Read Runyoro - rutooro Zek 4 Bible Online

Zek 4 - Runyoro - rutooro bible

Zek 4

¹Malaika ow'akaba naabaza na nyowe, yagaruka yansisiimura, nk'arukusisiimura omuntu anyakugwijagiire.

²Yankaguza ati, “Noorora ki?” Namugarukamu nti, “Nindora ekikondo ky'etaara, kiri kya zaabbu, ha mutwe gwakyo, haroho ebbakuli y'etaara musanju, buli taara, haroho obuhuru musanju.

³Haihi nakyo, haroho emiti emizaituuni ebiri, ogumu guli ha mukono ogw'obulyo nambere hali ebbakuli, ogundi guli ha bumoso.”

⁴Nubwo nakagwize malaika ow'akaba naabaza na nyowe nti, “Waitu ebi nibimanyisa ki?”

⁵Malaika yangarukamu ati, “Tomanyire ebintu ebi eki birukumanyisa?” Namugarukamu nti, “Nangwa taata, tinkimanyire.”

⁶Malaika yandagira kugambira Zerubbabberi ebigambo binu ebi yatumirwe MUKAMA: “Olitunga omugisa tihali habw'ihe ery'amaani rundi habw'amaani agawe wenka, baitu habwa Mwoyo wange.

⁷Ebintu ebigumire ebikooto nk'ensozi, birikuruga omumaiso. Olyombeka Enju ya MUKAMA. Kandi obu oliba noogitaho ibaale ery'okumalirra, abantu balitoka bati: ‘Esemiire Esemiire!’”

⁸MUKAMA akagaruka yandagira ekigambo ekindi naagamba ati,

⁹“Zerubbabbeeri nuwe yatandikire omusingi gw'enju enu; kandi nuwe aligimara. Nubwo mulimanya MUKAMA ow'amahe nkooku yabatumireho.

¹⁰Habwokuba weena ayagayire ekiro ekyakoliirweho ebintu ebike bike alisemererwa muno, kandi alirora Zerubbabberi akwasire ebbirigi. “Ago nugo maiso ga MUKAMA musanju aganyakurora ensi yoona.”

¹¹Hanyuma namukaguza nti, “Emiti ebiri emizaituuni enu ha mukono ogw'obulyo n'ogw'emoso, neemanyisa ki?”

¹²Nayongera namukaguza nti, “Kandi amataagi abiri ganu ag'emizaituuni, aganyakuli haihi n'enseke ibiri eza zaabbu ezirukuseesa amagita nigamanyisa ki?”

¹³Yankaguza ati, “Tomanyire amakuru gaago?” Namugarukamu nti, “Nangwa Taata tingamanyire.”

¹⁴Nukwo kungambira ati: “Ago nigamanyisa ababiri abaaseesirrweho amagita, abanyakwemeera haihi na MUKAMA ow'Ensi yoona.”