Read Runyoro - rutooro Zek 11 Bible Online

Zek 11 - Runyoro - rutooro bible

Zek 11

¹Lebbanoni okingule enyigi zawe omurro nukwo gusiiriize emikogoto yawe!

²Iwe omusambya, oteere empamo, habwokuba omukogoto gugwire, habwokuba emiti emirungi eralikirwe. Muteere omukungo inywe emitete ya Basani, habwokuba ekibira ekikooto kitemerwe!

³Hurra abaliisa nkooku batairemu ekyoboobo, habwokuba ekitiinisa kyabo kihoireho! Hurra entale nkooku zirukububura, habwokuba ekibira kya Yorudaani kihoireho!

⁴MUKAMA Ruhanga wange akangambira ati: “Obe muliisa w'entaama ezirukwija kwitwa.

⁵Abo abanyakuzigura, baziita, beegendera batafubiirwe; kandi abanyakuziguza, bagamba bati, ‘MUKAMA asiimwe, nyowe natunga’; bakama baazo boonyini, tibarukwigirra mbabazi

⁶MUKAMA naagamba ati, tindigaruka kuganyira abasi b'ensi enu. Buli muntu ndimuleka alemwe omuliisa we n'omukama we; abaliisa n'abakama abo, balicanza ensi baitu tihalibaho muntu n'omu ou ndijuna nkamubaihaho.”

⁷Habweki nafooka muliisa w'igana erikaba liri ly'okwitwa nindiisiza abo abaaguraga kandi abaaguzaaga entaama. Nakwata emiigo ebiri; ogumu naguruka ibara Mbabazi ogundi nagweta Obumu. Naliisa entaama.

⁸Omu kwezi kumu abaliisa bali abasatu nkabahwerekereza. Baitu natandika kunoba entaama, nazo zantamwa nkooku nainobere.

⁹Hanyuma nagambira entaama nti, “Tinkyayongera kubaliisa, entaama ezirukwenda kufa, ka zife; ezirukwenda kuhwerekerra, ka zihwerekerre; kandi ezi eziraasigaraho ka ziryangane!”

¹⁰Nubwo nakwasire omwigo gwange ogurukwetwa “Mbabazi” nagucwamu habiri nukwo ncwe endagaano ei nkaba nkozire n'amahanga goona.

¹¹Ha kiro eki endagaano eki yacweriirweho abasuubuzi abakaba bandoleriire, nubwo baayetegeriize, eki nkooku kiri kigambo kya MUKAMA.

¹²Nubwo nabagambiire nti, “Obu muraaba nimukisiima, munsasule empeera yange, obu muraaba mutarukussima, mwerekere.” Baabalirra empeera yange, yahika ebicweka by'efeeza amakumi asatu.

¹³Hanyuma MUKAMA yandagira ati, “Empeera yawe egi, omuhendo ogunyakusemeriire MUKAMA ogu bansaswire, ogite omu lyahurro.” Aho nakwata ebicweka by'efeeza ebi amakumi asatu, naita omu lyahurro omunju ya MUKAMA.

¹⁴Hanyuma nacwa omwigo gwange ogwa kabiri ogurukwetwa “Obumu” ndibye obuzaale bwa Yuda na Isirairi.

¹⁵MUKAMA akongera yandagira ati. “Garuka oyefoole muliisa, lero hati, oyefoole muliisa entagasa.

¹⁶Habwokuba ninyija kuta omuliisa omunsi, ow'atalita mutima ha ntaama ezirukuhwerekerra, ow'ataliserra ezirukujeerajeera, ow'atalirwaza ezinyakuhutaire, kandi ow'ataliriisa enyomeezi, baitu owalirya enyama y'ezi ezinyakugomokere, ateho n'okuziiha enkangaasi.

¹⁷Alikibona omuliisa wange ogu entagasa anyakusiga igana akagenda! Empirima neekamuteme omukono n'eriiso ery'obulyo! Omukono gwe nigukakarambarre kimu, eriiso lye ery'obulyo nirikaigarre kimu!”