Read Runyoro - rutooro Zek 2 Bible Online

Zek 2 - Runyoro - rutooro bible

Zek 2

¹Obu naimukize amaiso narora omusaija akwasire omuguha ogw'okulengesa.

²Namukaguza nti, “Nogya ha?” Yangarukamu ati, “Ningenda kulenga Yerusaalemu, nyetegereze obugazi bwayo.”

³Narora malaika ogu ow'akaba naabaza na nyowe nairra haihi, haija na malaika ondi kumwitirana.

⁴Malaika ow'akaba naabaza na nyowe obu akaba akyayemeriire, malaika ondi yaija kumwitirana yamugambira ati, “Iruka ogambire omusigazi oli oti, ‘omu rubuga Yerusaalemu nkooku harukwija kubamu abantu baingi muno n'ente, nirwija kwikara rutazitiriirwe.

⁵MUKAMA naagamba ati, ninyowe ndiba kisiika eky'omurro ekirukurwehinguliriza, kandi ndiba kitiinisa omunda yarwo.’”

⁶MUKAMA naagamba ati, Ee! Ee! Mwiruke muruge omunsi ey'omu matemba; nkabararangya omu nkiro zoona.

⁷Inywe abanyakwikara n'abantu ba Bbabbulooni, mwirukire Siyoni.

⁸Habwokuba MUKAMA ow'amahe naagamba ati, habw'ekitiinisa kye, nikyo yantumiire omu mahanga agaabanyagire, habwokuba omuntu anyakubakwataho, buli amukwasire emboni y'eriiso.

⁹Hati nu, ninyija kubakwataho, banyagwe abo ababaaheerezaaga nubwo muraamanya MUKAMA ow'amahe nkooku yantumire.

¹⁰Muzine kandi mukyanganuke, inywe abantu ba Siyoni; habwokuba ninyija kwikara na inywe.

¹¹Omu kasumi ako, amahanga maingi galigarukira MUKAMA gafooke bantu be. Aliikara na inywe nubwo mulimanya nkooku yabantumireho.

¹²Yuda erigaruka ebe kintu kya MUKAMA eky'omuhendo omunsi ye erukwera, kandi Yerusaalemu ruliba rubuga oru aligonza kukirra kimu ezindi.

¹³Abantu inywena muculeere omumaiso ga MUKAMA habwokuba aimukire yaruga omu kiikaro kye ekirukwera.