Read Runyoro - rutooro Mara 1 Bible Online

Mara 1 - Runyoro - rutooro bible

Mara 1

¹Binu nibyo ebigambo MUKAMA ebi yatumire Maraki kugambira Abaisirairi.

² MUKAMA naagamba ati, “Nkabagonza,” baitu inywe nimugamba muti, “Okatugonza ota?” MUKAMA naakaguza ati, “Esahu akaba atali wa nyina Yakobbo?” “Baitu nkagonza Yakobbo,

³nanoba Esahu; ensi ye ey'ensozi, nkagifoora kitongo, kandi ensi ei yagwetiirwe, nagirekera eboha ez'omwirungu.”

⁴Edomu kakuba egamba eti “Tukasaasangurwa, baitu ebikambuuro tulibyombeka buhyaka,” MUKAMA ow'amahe aligamba ati “Baleke boombeke baitu amaju gaabo ndagaseesa, okuhika abantu obu balikagamba bati, ensi egi mbi, abantu abo, MUKAMA akababiihirirwa ebiro byona.”

⁵Eki mulikyerorra n'amaiso ganyu, mugambe muti, “MUKAMA anyumize, okuhingura hara omutaano gwa Isirairi.”

⁶“MUKAMA ow'amahe naakaguza inywe banyakatagara abanyakumugaya ati, ‘Omwana atamu ise ekitiinisa, n'omwiru atamu mukama we ekitiinisa. Obu ndaaba ndi muzaire, ekitiinisa kyange, kiraha? Kandi obu ndaaba ndi MUKAMA, okutiinwa kwange kuraha?’

⁷Mukangaya nimuhonga haitambiro lyange ebyokulya ebisisikaire. Nimugaruka nimugamba muti, ‘Tukabisiisa tuta?’ Nimuteekereza muti, emeeza ya MUKAMA esemeriire kugaywa.

⁸Obu muleeta ebisoro ebifiire amaiso nibyo kutamba, eki kiba kihikire? MUKAMA ow'amahe naagamba ati, ekisoro nk'eki mukihe omulemi wanyu omukuru; alibasiima rundi alibagirra embabazi?

⁹“Hati inywe banyakatagara, mulengeho kusaba Ruhanga atugirre embabazi. Taabahe ebi murukusaba, kandi ogu guraaba musango gwanyu.

¹⁰“MUKAMA ow'amahe naagamba ati, Omuli inywe, kakuba habairemu arukusobora kukinga enyigi, nukwo mukaleka kuhembera busa omurro haitambiro lyange! MUKAMA ow'amahe naagamba ati, Tindukubasiima, kandi tindukwikiriza kihongwa ekirukuruga omu ngaro zanyu.

¹¹Okuruga Burugaizooba okugarukira Bugwaizooba mpeebwa ekitiinisa omu mahanga goona, kandi ncumiikirirwa obubbaani, ekihongwa ekirukwera mali.

¹²Baitu inywe obu mugamba muti, emeeza ya MUKAMA mbi, kandi ebyokulya ebinyakuteebwaho bisemeriire kugaywa, muba nimunjumisa.

¹³MUKAMA ow'amahe naagamba ati, Nimugamba muti, ‘Eki ka nikijwahya,’ ekiibirwe, ekiramaire rundi ekirwaire nikyo muleeta kumpongera. Nimugira, eki ndikiikiriza?

¹⁴MUKAMA ow'amahe naagamba ati, Neekaigale engobya egi, enyakumpongera ekisoro ekibi, kandi kunu omwigana lye, ainamu ekisoro ekirungi eki yaraganiize kumpa! Omumaiso ndi MUKAMA ow'ekitiinisa, kandi amahanga goona gantiina.