Read Runyoro - rutooro Mat 10 Bible Online

Mat 10 - Runyoro - rutooro bible

Mat 10

¹Yesu akeeta abeegesebwa be ikumi na babiri, yabaha obusobozi obw'okubinga emyoyo emibi, n'okukiza endwara zoona n'obusaasi bwona.

²Amabara g'abakwenda ikumi na babiri nugo ganu: ow'okubanza Simooni arukwetwa Petero, na mugenzi we Andereya; Yakobbo mutabani wa Zebedaayo na Yohaana owanyina;

³Filipo na Batolomayo; Tomasi na Matayo, omusorooza w'omusoro; Yakobbo mutabani w'Alifaayo, na Tadeo;

⁴Simooni omurwanirizi w'ihanga lye na Yuda Isikalyota ayamugobiize.

⁵Ikumi na babiri abo, Yesu akabatuma naabaragira ati: “Mutaligenda hoona mu Banyamahanga, kandi mutalitaaha omu rubuga rwona orw'Abasamaliya.

⁶Haakire mugende omu bantu ba Isirairi abarukusisana entaama ezaabuzire.

⁷Obu muraabaga nimugenda, murangirre muti: ‘Obukama bw'omu iguru bwiriire haihi.’

⁸Mukize abarwaire, muhumbuule abafiire, mukize abagenge, mubinge emyoyo emibi. Mukaheerwa busa, na inywe muheere busa.

⁹Mutalitwara ezaabbu n'efeeza, noobu zaakuba sente omu ndyanga zanyu;

¹⁰mutalitwara ensaho omu rugendo rwanyu, rundi esaati ibiri, rundi enkaito, noobu gwakuba omwigo. Habwokuba omukozi naasemerra kuheebwa empeera ye.

¹¹“Orubuga rwona rundi ekyaro ha muraataahaga, muserremuga omuntu anyakusemeriire, mwikale nawe okuhika obu mulirugayo.

¹²Obu muraabaga nimutaaha omunju, abarumu mubagondeze obusinge.

¹³Enju egi obu eraaba esemeriire, obusinge bwanyu buligiikaraho; baitu obu eraaba etasemeriire, obusinge bwanyu bulibagarukira.

¹⁴Kakuba omuntu weena atabatangirra rundi akanga kuhuliiriza ebigambo byanyu, muruge omunju egi rundi omu rubuga oru nimuteeraterra ecuucu y'omu bigere byanyu.

¹⁵Mazimakwo nimbagambira nti: Ha kiro ky'okucwerwa omusango, ensi ya Sodomu na Gomora eriganyirwa kukira abantu b'omu rubuga oru.”

¹⁶“Dora nimbatuma nk'entaama ezirukugenda omu myaaga hagati; nahabweki mube b'amagezi nk'enjoka, kandi abataina kabi nk'amaiba.

¹⁷“Mwerindege abantu; habwokuba balibahayo omu nkurato, balibateeza enkoba omu masorrokaniro gaabu,

¹⁸Kandi balibatwara kubatonganiza omu maiso g'abalemi abakuru n'ag'abakama habwange, mube bakaiso bange hali bo na hali Abanyamahanga.

¹⁹Obu baraabahayoga, mutalitunturra ebi muligamba, rundi nkooku mulitongana; baitu omu kasumi ako muliheebwa ebi muligamba.

²⁰Habwokuba tibali inywe abalyetonganirra, baitu Mwoyo wa Isiinywe nuwe aligambira omuli inywe.

²¹“Omuntu alihayo owanyina aitwe, na isemwana alihayo omwana we, kandi abaana baliimukirra abazaire baabo babaise;

²²na inywe mulinobwa boona habwange. Baitu ogu aligumiisiriza okuhika ha mpero, nuwe alijunwa.

²³Obu balibahiiganiza omu rubuga orumu, mwirukire omu rundi. Mazima nimbagambira nti: Timulimarayo embuga zoona eza Isirairi, Omwana w'omuntu atakaizire.

²⁴“Omwegesebwa takira mwegesa we, n'omuheereza takira mukama we;

²⁵nikihika omwegesebwa okusisana nk'omwegesa we, n'omuheereza kusisana nka mukama we. Nyineeka obu baraaba bamwesire mukuru w'emyoyo emibi, balisura ki hali ab'omu ka ye?”

²⁶“Nahabweki muleke kubatiina, habwokuba busaho ekiswekeriirwe ekitalisuukurwa, rundi ekiserekerwe ekitalimanywa.

²⁷Eki ndukubagambira omu nsita, mukigambe bbwa; kandi eki muhurra omu bihwa, mukyamirirre ha mutwe gw'enju.

²⁸Muleke kutiina abo abaita omubiri, abatasobora kwita omwoyo; haakire mutiine Ogu anyakuhwerekereza byombi: omubiri n'omwoyo omu murro ogutaraara.

²⁹Ebisirya bibiri tibigurwa sente ikumi? Busaho na kimu halibyo ekigwa hansi Isiinywe ow'omwiguru ataikiriize.

³⁰Nangwa n'isoke erya ha mitwe yanyu libazirwe.

³¹Nahabweki muleke kutiina; inywe muli b'omuhendo kukira ebisirya bingi.”

³²“Weena alinyatura omumaiso g'abantu, na nyowe ndimwatura omumaiso ga Isenyowe anyakuli omwiguru;

³³baitu weena alinyehakana omumaiso g'abantu, na nyowe ndimwehakana omu maiso ga Isenyowe anyakuli omwiguru.

³⁴“Mutateekereza ngu, nkaija kuleeta obusinge omu nsi. Ntaije kuleeta obusinge, baitu empirima.

³⁵Nkaija kwahukaniza omwana na ise, omwisiki na nyina, mukamwana na nyinazaara;

³⁶habwokuba abanyanzigwa b'omuntu nubo ab'omu ka ye.

³⁷Anyakugonza ise rundi nyina okukira nyowe, tansemeriire; n'ogu anyakugonza mutabani we rundi muhara we okukira nyowe, tansemeriire;

³⁸n'ogu ateetweka musaraba gwe akampondera, tansemeriire.

³⁹Weena anyakutaatira obwomeezi bwe, alibufeerwa; baitu weena alihayo obwomeezi bwe habwange, alibutunga.”

⁴⁰“Weena anyakujwahukirra inywe, buli ajwahukiriire nyowe; kandi anyakujwahukirra nyowe, buli ajwahukiriire Ogu ayantumire.

⁴¹Weena anyakujwahukirra omurangi habwokuba murangi, ogu aliheebwa empeera y'omurangi; kandi weena anyakujwahukirra omuhikiriire habwokuba muhikiriire, ogu aliheebwa empeera y'omuhikiriire.

⁴²Weena anyakuha omu ha bato abo ekikopo ky'amaizi agarukufuka habwokuba mwegesebwa wange, mazimakwo talisubwa mpeera ye.”