Read Runyoro - rutooro Zek 14 Bible Online

Zek 14 - Runyoro - rutooro bible

Zek 14

¹Ekiro kya MUKAMA kiri haihi, obu kirihika, ebi wanyagirwe, biribaganwa nimurora muti.

²MUKAMA alisorooza amahanga goona garwanise Yerusaalemu. Orubuga rulikwatwa, amaju galinyagwa, kandi abakazi balihambwa, ha bantu abaliba omu rubuga, ekicweka kirizaahisibwa, baitu abalisigaraho, tibaliihwa omu rubuga.

³MUKAMA nubwo alituruka, arwanise amahanga ago, nkooku yarwaine omu busumi obwahingwire

⁴Ha kiro eki alyemerra ha rusozi orw'emiti emizaituuni orunyakuli omumaiso ga Yerusaalemu, ha rubaju orwa Burugaizooba; kandi orusozi rw'Emizaituuni oru, rulyatika habiri, okuruga Burugaizooba okugarukira Bugwaizooba habeho ekihanga ekigalihire muno; ekicweka ekimu eky'orusozi, kigende omu mambuka, ekicweka ekindi kigende omu masirimuka.

⁵Ekihanga eky'ensozi zange kiriigara habwokuba ekihanga eky'omu nsozi, kirikwataho orubaju rwakyo, mwiruke nkooku mwairukire omusisa, omu biro bya Huziya omukama wa Yuda. Hanyuma MUKAMA Ruhanga wanyu nubwo aliija, hamu n'abahikiriire be boona.

⁶Ekiro eki obu kirihika, tihaligaruka kubaho embeho, noobu bwakuba obutiti,

⁷Kandi obwire tibuligaruka kwira, nobwakubaire omu kasumi ak'ekiro, haraajwaga omusana. Akasumi ako, ha kalibeeraho, kamanyirwe MUKAMA wenka.

⁸Ekiro eki obukirihika, amaizi amarungi galiruga Yerusaalemu, ekicweka kyago kirigenda omu nyanja eya Burugaizooba, ekicweka ekindi omu ya Bugwaizooba, galiikara nigagera omu kasumi ak'ekyanda n'aky'irumbi.

⁹Obu, MUKAMA aliba mukama ow'ensi yoona; ha kiro eki, aliba omu, n'ibara lye liriba limu.

¹⁰Okuruga Geba okugarukira Rrimoni amasirimuka ga Yerusaalemu, ensi yoona erifooka kyeya. Baitu okuruga ha irembo erya Benyamiini okugarukira hakiikaro eky'irembo erikuru, okugarukira ha irembo ery'omu kasonda, n'okuruga ha munaara gwa Hananeeri okugarukira handeeba ezijungirwaho amarwa g'omukama, Yerusaalemu ruliikara ruli haiguru omu kibanja kyarwo.

¹¹Ruliikarwamu abantu, habwokuba haliba hatakyaroho mukyeno; ruliikara rugwagwaine.

¹²Kanu nuko akabi, MUKAMA akaalireetera amahanga goona agalirwanisa Yerusaalemu: abantu balijunda bakyali boomeezi; amaiso galibajundira omunteeko yago, n'endimi ziribajundira omu kanwa.

¹³Ha kiro eki, MUKAMA alibatiinisa muno; buli muntu akwate omutaahiwe omukono, bateerangane;

¹⁴nobwakubaire Yuda, erirwanisa Yerusaalemu. Obuguuda obw'amahanga goona agaherraine bulisoroozebwa, ezaabbu, efeeza n'eby'okujwara omu bwingi.

¹⁵Akabi nkaako, kalihikaho embaraasi, enyumbu, engamiya, endogoyi na ha buli kisoro kyoona ekirisangwa omu nsiisira ezi.

¹⁶Okuruga obu, buli ihanga ha mahanga goona agaasigaireho agaaseesiire Yerusaalemu, buli mwaka liraagendaga Yerusaalemu okuramya MUKAMA Ruhanga ow'amahe, n'okusemeza ekiro kikuru eky'ensiisira.

¹⁷Ha mahanga goona ag'ensi obu halibaho ihanga eriryanga kugenda Yerusaalemu kuramya MUKAMA Ruhanga ow'amahe, ihanga eri omunsi yalyo tihaligwamu njura.

¹⁸Abanyamisiri obu balyanga kugyayo baligwerwa akabi MUKAMA akaalireetera amahanga goona agalyanga kusemeza ekiro kikuru eky'ensiisira.

¹⁹Eki nikyo ekifubiro Misiri n'amahanga goona agalyanga kugenda kusemeza ekiro kikuru eky'ensiisira eki galitunga.

²⁰Ha kiro eki, amajugo g'embaraasi galihandiikwaho ebigambo binu “Ekirukwera kya MUKAMA.” Kandi ebinaga eby'omunju ya MUKAMA, birisisana nk'ebbakuli ez'omumaiso g'itambiro;

²¹buli kinaga kyona eky'omu rubuga Yerusaalemu na Yuda, kiriba kintu kirukwera kya MUKAMA ow'amahe, boona abaraabaga nibatamba ebyonzira, baraijaga babitwale babicumbiremu enyama ey'ekyonzira. Ekiro eki obu kirihika, abasuubuzi tibaligaruka kurangisibwa Omunju ya MUKAMA ow'amahe.