukira MUKAMA Ruhanga waitu, nigatiina habwaawe.

¹⁸Nooha anyakusiisana, anyakuganyira ebibi, atabiihirirwa kimu, okanga kuganyira, baitu anyakugonza kutugirra embabazi?

¹⁹Nahati garuka otuganyire, rubaatirra emisango yaitu egendere kimu hansi y'enyanja, naga ebibi byaitu byoona.

²⁰Yakobbo n'Abburahamu bahe kukweesiga nkooku warahiire ba isenkuruitwe omu biro ebya ira.