Read Runyoro - rutooro Zek 6 Bible Online

Zek 6 - Runyoro - rutooro bible

Zek 6

¹Nagaruka naimukya amaiso, narora ebigaali bbina nibiruga hagati y'ensozi ibiri ensozi ezi zikaba ziri z'omulinga.

²Ekigaali eky'okubanza, kikaba nikicundwa embaraasi ezirukunanata, kandi ekyakabiri ezirukwiragura,

³ekyakasatu embaraasi ezirukweera, kandi ekya kana ez'amabamba.

⁴Nakaguza malaika ow'akaba naabaza na nyowe nti, “Taata, Ebigaali ebi, nibimanyisa ki?”

⁵Yangarukamu ati, “Ebigaali ebi, obu bimazire kweyoleka omumaiso ga MUKAMA ow'Ensi yoona, nibigendera emiyaga ena ey'omwiguru.

⁶Ekigaali ekirukucundwa embaraasi ezirukwiragura, nikigenda omunsi ey'omumatemba, ekirukucundwa ezirukwera nikigenda omu ya Bugwaizooba, kandi ekirukucundwa ez'amabamba, omu y'amasirimuka.”

⁷Embaraasi obu zaaturukire, zaagonza kugenda kurabamu ensi. Malaika yaziragira ati, “Mugende murabemu ensi.” Nazo nukwo zaakozire.

⁸Malaika nubwo yaanyesire yangambira ati, “Ezi ezinyakugenzire omunsi ey'omu matemba, bahumwize Mwoyo wange omunsi egi.”

⁹MUKAMA akandagira ekigambo kinu ati:

¹⁰Omu nzaahisibwa abaarugire Bbabbulooni, oihemu Herudayi, Tobiya, na Yedaaya, kandi ha kiro eki kyonyini, ogende omunju ya Yosiya mutabani wa Zefania.

¹¹Bakuhe efeeza na zaabbu, obikolemu ekondo, ogijweke Yoswa mutabani wa Yehozadaaki Nyakatagara Omukuru;

¹²omugambire oti, “MUKAMA ow'amahe naagamba ati, ‘Omusaija onu, ibara lye nuwe Itaagi: habwokuba alirangaanwa omu kiikaro kye, kandi nuwe alyombeka Enju ya MUKAMA.

¹³Nuwe alyombeka Enju ya MUKAMA, aliheebwa ekitiinisa ekinyakusemeriire omukama, aliikarra ha kitebe ky'obukama bwe aleme. Haihi n'ekitebe kye eky'obukama haraayemeraahoga nyakatagara, abo boombi baraikiranizaaga n'obusinge.’”

¹⁴Ekondo eriikara omunju ya MUKAMA, kiri kiijukyo eky'okwijukirahoga Herudayi, Tobiya, Yedaaya na Yosiya mutabani wa Zefaniya.

¹⁵“Abantu abanyakuli hara, baliija bakoonyere kwombeka Enju ya MUKAMA; nubwo mulimanya MUKAMA ow'amahe nkooku yabantumireho. Obu mulihurra MUKAMA Ruhanga wanyu n'omutima gumu, eki nubwo kiribaho.”