Read Runyoro - rutooro Nah 1 Bible Online

Nah 1 - Runyoro - rutooro bible

Nah 1

¹Binu nibyo ebigambo ebirukubazaaho Nineve, ebirukusubirra okwolekwa kwa Nahumu ow'Elikoosi.

²MUKAMA aba Ruhanga ow'ihali kandi ow'ekiniga, MUKAMA aba muhoozi w'enzigu kandi agira obukaya; MUKAMA ahoora enzigu abazigu be, kandi aikara abiihiriirwe abanyanzigwa be.

³MUKAMA tabiihirwa bwango, kandi w'obusobozi obuteerengwa taleka musango na gumu ogu atataho kifubiro. Agendera omu kairiringwa n'omu ihunga ebicu niyo ecuucu enyakumuruga ha bigere.

⁴Aragira enyanja eyoma, ayomya ebisaaru byona; ensozi Basani na Karameeri zihotoka, ebyakyo ebya Lebbanoni bicucuka.

⁵Ensozi obu zimurora zitengeeta, obusozi bwaga, ensi etukumira ensi yoona na byona ebigirumu bitengeeta.

⁶N'oha asobora kwemera ekiniga kye? N'oha asobora kugumira obukaya bwe? Ekiniga kye ekyaka nk'omurro, obu arolerra ensozi isasanguka.

⁷MUKAMA murungi, nuwe bugumizo omu kasumi ak'omuhito; amanya abo abanyakumwebinga.

⁸Ahwerekereza abazigu be n'entunga y'amaizi airukya abanyanzigwa be abatwara omu mwirima.

⁹MUKAMA nomwenza ki? Alihwerekerereza kimu; taliseesera abanyanzigwa be kabiri.

¹⁰Balihwerekerezibwa nk'ekijumba ky'amahwa, balicwekerezibwa nk'omuzingo gw'ebinyansi ebyoomere.

¹¹Omuntu ogu ayacikire kukora MUKAMA ekintu ekibi, kandi ayahaire abantu amagezi ag'okukora ebibi, ataruge omuli iwe?

¹²Kinu, MUKAMA nikyo arukugambira abantu be Abaisirairi ati: “Abasiriya noobu baraaba bali b'amaani kandi baingi bata, balihwerekerezibwa babuzibwe. Inywe bantu bange, nkababonabonesa, baitu tindigaruka kubabonabonesa.

¹³Hati ninyija kubacwa omu busobozi bw'Abasiriya, mbabohorremu enjegere ezibabohere.”

¹⁴Kinu nikyo ekiragiro MUKAMA eki yateeriireho Abasiriya “Tibaligira baijukuru abaligumyaho ibara lye; ndihwerekereza ebisisani ebinyakuli omu maju g'abacwezi baabo. Mmaliriire kubaita, tibasemeriire kwomeera.”

¹⁵Ha nsozi haliyo omukwenda arukwija naarangirra Amakuru Amarungi! Naija kurangirra obusinge. Yuda osemezeege ebiro byawe ebikuru, ohikirizeege ebi waragaine. Habwokuba ababi tibaligaruka kukuseesira, bahwerekerereziibwe kimu.