Read Runyoro - rutooro Hag 2 Bible Online

Hag 2 - Runyoro - rutooro bible

Hag 2

¹Omu mwaka ogwa kabiri omu kulema kw'omukama Daliyo, hakiro eky'amakumi abiri na kimu omu kwezi kwa musanju, MUKAMA akaragira Haggai omurangi ati:

²kaguza Zerubbabbeeri mutabani wa Seyalityeri omulemi omukuru owa Yuda oti;

³n'oha omuli inywe, ayasigaireho, ayaboine enju enu, kara nkooku ekaba ina ekitiinisa? Hati, nimugirora muta? Terukubazookera nk'ekintu ekitaroho?

⁴MUKAMA naagamba ati: nabwo, iwe Zerubbabbeeri, otaterebuka, na iwe Yona mutabani wa Yehozadaaki Nyakatagara Omukuru, otaterebuka; MUKAMA ow'amahe naagamba ati, mukole, habwokuba ndi na inywe,

⁵obu mwarugaga Misiri, nkabanihiza nti, ndaikaraga na inywe butoosa. Nkyali nainywe, habweki muleke kutiina. Mwoyo aikara nainywe.

⁶MUKAMA ow'amahe naagamba ati: Habwakasumi nditengeesa iguru n'ensi n'enyanja n'ensi eyomere;

⁷kandi nditengeesa amahanga goona, nukwo obuguuda bwago bwona bwije, ndiijuza enju enu ekitiinisa.

⁸MUKAMA naagamba ati, efeeza yange, zaabbu nayo yange.

⁹MUKAMA ow'amahe naagamba ati, ekitiinisa ky'enju enu eky'enyuma, nikiijakukira ekya ira, kandi MUKAMA naagamba ati, omu kiikaro kinu, ndaagabiramuga obusinge.

¹⁰Omu mwaka ogwa kabiri omu businge bwa Daliyo, ha kiro eky'abiri na bbina eby'okwezi kwa mwenda, MUKAMA akaragira Haggai omurangi ati,

¹¹“MUKAMA ow'amahe naagamba ati: Kaguza banyakatagara, bagarukemu ekikaguzo kinu,

¹²‘omuntu kakuba atwarra enyama erukwera omu igema ery'eky'okujwara kye, igema eri akalikwasa ha mugaati, ha kiguude, ha viini, ha magita, rundi habyokulya ebindi, ekintu eki kifooka kirukwera?’ ”

¹³Haggai nubwo yakagwize ati, “Omuntu arukuzirwa habw'okukwataho omutumbi, kakuba akwataho ekimu ha bintu ebi, buli nakyo kyazirwa?” Baanyakatagara baagarukamu bati, “Ego, nakyo buli nikizirwa.”

¹⁴Haggai yagamba ati, MUKAMA naagamba ati: “Nukwo kiri na ha bantu abo, n'ihanga eri erinyakundi omumaiso; na buli mulimo gwona ogu barukukora; n'ekibahongayo nikizirwa.

¹⁵Hati nu, mbesengeriize, okuruga ha kiro kinu n'okweyongera omumaiso, muteekereze ebiribaho. Obu mukaba mutakatandikire okwombeka buhyaka Enju ya MUKAMA,

¹⁶mwagendaga ha muswa gw'engano nimunihira kusangayo ebigega amakumi abiri, baitu haabayoga ikumi byonka. Mwagendaga ha bwato bwe viini kutahaho eminaga amakumi ataano mwasangayoga makumi abiri yonka.

¹⁷Nkabirwaza kara, nabireetera kujajuka, kuhumba n'okuteerwa orubaale; baitu nabwo mutangarukire.

¹⁸Kiro kinu nikyo kiro eky'amakumi abiri na bbina eky'okwezi kwa mwenda, ekiro omusingi ogw'Enju ya MUKAMA eki gwahweriireho, okuruga hati n'okweyongera omumaiso, mwetegereze ebirukwija kubaho.

¹⁹Engano noobu eriba yahoire, emizabbibbu, emitini, emikomamahanga n'emizaituuni etakyayana, okuruga hati n'okweyongera omumaiso, mmaliriire kubaha omugisa.”

²⁰Ha kiro eky'amakumi abiri na bbina eby'okwezi oku kwonyini, akongera yaragira Haggai ekigambo kinu ati,

²¹“gambira Zerubbabbeeri omulemi omukuru owa Yuda oti, ndi haihi kutengeesa iguru n'ensi,

²²mmaleho abakama, mpwerekereze abakama ab'amahanga. Embaraasi n'abatembi baazo, baligwa bafe; buli omu ayitwe empirima ya mugenzi we.

²³MUKAMA ow'amahe naagamba ati, iwe Zerubbabbeeri mwiru wange, mutabani wa Seyalityeri, hakiro eki ndikutwara nkufoole nk'empeta ey'emanyikirizo; habwokuba nkukomere.”