Read Runyoro - rutooro Mara 3 Bible Online

Mara 3 - Runyoro - rutooro bible

Mara 3

¹MUKAMA ow'amahe naagamba ati, “Ndituma omukwenda wange anteekanirize omuhanda, MUKAMA ou murukuserra, nubwo aliija omunju ye atalengeriirwe; omukwenda ou murukwegomba kurora aliija arangirre endagaano yange.”

²Baitu n'oha alisobora kwemera ekiro eki aliiziraho kandi obu alizooka n'oha alyemerra? Habwokuba alisisana nk'omurro gw'omuntu anyakusemeza ezaabbu, alisisana nk'esabbuni ey'omwogi w'engoye;

³aliikarra nk'omuntu anyakusemeza efeeza kugimaramu ebyenga, alisemeza abaana ba Leevi basisane nk'ezaabbu n'efeeza, okuhika obu balikaleetera MUKAMA ebihongwa ebimusemeriire.

⁴Obu, ebihongwa abantu ba Yuda n'aba Yerusaalemu ebi baleetera MUKAMA, nubwo birimusemereza nkooku byamusemerezaaga kara.

⁵MUKAMA ow'amahe naagamba ati, “Ndiija mbacwere omusango ndiba kaiso arukurahuka kurumiriza abarogo, abasiihani, abanyakurahirra busa, abahenderra abakozi empeera yabo, abanyakuhenderra abafaakati n'enfuuzi, abanyakunyaga abasi b'ensi ebi basemeriire kutunga, n'abatantiina.”

⁶“Ninyowe MUKAMA, kandi timpinduka. Habweki inywe abaijukuru ba Yakobbo, timukahwerekeriire.

⁷Okuruga omu businge bwa ba isiinywe, mukarugaho ebiragiro byange, mwayanga kubikwata. MUKAMA ow'amahe naagamba ati, mugaruke nambere ndi, na nyowe nukwo nyije nambere muli. Baitu nimwekaguza muti ‘Turaagarukayo tuta?’

⁸Nimbakaguza, kihikire omuntu kunyaga Ruhanga? ‘Tikihikire naakake, baitu inywe nimmunyaga. Baitu nimwekaguza muti nitukunyaga tuta?’ Nimunyagira omu ndoborwa n'omu bihongwa byanyu.

⁹Muli bakyenwa, habwokuba nimmunyaga, ihanga lyanyu lyona.

¹⁰MUKAMA ow'amahe naagamba ati muleete omu lyahurro kimu kyaikumi ekihikire, omunju yange nukwo habemu ebyokulya; hali eki nuho mundengeseze, obu ntaabakingurre amadirisa g'iguru, nkabaha omugisa mwingi.

¹¹MUKAMA ow'amahe naagamba ati: Nditanga enzige zireke kusiisa eby'okulya eby'itaka lyanyu; n'emizabbibbu ey'omu misiri yanyu terirema kwaana.

¹²MUKAMA ow'amahe, kandi naagamba ati, amahanga goona nubwo galibeeta bahiirwa, omumaiso ensi yanyu eriba nsi y'okusemererwa.

¹³“MUKAMA naagamba ati, Mukambazaaho ebintu ebibi muno. Baitu nimukyayekaguza muti ‘Tukakubazaaho ki?’

¹⁴Mukagamba muti, ‘Kuheereza Ruhanga tikiina mugaso, kiina mugaso ki kukora ebi agamba, rundi kwoleka MUKAMA ow'amahe nkooku tusaaliirwe habw'ebibi twakozire?

¹⁵Okuruga hati n'okweyongera omumaiso abeekuliiriza nitubeeta b'omugisa, enkozi z'ebibi ebintu tibirukubagendera kurungi, baitu n'obu barukulengesa Ruhanga, tibarukuhikwaho kabi.’”

¹⁶Abo abanyakutiina MUKAMA, kimu nikyo baagambiranganaga. MUKAMA akabeetegereza kandi akabahurra: ekitabu eky'ahandikirwemu abo abanyakumutiina kandi abanyakumwebinga, kikahandiikirwa omumaiso ge.

¹⁷MUKAMA ow'amahe naagamba ati, ha kiro ekinditeekanirizaaho abo baliba kintu kyange mali ekyahukaine ha bindi, ndibagirra embabazi, nka ise mwana oku agirra embabazi omwana we anyakumuheereza.

¹⁸Obu nubwo mulyahukanizamu abarungi n'ababi, nubwo mulyetegereza anyakuheereza Ruhanga n'atamuheereza.