Read Runyoro - rutooro Zek 12 Bible Online

Zek 12 - Runyoro - rutooro bible

Zek 12

¹Binu nibyo ebigambo ebyagambirwe MUKAMA, MUKAMA ayayanjurwire iguru, ayahangire ensi kandi ayahaire abantu obwomeezi, naagamba ati,

²“Yerusaalemu ndigifoora kikopo ky'amarwa; amahanga agagiherraine, galinywa gataratale nk'abatamiizi. Kandi obu baligota Yerusaalemu, embuga za Yuda eziriba zisigaireho, nazo zirigotwa.

³Akasumi ako obu kalihika, Yerusaalemu ndirufoora ibale erirukulemerra amahanga goona; boona abalirengaho kulihimba, balisaasa muno. Kandi amahanga goona ag'ensi, galyekoba garurwanise.

⁴MUKAMA naagamba ati nditiinisa buli mbaraasi yoona, omutembi wayo mmunage iraro. Baitu obu ndita amaiso ha mbaraasi ez'amahanga goona ndirolerra enju ya Yuda.

⁵Enganda za Yuda, nubwo zirigamba ziti, ‘MUKAMA ow'amahe Ruhanga ow'abasi ba Yerusaalemu, nuwe abaha amaani.’

⁶“Omu kasumi ako, enganda za Yuda ndizifoora nk'omurro ogurukwakira omu kibira, rundi omu musiri gw'engano enyakwezire; zirihwerekereza amahanga goona agaziherraine. Abantu ba Yerusaalemu, baliikara n'obusinge omu rubuga rwabo.

⁷“Obusinguzi, MUKAMA alibanza kubuha Yuda, nukwo kireke kukirwa ekya Yuda.

⁸Ha kiro eki, MUKAMA alirinda abo abaliba bali Yerusaalemu, kandi noobwakubaire abarukukirra kimu obuceke omuli bo, baliba b'amaani, nka Daudi oku akaba ali, kandi enju ya Daudi, erisisana nk'enyakwemeriirweho Ruhanga, nk'enyakwemeriirweho malaika wa MUKAMA.

⁹Ha kiro eki, ndyehwamu mpwerekereze amahanga goona aganyakuseesira Yerusaalemu.

¹⁰ “Enju ya Daudi n'abasi ba Yerusaalemu, ndibatamu omwoyo ogw'embabazi n'ogw'okwesengereza, obu baraaroraga omuntu ou bacumisire, baraamulirirraga, nkomuntu ayazaire omwana omu wenka nkooku amulirirra, omuntu nkooku aterra ekyoboobo omwana we omuzigaijo.

¹¹Ha kiro eki, empamo eziriba Yerusaalemu, ziriingana ezi baateeriire Hadadi-rimooni, omu kyeya kya Megido.

¹²Ensi yoona eritamu ekyoboobo, buli ruganda rwonka, oruganda orw'enju ya Daudi rwonka; abakazi abaswerwa bonka; oruganda orw'enju ya Nasani rwonka;

¹³oruganda orw'enju ya Levi rwonka, n'abakazi baabo bonka; oruganda orw'enju ya Simeyi rwonka, n'abakazi baabo bonka;

¹⁴n'enganda zoona ezindi ezisigaireho nukwo ziti, buli ruganda rwonka, n'abakazi baabo bonka.