Read Runyoro - rutooro Zek 5 Bible Online

Zek 5 - Runyoro - rutooro bible

Zek 5

¹Nagaruka naimukya amaiso, narora omuzingo gw'empapura niguhurruka omu mwanya!

²Malaika yankaguza ati, “Noorora ki?” Namugarukamu, nti, “Nindora omuzingo gw'empapura; obura bwagwo ebigere amakumi asatu, obugazi ikumi na bitaano.”

³Ha muzingo ogu, “hahandiikirweho omukyeeno ogw'okwizira Ensi yoona. Ha rubaju rwagwo orumu, nihagamba ngu, omusuma weena, naija kubingwa omunsi; kandi ha rubaju orundi, nihagamba ngu, arukurahirra busa, na uwe w'okubingwa.

⁴MUKAMA ow'amahe naagamba ati, omukyeno ogu ninyija kugutweka, gutaahe omunju y'omusuma, n'omunju y'ogu anyakurahirra busa ibara lyange; gugiikalemu gugihwerekereze, gumaleho embaaho n'amabaale.”

⁵Malaika ogu ayabazaga na nyowe, nubwo yanyiriire haihi yangambira ati, “Imukya amaiso orole ekintu eki ekirukugenda.”

⁶Namukaguza nti, “Baitu kyo kiki?” Yangarukamu ati, “Eki kigega, nikimanyisa ebibi eby'ensi yoona.”

⁷Ekigega eki, kikaba kiina omuhiiha ogw'isasi, obu nkaba nkyaroleriire, ekigega kyafundukurwa, kwija kurora haikaliiremu omukazi!

⁸Malaika yangambira ati, “Omukazi ogu naamanyisa obubi.” Yamusindika hansi omu kigega, yakigarraho omuhiiha.

⁹Naimukya amaiso, narora abakazi babiri baina amapapa makooto nk'ag'ekiidongodongo nibanyiriirra. Baahimba ekigega baahurruka baakitwara.

¹⁰Nubwo nakagwize malaika nti, “Ekigega nibakitwara nkaha?” Yangarukamu ati,

¹¹“Nibakitwara Sinara, nuho bakyombekere enju; enju obu erihwa, ekigega eki, bakitahyeemu, nuho kiikale nikiramizibwa.”