Read Runyoro - rutooro Zef 3 Bible Online

Zef 3 - Runyoro - rutooro bible

Zef 3

¹Rulikibona orubuga oru orwereme kandi orwasiisikaire, orubuga oru orunyakubonabonesa abantu barwo bonyini.

²Tiruhuliriza muntu n'omu, tirwikiriza kugororwa. Tirwesiga tirwirra haihi MUKAMA Ruhanga warwo.

³Abanyoro baarwo abanyakumwikaramu nizo entale emboiboisi, abacwi barwo ab'emisango, niyo emyaga ey'orwebagyo eyahinguraine omukoijo etasobora kuleka igufa likaikaraho kuhika nyenkya.

⁴Abarangi barwo ngaraasi, bantu abatarukwesigwa; banyakatagara barwo basiisa ebintu ebirukwera, bakora ebirukucwa ebiragiro.

⁵MUKAMA anyakurwikaramu muhikiriire takora kibi nakimu; buli kiro ayoleka obwinganiza bwe, emamba obu eba neesara, taburaho; baitu nabwo, abantu ababi ab'omu rubuga oru, tibakwatwa nsoni, bongera kukora ebibi.

⁶MUKAMA naagamba ati: “Nkasiiriiza amahanga eminaara yago bikambuuro bisa; amakuute gaayo nkagafoora bitongo tiharoho muntu n'omu arabamu; embuga zaabo ikafooka mahamba, tiharumu muntu, tiharukuzookamu omusi wamwo.

⁷Nkateekereza nti: ‘Mazimakwo orubuga runu nirwija kuntiina ruraikiriza kugororwa; tirurukwija kwehwisa’ ebi byona ebi nduragiire. Baitu kandi, abantu bakagonza kusiisira kimu.”

⁸MUKAMA naagamba ati: “Mundinde,” mutegereze ekiro eki ndiiziraho kucwera amahanga emisango. Habwokuba, mmaliriire kusorooza amahanga, kuteeraniza abakama, mbeemarreho ekiniga, ekiniga kyange kyona kibahwereho; omu kiniga kyange ekirukwaka nk'omurro ekitabwirwemu ihali, nikyo kirihwerekereza ensi yoona.

⁹Ego, omu kasumi ako, ndihingisa embaza y'abantu mbahe embaza enungi, nukwo boona beesengerezeege nyowe nyenka, baleke kwesengereza abacweeza. Boona nukwo baamirre MUKAMA, bamuheereze n'omutima gumu.

¹⁰Okuruga obuseeri bw'ebisaaru by'Esopiya, abantu bange abanyesengereza abaararangiire, balindeetera ekihongwa.

¹¹“Ha kiro eki, timuliswazibwa, habw'ebintu ebibi ebi mwakozire, ebyabaleeteriize kunjeemera; habwokuba obu, ndibaihamu abantu banyu abanyakwenyumiza, timulyongera kwekuliriza ha rusozi rwange orurukwera.

¹²Ndirekamu abo abarukwebundaaza kandi abaculeezi, abaranyebingaga nibenda mbakoonyere.

¹³Kandi abo abalisigara omu Isirairi, tibalikora kibi, tibalibaza bisuba, kandi tibalicwangya. Habwokuba baraaliisaaga amagana gaabu, babyame, tihalibaho muntu n'omu alibatiinisa.”.

¹⁴Inywe abantu ba Siyoni, muzine muno muhulirwe, Iwe Isirairi oteere obwogo! Inywe abantu ba Yerusaalemu, mukyanganuke kandi musemererwe n'omutima gwanyu gwona!

¹⁵MUKAMA omusango agubaihireho, abanyanzigwa banyu ababingire. Omukama MUKAMA wa Isirairi ali na inywe, hati tihakyaroho ekirukubatiinisa.

¹⁶Ha kiro eki, Yerusaalemu erigambirwa eti: “Siyoni leka kutiina; emikono yawe ereke kuteba.

¹⁷MUKAMA Ruhanga wawe, MUKAMA Ruhanga wawe ali na iwe, nuwe omurwani omusinguzi naija kukusiima, kandi habw'engonzi ze, araakuha obwomeezi obuhyaka; naija kukusemerererwa naazina muno”

¹⁸nkooku bazina ha kiro kikuru naagamba ati: “Ndikwihaho akabi, nukwo oleke kujunaanwa boona abaakubonaboneseze.

¹⁹Obu nubwo ndijuna abalema, nsorooze abaanagirwe aheeru ensoni zaabo nzifoole kuhaisanizibwa kandi nzibaihiremu ekitiinisa omunsi yoona.

²⁰Omu kasumi ako obu ndimara kubasorooza hamu, nubwo ndibagarra omuka owanyu, obu ndibagarurra itungo lyanyu nimurora muti nubwo ndibaleetera ekitiinisa n'okuhaisanizibwa omu mahanga goona ag'ensi.”