Read Runyoro - rutooro Mara 2 Bible Online

Mara 2 - Runyoro - rutooro bible

Mara 2

¹“Inywe banyakatagara, ekiragiro kinu kiteeriirweho inywe.

²Obu muraalema kuhurra, obu muraalema kutaho omutima kumpa ekitiinisa, ndibakyena kandi ndisiisa emigisa yanyu; mazimakwo eki nkasangwa nkikozire, omumaiso ekiragiro kinu timukitaho mutima.

³Ndihana abaana banyu, inywe, obusa obw'ebihongwa byanyu, ndibubasiiga ha maiso, kandi ndibabinga munduge omumaiso.

⁴MUKAMA ow'amahe naagamba ati, nubwo mulimanya nkooku nabatwekiire ekiragiro eki okugumya endagaano yange ei naragaine na Leevi.

⁵Endagaano yange na Leevi ekaba ndagaano ey'okumuha obwomeezi n'obusinge, kandi ebi nkabimuha, nukwo antiine; akantiina kandi akantamu ekitiinisa.

⁶Yayegesaaga eby'amazima, tiyabazaaga ebitahikire. Tukaikarana n'obusinge, kandi akaiha baingi omu bubi.

⁷Kihikiriire nyakatagara kulinda amagezi, abantu nuwe basemeriire kwebinga abeegese, omumaiso nuwe mukwenda wa MUKAMA ow'amahe.

⁸MUKAMA ow'amahe naagamba ati, mukaruga omu muhanda ogw'amazima; enyegesa yanyu ekeesitaza baingi, mukacwa endagaano ya Leevi.

⁹Habweki nanyowe, nkooku mwayangire kukora ebi ndukugonza, mwasoroora abantu omu nyegesa yanyu, ninyija kubafoora bantu ngaywagaywa kandi ab'enyuma omu bantu boona.”

¹⁰Itwena tutazaarwe Isiitwe omu? Tutahangwe Ruhanga omu? Habweki nu, kiki ekitutanga kwesigangana, kandi ekitugayisa endagaano Ruhanga ei yakozire na ba isenkuruitwe?

¹¹Abantu ba Yuda bakacwa endagaano ei baaragaine na Ruhanga, baakora ekintu ekibi ekitagambwa omu rubuga Yerusaalemu n'omunsi egi yoona. Bakasiisa Enju ya MUKAMA ei agonza. Abasaija baayeswerra abakazi abarukuramya abacwezi abanyamahanga.

¹²Buli muntu wena arukukora ekintu eki, MUKAMA amwihe omu bantu ba Isirairi, kandi ataligaruka kubaikiriza kwetaahya omu bihongwa ihanga lyaitu ebi lireetera MUKAMA Ow'obusobozi bwona.

¹³Kandi haroho n'ekindi eki murukukora. Nimujubya itambiro lya MUKAMA n'amaizi aga murukurra nimuteera empamo omumaiso takyaikiriza bihongwa ebi murukumuletera.

¹⁴Nooyekaguza oti, “Kiki ekirukumutanga?” Habwokuba, MUKAMA nuwe yabaire kaiso ow'okugumya ekiragaano eki waragaine n'omukazi ou waswire oli musigazi, ou wagobiize, ou otarahweriireyo kunu nuwe mugenzi wawe, kandi mukazi wawe ow'endagaano.

¹⁵Iwe n'omukazi ogu, Ruhanga atabafoole mubiri gumu kandi mwoyo gumu? Kukora eki, akagenderra ki? Eki yagenderiire, nukwo musobole kuzaara abaana, abantukwo ba Ruhanga. Habweki nu, hatabaho n'omu omuli inywe acwa endagaano ei yaragaine na mukazi we.

¹⁶MUKAMA Ruhanga owa Isirairi naagamba ati, “Nnoba okwahukana kw'omusaija n'omukazi abaswerangaine, MUKAMA Ruhanga ow'amahe naagamba ati, kandi nnoba n'omuntu anyakwikara aserekere obubi. Habweki, kinu mukiteho omutima, muleke kucwa ekiragaano kyanyu, nukwo mubege beesigwa hali bakazi banyu.”

¹⁷Mujwahize MUKAMA n'ebigambo ebi murukugamba. Nimukyayekaguza muti, “Tumujwahize tuta?” Obu mugamba muti, “Boona abanyakukora ebibi, MUKAMA abasiima kandi abagonza”. Rundi obu mwekaguza muti, “Ruhanga ow'obwinganiza ali nkaha?”