Read Runyoro - rutooro Zek 9 Bible Online

Zek 9 - Runyoro - rutooro bible

Zek 9

¹ Ekigambo kya MUKAMA nikikwataho ensi Haduraaka, kandi nikigwera Damasiko. Habwokuba embuga z'Aramu za MUKAMA, enganda zoona eza Isirairi nkooku ziri ze;

²na Hamasi enyakuherraineyo, Taya na Sidoni, noobu ziri z'amagezi muno.

³Taya akeezitirra ekisiika eky'itaka, yarunda efeeza nyingi muno nk'esaabu ey'omu nguudo.

⁴Baitu caali MUKAMA ebintu bye alibimwihaho, obuguuda bwayo alibumiisa omu nyanja, kandi yo erisiirizibwa omurro.

⁵Asikelooni, eki erikirora etiine; Gaaza nayo erikirora obusaalizi bwende kugiita; n'Asikelooni, habwokuba erihwa amasiko. Gaaza, omukama aligirugamu, Asikelooni eriikara etarumu bantu;

⁶Asidoodi eriikarwamu abantu entabirane; ndihwerekereza Abafirisiti abemyehembo.

⁷Tibalyongera kulya enyama ejwanganiize n'esagama n'ebinugwa byabo ndibiiha omu maino. Nabo baliba kicweka ekisigaireho kya Ruhanga waitu; balisisana nk'oruganda omunsi ya Yuda, kandi Ekurooni erisisana Abayebusi.

⁸Hanyuma, nditeera orukande ha nju yange nk'omulinzi, nukwo haleme kubaho omuntu n'omu arukugenda rundi arukurugayo; Omuntu n'omu ow'okubabonesa, taligaruka kubataahirra, habwokuba hati ndozire n'amaiso gange naayetegereza.

⁹Inywe abantu ba Siyoni Inywe abantu ba Yerusaalemu mutokere haiguru! Dora, omukama wanyu ngugwo naija owanyu; asingwiire naayebuga, naayebundaaza kandi atembere enkaina atembere embaraasi ensigazi, nugwo omwana gw'enkaina.

¹⁰MUKAMA naagamba ati, Ndihwerekereza ebigaali mbimale omunsi y'Efuraimu embaraasi ez'obulemu nzimale Yerusaalemu; emisogi eyayekoonyeziibwe omu bulemu erihwerekerezibwa omukama wanyu alireeta obusinge omu mahanga, alirema okuruga ha nyanja okugarukira ha nyanja, n'okuruga ha kisaaru Efurate okugarukira ha mitaano y'ensi.

¹¹MUKAMA naagamba ati, “Habw'endagaano ei naragaine na iwe eyaboherwe n'esagama ey'ebyonzira ndirekera abantu bawe, baruge omu kiina eky'obunyagwa ekitarumu maizi.

¹²Inywe abanyankomo abatahoire masiko, mugaruke omu kigo kyanyu; kiro kinu, nimbamanyisa nti, ninyija kubagarurra, mbisaagise kabiri.

¹³Habwokuba nkagema Yuda abe buta bwange, Efuraimu nuwe nafoora misogi yabwo. Ndikwekoonyeza nk'empirima y'omuserikale.”

¹⁴Hanyuma MUKAMA alizooka eruguru yabo omusogi gwe gulimyankya nk'omurabyo; MUKAMA Ruhanga aliteera engwara, alirubatira omu kairiringwa akamasirimuka.

¹⁵MUKAMA ow'obusobozi bwona alirinda abantu be, balihwerekereza abanyanzigwa baabo, balitokera omu bulemu nk'abatamiizi, baliseesa esagama y'abanyanzigwa baabo; eriseeseka nk'esagama ey'ekyonzira, enyakuruga omu bbakuli ekaseeswa ha itambiro.

¹⁶Ha kiro eki, MUKAMA Ruhanga wabo alibajuna, omuliisa nkooku ajuna igana lye akabi, balyakayakanira omunsi ye, nk'amabaale ag'omuhendo ag'ekondo.

¹⁷Ego, baliba n'omuhimbo kandi balisemererwa! Engano erikuza abasigazi, amarwa ag'omutararra gakuze abaisiki.