Read Runyoro - rutooro Zef 1 Bible Online

Zef 1 - Runyoro - rutooro bible

Zef 1

¹Omu kulema kwa Yosiya mutabani w'Amoni omukama wa Yuda, kinu nikyo ekigambo MUKAMA ekiyagambiire Zefaniya mutabani wa Kusi, mwijukuru wa Gedaliya, mutabani w'Amaziya mwijukuru wa Hezekiya.

²MUKAMA naagamba ati: “Ndihwerekereza ebintu byona mbimale omunsi.”

³Ndihwerekereza abantu n'ebisoro; ndihwerekereza enyonyi ez'omu mwanya, nteho n'encu ez'omu nyanja. MUKAMA naayongera naagamba ati: ndihwerekereza ababi; ndiitira kimu abantu boona mbamale omunsi.

⁴“Ndigorra omukono gwange ndwanise Yuda, ndwanise n'abasi boona aba Yerusaalemu; kandi ndiita abaasigaireho ha bantu abaramya Baali mbamale omu kiikaro kye, nyiheho n'ibara erya banyakatagara abanyakuramya ebisisani;

⁵ndihwerekereza boona abanyakutemba harusu rw'enju bakaramya izooba, okwezi, n'enyunyuuzi; nteho n'abo abanyakundamya bakandahira okuba beesigwa hali nyowe, kandi hanyuma bakarahira ibara ly'omucwezi Mirikoomu.

⁶Ndihwerekereza abo abandugireho abatakyampondera, abatakyanyebinga kandi abatansaba kubeebembera.”

⁷Muculeere omumaiso ga MUKAMA Ruhanga! Habwokuba ekiro kye kiri haihi; MUKAMA ateekaniize ekyonzira kandi ayereze abagenyi be.

⁸Kandi ha kiro eky'ekyonzira kya MUKAMA ndifubira abanyoro n'ababiito, na boona abanyakujwara eby'okujwara eby'abanyamahanga.

⁹Ndifubira abo boona abanyakuramya nk'abakaafiiri, naabo abanyakwiiba kandi abanyakwita, nukwo baijuze enju ya MUKAMA wabo n'ebintu ebi baibire.

¹⁰MUKAMA naagamba ati: “Ha kiro eki, halihulirwa omukungo niguruga ha Irembo ly'Encu, halihulirwa eboroogo neeruga omu kicweka ekyakabiri, kandi halihulirwa ebintu ebirukuruga omu nsozi nibyerunda hansi.

¹¹Inywe enzaarwa eza Morata muborooge habwokuba abasuubuzi boona bahwerekeriire; abo boona abanyakulenga efeeza bafiire.

¹²Omu kasumi ako, ndyekebiija Yerusaalemu nkwasire etaara, kandi ndifubira abantu abanyesiibwe amarwa gaabo abo abarukwegambira ngu: ‘MUKAMA talikora ekirungi, kandi talikora ekibi.’

¹³Ebintu byabo birinyagwa amaju gaabo biriba bitongo noobu balyombeka amaju agandi, tibaligaraaramu; noobu balirima emisiri ey'emizabbibbu, tibalinywa marwa agajungirwemu.”

¹⁴Ekiro kya MUKAMA ekikuru, kiri haihi, kiri haihi kandi nikirahuka muno okuhurra ha kiro kya MUKAMA eki, nikitiinisa, ha kiro eki, omuntu ow'amani alitamu omukungo.

¹⁵Ekiro eki kiriba kiro ky'ekiniga, kiro ky'obujune kandi ky'obusaalizi, kiriba kiro ky'okuhwerekereza n'okumarraho kimu, kiro ky'omwirima n'ekibunda, kiro ky'ebicu n'omwirima kasira.

¹⁶Ha kiro eki, engwara nubwo eriteerwa n'enduuru ey'obulemu obw'okuramagira embuga ezigumire n'eminaara enyakuraihire, nubwo erihulirwa.

¹⁷MUKAMA naagamba ati: Ndireetera abantu omuhito ogutagambwa, nukwo bahumahume nk'abahimbaara, nkooku bansiisiire, hati esagama yabo niija kuseeseka nk'amaizi, emitumbi yabo ejundire ha itaka.

¹⁸Ha kiro eki MUKAMA eki alyolekeraho ekiniga kye, efeeza n'ezaabbu yabo, terisobora kubajuna Ekiniga kye ekirumu ihali ekirukwaka nk'omurro, kirihwerekereza ensi yoona; habwokuba alihwerekerereza kimu abantu boona ab'omunsi yoona, hatali kusiibyaho.