Read Runyoro - rutooro Zek 13 Bible Online

Zek 13 - Runyoro - rutooro bible

Zek 13

¹“Ekiro eki obu kirihika, enju ya Daudi n'abasi ba Yerusaalemu, baliigulirwa ensoro y'amaizi, eboogyeho ekibi n'obubi bwabo.

²“MUKAMA ow'amahe kandi naagamba ati, ekiro eki obukirihika, ndidibiza kimu amabara g'abacwezi, ngamale omunsi, nukwo baleke kugaruka kwijukwa; ndiihaho wena arukweyeta murangi, mmaleho abo abaina omwoyo ogw'okuramya abacwezi.

³Kandi obuhalizooka omuntu arukwongera kuranga, ise na nyina balimugambira bati, osemeriire kwitwa, habwokuba noobaza ekigambo kya MUKAMA, kandi kunu noobiiha ebisuba. Obu alihambiriza akongera kuranga, ise na nyina balimucumita bamwite.

⁴Ha kiro eki, buli murangi weena ow'aliranga, eki yayolekerwe eki aliba naaranga, kirimukwasa ensoni; talijwara kijwaro eky'ebyoya nukwo abiihe ebisuba,

⁵baitu aligamba ati, ‘Tindi murangi, ndi mulimi, habwokuba okuruga omu buto bwange, itaka niryo lyabaire itungo lyange.’

⁶Kandi obu halibaho omuntu arukumukaguza ati, ‘Kiki ekyakuhutaize omugongo?’ Aligarukamu ati, ‘Nkahutarra omunju ya banywani bange.’ ”

⁷MUKAMA ow'amahe naagamba ati, “Iwe mpirima, imuka orwanise omuliisa wange, orwanise omusaija anyakunyemeriire haihi.” Teera omuliisa, entaama nukwo irarange; nyowe ndikwataho amaruusi.

⁸MUKAMA naagamba ati, omunsi yoona, haraafaamu bibiri bya kasatu eby'abantu baayo, kimu kya kasatu, nubo baraasigaraho.

⁹Kandi kimu kya kasatu eki, ndikita omu murro, mbaseengiije omuntu nkooku asengiija efeeza, mbeetegereze nk'ezaabbu oku eyetegerezibwa, nubwo balinsaba, mbahe eki barukusaba. Ndibagambira nti muli bantu bange, kandi nabo baligamba bati, oli Ruhanga waitu.