Read Runyoro - rutooro Zek 7 Bible Online

Zek 7 - Runyoro - rutooro bible

Zek 7

¹Omu mwaka ogwa kana ogw'obusinge bwa Daliyo, ha kiro ekya kana eky'okwezi kwa mwenda, nukwo Kisileevi MUKAMA akandagira ati,

²Abantu ba Beseeri bakaba batumire Sarezeeri na Regemereki, n'abasaija baabo kwesengereza MUKAMA abakwatirwe embabazi,

³n'okukaguza banyakatagara ab'omunju ya MUKAMA n'abarangi bati, “Twongere kurra n'okusiiba omu kwezi kwa kataanu nkooku twakakozire emyaka egi yoona?”

⁴MUKAMA ow'amahe nubwo yangarukiremu ati:

⁵“Kaguza abantu boona ab'omunsi na banyakatagara oti, Obu mwasiibaga kandi obu mwarraga omu kwezi okwa kataanu n'okwa musanju okumara emyaka nsanju, mwasiibaga habwange?

⁶Obu mwalyaga kandi obu mwanywaga, mutalye kandi mutanywe habw'okwesemereza?

⁷Yerusaalemu obu ekaba neekyaikarwamu kandi egwagwaine hamu n'embuga zaayo ezigiherraine, ensi ey'omu masirimuka n'ekyeya obu bikaba nibiikarwamu, ebigambo ebi, MUKAMA tinibyo yagambire naaraba omu barangi aba ira?”

⁸Kandi MUKAMA, akagambira Zekaliya ati,

⁹“MUKAMA ow'amahe naagamba ati, mucwe emisango omu bwinganiza, mugirrangane embabazi kandi muganyirangane,

¹⁰muleke kubonesa abafaakati, enfuuzi, abanyamahanga, n'abanaku; kandi hatalibaho n'omu omuli inywe acwa amagezi ag'okukora kubi mutaahi we”.

¹¹Abantu bakanga kuhurra, baakonga ibega baagumangana, baayeyigaza amatu nukwo baleme kuhurra.

¹²Bakeekadadaza emitima yasisana ibaale, nukwo baleme kuhurra ebiragiro n'ebigambo MUKAMA ow'amahe naagamba ati,

¹³“Obu nabalize, nkooku baayangire kuhurra. Obu bansabire ntabahe eki barukusaba.”

¹⁴“Nkaleeta akairiringwa nabararangya omu mahanga aga bakaba batamanyire. Ensi ei baarugiremu, ensi erukusemereza, nukwo yafookere eti kitongo, haburaho omuntu n'omu asobora kugendamu rundi kugirugamu.”