Read Runyoro - rutooro Hag 1 Bible Online

Hag 1 - Runyoro - rutooro bible

Hag 1

¹Omu mwaka ogwa kabiri ogwa Daliyo omukama ha kiro eky'okubanza eky'okwezi kwa mukaaga, MUKAMA naaraba omuli Haggai, akagambira Zerubbabbeeri mutabani wa Seyalityeri omulemi omukuru wa Yuda, na Yoswa mutabani wa Yehozadaaki Nyakatagara Omukuru ati,

²“MUKAMA ow'amahe naagamba ati: Abantu banu nibagamba bati, akasumi ak'okwombeka buhyaka enju ya MUKAMA tikakahikire.”

³MUKAMA nubwo yakaguliize omuli Haggai omurangi ati,

⁴“Akasumi kanyu ak'okuraara omu maju ganyu ag'embaho, kandi kunu enju enu kikambuuro, nuko kahikire?

⁵Hati nu, MUKAMA ow'amahe naagamba ati: Muteekereze nkooku mutaaha.

⁶Mukasiga bingi, baitu mukagesa bike; mulya baitu timukaigutaga; munywa baitu timukahaagukaga; mujwara baitu busaho n'omu atagata; kandi anyakutunga empeera, agitunga neerabamu, nk'agitaire mu nsaho enyakurumu ebihuru, enyakudubukire.

⁷“MUKAMA ow'amahe naagamba ati: muteekereze nkooku mutaaha.

⁸Mutembe ensozi mutemeyo emiti, mwombeke buhyaka enju enu; nubwo nsemererwe kandi ndamibwe nkooku nsemeriire kuramibwa.

⁹“Mukaserra ebingi, baitu hakazooka akake; kandi ako obu mwakataahize omuka, nakahuuhuura. MUKAMA ow'amahe naakaguza ati, kiki ekyankoleze eki? Habw'enju yange kuba kikambuuro, kunu inywe, buli omu naayekorra eye.

¹⁰Enjura nikyo eremiire kugwa; kandi busaho kantu akasobora kumera.

¹¹Njwisize ekyanda omunsi, hansozi, ha ngano, ha misiri y'emizabbibbu, ha ngonjo ez'emiti y'Oliva, ha buli kimera ekituruka omu itaka, ha bantu na ha bisoro, ha buli kintu murukulengaho kubyara.”

¹²Zerubbabbeeri mutabani wa Seyalityeri, Yoswa mutabani wa Yehozadaaki Nyakatagara Omukuru, n'abantu abandi boona, nukwo kuhurra MUKAMA Ruhanga wabo, baahurra n'ebigambo bya Haggai omurangi, MUKAMA Ruhanga wabo nkooku yamutumire; abantu nubwo baatiina MUKAMA.

¹³Hanyuma, Haggai omukwenda wa MUKAMA akagambira abantu MUKAMA ebi yamutumire ati, MUKAMA naagamba ati, “Ndaabaga na inywe.”

¹⁴MUKAMA akatamu omwoyo Zerubbabbeeri mutabani wa Seyalityeri omulemi omukuru owa Yuda, Yoswa mutabani wa Yehozadaaki Nyakatagara Omukuru, n'abantu abandi boona;

¹⁵Ha kiro eky'amakumi abiri na bbina eky'okwezi kwa mukaaga, baija baakora ha nju ya MUKAMA Ruhanga wabo.