Read Runyoro - rutooro Mat 1 Bible Online

Mat 1 - Runyoro - rutooro bible

Mat 1

¹Okutonda obuzaale bwa Yesu Kristo, omwijukuru wa Daudi, omwijukuru wa Abburahamu.

²Abburahamu akazaara, Isaaka, Isaaka yazaara Yakobbo, Yakobbo yazaara Yuda n'abagenzi be.

³Yuda yazaara Perezi na Zeera, nyinabo nuwe Taamali; Perezi akazaara Hezirooni, Hezirooni yazaara Ramu.

⁴Ramu akazaara Aminadabbu, Aminadabbu yazaara Nahasooni, Nahasooni yazaara Salumoni.

⁵Salumoni akazaara Bowazi, nyina nuwe Rahabbu; Bowazi yazaara Obedi, nyina nuwe Lusi; Obedi yazaara Yese,

⁶Yese yazaara Daudi Omukama. Daudi yazaara Solomoni hali ogu ow'akaba ali muka Uriya.

⁷Solomoni akazaara Rehobbowamu, Rehobbowamu yazaara Abiya, Abiya yazaara Asa.

⁸Asa yazaara Yehosafaati, Yehosafaati yazaara Yoramu, Yoramu akazaara Uziya.

⁹Uziya yazaara Yotaamu, Yotaamu yazaara Ahazi, Ahazi yazaara Hezekiya,

¹⁰Hezekiya yazaara Manaase, Manaase yazaara Amosi, Amosi yazaara Yosiya.

¹¹Yosiya akazaara Yekoniya n'abagenzi be, omu biro baanyagiirwemu okutwarwa Bbabbulooni.

¹²Obu baamazire kutwarwa Bbabbulooni, Yekoniya akazaara Seyalityeri, Seyalityeri yazaara Zerubaabeli,

¹³Zerubaabeli yazaara Abiyudi, Abiyudi yazaara Eliyakimu, Eliyakimu yazaara Azoori.

¹⁴Azoori akazaara Zadoki, Zadoki yazaara Akimu, Akimu yazaara Eliyudi.

¹⁵Eliyudi akazaara Eryeza, Eryeza yazaara Mataani, Mataani yazaara Yakobbo.

¹⁶Yakobbo ogu nuwe yazaire Yosefu iba Mariya, nyina Yesu arukwetwa Kristo.

¹⁷Nahabweki okuruga hali Abburahamu okuhika hali Daudi haroho bwijukuru ikumi na bbuna; okuruga hali Daudi okuhika ha kutwarwa Bbabbulooni naho haroho obwijukuru ikumi na bbuna; kandi okuruga ha kutwarwa Bbabbulooni okuhika ha kuzaarwa kwa Kristo, nabwo bwijukuru bundi ikumi na bbuna.

¹⁸Eby'okuzaarwa kwa Yesu Kristo bikaba biti: Mariya nyina, obu akaba ajumbiirwe Yosefu, akazooka aina enda ya Mwoyo Ahikiriire.

¹⁹Yosefu iba, habw'okusangwa ali musaija ahikiriire, atagonze kumuhemura omu bantu, baitu yacwamu kumuleka omu nsita.

²⁰Obu akaba naakyateekereza ebi, malaika wa Mukama yamubonekera omu kirooto naagamba ati: “Yosefu, mwijukuru wa Daudi, otatiina kugabura Mariya mukazi waawe, habwokuba atwaire enda habw'amaani ga Mwoyo Ahikiriire.

²¹Alizaara omwana omwojo, olimuruka ibara lye Yesu, habwokuba nuwe alijuna abantu be ebibi byabu.”

²²Ebi byona bikabaho nukwo bihikirize MUKAMA ebi yagambiire omu kanwa k'omurangi ati:

²³“Omwisiki empikirre alitwara enda, azaale omwana omwojo, kandi alyetwa ibara Emanueli.” (Amakuru gaalyo: Ruhanga ali na itwe.)

²⁴Yosefu obu yasisiimukire, yakora malaika wa MUKAMA eki yamugambiire, yagabura Mariya;

²⁵kandi atamumanye atakazaire omwana omwojo. Yosefu yamuruka ibara lye Yesu.