Read Runyoro - rutooro Hab 2 Bible Online

Hab 2 - Runyoro - rutooro bible

Hab 2

¹Ndaayemerra ha munaara gwange ntunuliire, ntegereze kuhurra MUKAMA eki arangamba, n'eki arangarukamu hali ebi ndukuhyemera.

²MUKAMA akangarukamu ati: “Handiika kurungi ha byasi by'amabaale eky'oyolekerwe, okihandiike kurungi, nukwo kisobole kusomwa bairuke bwango.

³Ego, eki oyolekerwe, akasumi kakyo tikakahikire; baitu nikaija kuhika bwango kihikirre. Nikiija kwo mpora, baitu kirinde; nikiijakwo, tikirukwija kukerererwa.

⁴Ebigambo ebi oragamba mbinu: Ababi balihwerekerra baitu abarungi balyomeera habw'okwikiriza kwabo.

⁵Kandi ekindi, amaarwa gazaara obukurungutaniza; omuntu omwekuliiriza, taikarra. Omururu gwe gugalihire nka nyabuyonga taniha nka rufu. Aikara naayekumira amahanga, aikara naayesorooleza abantu boona, abafoole be.”

⁶Abantu aba yasingwire balimwehindurra bamwoleke emigayo, balimugamba bati: “Alikibona ogu, anyakwikara nakanyisa ebitali bye anyakwikara nanyaga, alihikya nkaha? Kandi ayekanyiza wenka amabanja!”

⁷Abanyamabanja bawe tibaliimukirra, abo tinubo balikutiinisa? Lero obu, balinyaga iwe.

⁸Nkooku wanyagire amahanga maingi, ago agaasigaireho, naiwe galikunyaga, habw'esagama y'abantu ei waseesire, habw'ebintu ebibi ebi wakozire ensi yoona, ebi wakozire embuga n'abantu boona abakaba barumu.

⁹Alikibona omuntu ogu, anyakutungira eka ye eby'okunyaga, nukwo atunge obusinge, naakora kubi abandi!

¹⁰Okaswaza eka yawe noita abantu baingi; okeehwerekereza wenka.

¹¹Habwokuba ibaale liryamuliza omu kisiika, omurabba ogw'enju gugwanuukule.

¹²Alikibona omuntu ogu anyakwombeka orubuga naaseesa esagama, anyakuruletera okukora ebibi!

¹³Abantu kukorra omurro, n'amahanga kuhendekera ebitaroho, eki kitaruge hali MUKAMA ow'amahe?

¹⁴Habwokuba, amaizi nkooku gaijuza enyanja, n'ensi yoona nukwo erimanyira kimu ekitiinisa kya MUKAMA.

¹⁵Alikibona omuntu ogu anyakutamiiza abataahi be, ataina mbabazi okuhika obu barakatamiira nukwo abarole enjuuro zaabo.

¹⁶Omu kiikaro eky'okunyumizibwa, oligayibwa. Naiwe olinywa otaratale! Ekikopo MUKAMA eki akwasire omu mukono ogw'obulyo, kirikuhikaho, ekitiinisa kyawe kirirugwamu ensoni!

¹⁷Ebintu ebibi ebi wakozire Lebbanoni birikukoraho; oteho n'ebisoro ebi wahwerekeriize, esagama y'abantu aba waisire n'ebintu ebibi ebi wakozire ensi yoona, ebi wakozire embuga n'abantu abaaziikaramuga.

¹⁸Ekisisani, kigira mugaso ki? Kintu buntu ekinyakukozirwe omuntu, omulimo gwakyo nukwo kubiiha ebisuba. Omubumbi wakyo, nikimugasira ki kwesiga ekintu nk'eki? Ngu mucweezi atasobora n'okubaza!

¹⁹Alikibona omuntu ogu anyakugambira ekintu ekyakozirwe omu kiti ati: “Sisiimuka”; anyakugambira ibaale eritagamba ati: “Imuka!” Eki kisobora kwegesa? Ego, kintu ekyasiigirwe ezaabbu n'efeeza, baitu tikiri kyomeezi naakake konka.

²⁰Baitu MUKAMA ahangiriize Omunju ye Erukwera; ensi yoona eculeere omumaiso ge.