Read Runyoro - rutooro Zef 2 Bible Online

Zef 2 - Runyoro - rutooro bible

Zef 2

¹Iwe ihanga eritaina nsoni, oyegarukemu,

²otakabingirwe okagenda noocuucuuka nk'omusunga oyegarukemu MUKAMA atakakwolekere ekiniga kye ekibi ekiro kye eky'obukaaya kitakakuhikireho.

³Inywe abantu abarukwebundaaza abanyakuli omunsi enu, abanyakukwata ebiragiro bye, muserre MUKAMA; muserre obuhikiriire, mwebundaaze; rundi obu, ha kiro MUKAMA eki alyolekeraho ekiniga, nubwo mulitabuka ekifubiro.

⁴Busaho muntu n'omu alisigara omu rubuga Gaza, Asikeloni erifooka kitongo; abantu b'Asidoodi balibingwa nyamusana tuku na Ekuroni esindurwe.

⁵Inywe abasi aba ha mukungu, inywe ihanga ery'Abakeresi, mulikibona! Iwe ensi ey'Abafirisiti, kinu nikyo ekigambo MUKAMA eki arukugambaho ati: ndikuhwerekereza, tihalisigaraho muntu noomu.

⁶Iwe ensi eyaha mukungu, olifooka maliisizo, kandi buhuumuro bw'abaliisa, kandi rugo rw'amagana g'embuzi.

⁷Ensi eya ha mukungu eritungwa ab'enju ya Yuda abaasigaireho ensi egi niyo baraaliisizaahoga, kandi omu ihangwe, omu maju g'Asikelooni nuho baraahuumurraga. Habwokuba MUKAMA Ruhanga wabo alibaijuka abagarurre itungo lyabo.

⁸MUKAMA Rutakirwa naagamba ati: “Mpuliire abantu ba Mowabbu n'Abamooni nibajuma kandi nibasaaliza abantu bange, nibeehaisa ngu nibaija kuhamba ensi yabo.

⁹MUKAMA Ruhanga ow'Amahe nikyo arukugambira ati Mazimakwo, nyowe Ruhanga omwomeezi owa Isirairi,” ndahiire “Mowabbu n'Amooni zirihwerekerra nka Sodomu na Gomora, ziriba nsi enyakumezirwe akamya k'engeye n'amaziba g'ekisura, kandi ziriba kitongo ebiro byona. Abantu bange abaliba basigaireho balibanyaga, kandi abaliba basigaireho ha ihanga lyange balibatunga.”

¹⁰Habw'okugaya n'okwenyumirizaaho abantu ba MUKAMA ow'amahe, eki nikyo balisasurwa,

¹¹MUKAMA alibafookera kabi; abacwezi boona ab'omunsi, alibaisa enjara amahanga goona ag'ensi galimwinamira buli ihanga niriramiza owalyo.

¹²Na inywe ab'Esopiya, muliitwa empirima yange.

¹³MUKAMA aligorra omukono gwe agwolekeze ha rubaju rw'amatemba ahwerekereze Asiriya; orubuga Nineve alirufoora kitongo, ihamba eryomere nk'irungu.

¹⁴Hagati yarwo amagana nuho garabyamaga, enyamaiswa zoona ez'omu kisaka, amasega n'enyamunungu, biraaraaraga ha mitwe y'enyomyo zarwo; ensindizi ziraagambiraga omu madirisa, ebingoora bigambirege ha mulyango; emiti emikogoto eyekaba eyombekesiibwe amaju garwo, erisuukurwa.

¹⁵Orubuga oru orwayemanyaga muno obusobozi orwateekerezaaga ruti: “Ninyowe ndoho nyenka, busaho rubuga rundi.” Murole nkooku rufookere kitongo, engoonyo ey'ebisoro eby'omu iswa! Weena arukururabaho, naarwekanga naayehinya.