Read Runyoro - rutooro Hab 3 Bible Online

Hab 3 - Runyoro - rutooro bible

Hab 3

¹Esaara ya Habbakuuki, nkooku yahandiikirwe Sigiyonosi:

²Ai MUKAMA, nkahurra ebi orukugambwaho n'ebi wakozire, nyowe natiina. Nahati omu kasumi kaitu kanu garuka okole ebyamahano nk'ebi wakoraga; noobu oraaba oina ekiniga, nabwo ganyira.

³Ruhanga akaruga Temani, ogu Arukwera yaruga ha Rusozi Parani. Ekitiinisa kye kyamooma iguru, okuhaisanizibwa kwe kwamaraho ensi.

⁴Akaba naayangasana nk'ekyererezi, amaranga ag'izooba nigamuruga omu ngaro; omu maranga ago, nuho yaserekere obusobozi bwe.

⁵Yayebemberwaga kagingo, akuraatirwa bwango kahumpuli nambere arukuruga, aragira abantu bafe.

⁶Akeemerra yalenga ensi yoona; akanaga eriiso yatengeesa amahanga; ensozi eza ira na ira zararanga, obusozi obwa buli na buli bwadikira.

⁷Nkarora abantu ba Kusani obutiini bubali kubi, nayetegereza aba Midyani nkooku barukutukumira.

⁸Ai MUKAMA, kutemba embaraasi zawe, kutemba ekigaali kyawe eky'obusinguzi, ebisaaru nibyo byakuleetiire obukaya? Nibyo byakukwasize ekiniga nandiki enyanja niyo wabiihiriirwe?

⁹Okaiha obuta bwawe omu nsaho, warambika emisogi ha kaguha. Ensi okagicwamu noogitamu ebisaaru.

¹⁰Ensozi obu zaakuboine ikatengeeta, amaizi agakaba gasandaire gaagera, enyanja yahirra, yaimukya ebigonzi.

¹¹Izooba n'okwezi, biikara omu biikaro byabyo byetantaire emisogi yawe erukumyalikya, beehugwire okwengeengeta kw'icumu lyawe erirukwangasana.

¹²Okacwanganiza ensi obiihiirwe, warubaatirra amahanga okwasirwe ekiniga.

¹³Ekyakutwaire nukwo kujuna abantu bawe nukwo kusahura omuseeswaho magita wawe. Okasasangura omutwe gw'omubi, wamuleka ali busa okuruga ha bibero okuhika ha bikya.

¹⁴Engabwa ey'abarwani be, ayaizire nk'akairiringwa naayenda kuturarangya, asemeriirwe muno nk'abo abanyakubonesa abanaku omu nsita, okamucumisa emango zawe.

¹⁵Enyanja n'amaizi amaingi agakaba nigagera, okabirubaatiriza embaraasi zawe.

¹⁶Ebi byona nkabihurra, okutiina kwayenda kunyita obu nabihuliire, eminwa yatukumira, amagufa ganjunda, natandika kutaratara. Ka nculeere ntegereze ekiro kihike abo hati abarukutuseesira, eki balihikirwaho omuhito.

¹⁷Emiti emitini noobu etalyakya, kandi emizabbibbu noobu etalyana bijuma, emizaituuni noobu erifa, emisiri noobu eriburwamu ebyokulya, entaama noobu irihwerekerra, n'ente ikahwerekerra, ebihongole bikasigara kwonka,

¹⁸nabwo ndisiima MUKAMA, ndikugiza Ruhanga Omujuni wange.

¹⁹MUKAMA Ruhanga, nuwe maani gange; akampa amaguru agarukwanguha nk'ag'engabi. Nuwe andubasa ha nsozi.