Read Runyoro - rutooro Nah 3 Bible Online

Nah 3 - Runyoro - rutooro bible

Nah 3

¹Rulikibona orubuga oru oruseesa esagama orubiihi rw'ebisuba kandi orurumu ebinyagirwe, eby'obuhoogozi obuhinguraine!

²Hurra enkoba nkooku irukugamba enyamuziga nkooku zirukweziriga, embaraasi nkooku zirukusiriba n'ebigaali nkooku birukuguruka.

³Abatembi b'embaraasi nibarumba baina empirima ezirukumyankya n'amacumu agarukumuliikana.

⁴Abantu empura n'empura bafiire, emitumbi eterraine ey'abantu abatarukubarwa, abantu nibagendera ha mitumbi eruguru.

⁵MUKAMA ow'amahe naagamba ati: Ndiimukya engoye zaawe nzikusweke ha maiso; amahanga goona gakusunge nkooku oli busa, n'abantu ab'amakama agatali gamu barole nkooku okwasirwe ensoni. MUKAMA naagamba ati: Nineve ninyija kukufubira! Ninyija kukujuura, amahanga gakusunge, gakurole, ensoni iraaliire kukwita.

⁶Ndikurofuhaza nkwoleke emigayo, nkufoole kintu eky'okutengerra.

⁷Boona abaraakuroraga baraagarukaga enyuma nibagamba bati: Mawe, Nineve ekahwerekerra; n'oha araagiririrra? Ndaiha nkaha ab'okugiirukirra?

⁸Nineve, iwe nootekereza, nookira Tebesi, ey'ekaba eri haihi n'ekisaaru Nairo, eyehingulirizibwe amaizi, enyanja nikyo kigo kyayo, amaizi nikyo kigo kyayo?

⁹Dora niyo yalemaga Sudaani na Misiri, ekaba enyina obusobozi obutaina nambere burukugarukira. Abapuuti n'Abalibbiya nubo baagikoonyeraga.

¹⁰Noobwakubaire ekaba eri eti, abantu baayo bakakwatwa baanyagwa; abaana baabo bakaitirwa omu ntangatangano eya buli rugendo, habwokuba abasaija abeebembezi bakateererwa akaruuru, kandi abakuru baabohwa omu njegere.

¹¹Na iwe Nineve nukwo oligotwa, olihwerekerezibwa olisoberwa oserre kwebinga omunyanzigwa.

¹²Ebigo byawe nibisisana nk'emiti emizaituuni, enyakwanire ebijuma eby'omugwa na itaka ebyengere obu bitengesibwaho, bigwa omu kanwa k'ogu arukwenda kubirya.

¹³Abaserikale bawe abakuli hagati, abo bakazi bukazi. Amalembo ag'ensi yawe, gakinguliirwe abazigu bawe; ebihongozo byawe omurro gukabisiiriiza.

¹⁴Oyetahire amaizi otakagosirwe, agalikukoonyera omu kasumi ako. Ogumye ebigo byawe, samba ibumba ery'okubumba amatafaali oteekanize orulengo rw'amatafaali!

¹⁵Oku, omurro nuho gulikusiiriiriza, empirima nuho erikutematemera. Olihwerekererra kimu nk'ebibyarwa ebinyakuliibwa enzige. Mweyongere mukanye nk'enzige musaage nk'enseenene.

¹⁶Okakanyisa abasuubuzi bawe, baakira enyunyuuzi eza haiguru. Enzige zanjurra amapapa gaazo, ihurruka zigenda.

¹⁷Abanyoro bawe nibasisana nk'emaasa, abahandiiki bawe nibasisana nk'igana ly'enzige ezinyakuli ha nkoroba ha kiro eky'embeho. Izooba obu lituruka, zihurruka zigenda; tihabaho n'omu amanya nambere zigiire.

¹⁸Iwe omukama w'Asiriya, abaliisa bawe bagwijagiire, abanyoro bawe nibahungira, abantu bawe bararangire ha nsozi tihabaho muntu ow'okubasorooza.

¹⁹Tiharoho mubazi ogusobora kukehya obusaalizi bwawe. Ekihuta nikikucumita. Boona abarukuhurra ebyakugweriire nibateera enkwakwa ngu na iwe wakuba ki?