Read Runyoro - rutooro Mat 11 Bible Online

Mat 11 - Runyoro - rutooro bible

Mat 11

¹Yesu obu yamazire kwegesa abeegesebwa be ikumi na babiri, yarugayo yagenda kwegesa n'okurangirra Amakuru Amarungi omu mbuga zaabu.

²Yohaana ow'akaba ali omu nkomo, obu yahuliire Kristo ebi arukukora, yatuma abeegesebwa be

³okumukaguza buti: “Niiwe ogu arukugenda kwija, rundi tutegereze ondi?”

⁴Yesu yabagarukamu ati: “Mugarukeyo, mugambire Yohaana ebi murukuhurra n'ebi murukurora:

⁵abafu b'amaiso nibarora, abalema nibarubata, abagenge nibakizibwa, abafu b'amatu nibahurra, abafiire nibahumbuurwa, abaseege nibarangirirwa Amakuru Amarungi.

⁶W'omugisa ogu atarukunyesiitaraho!”

⁷Abeegesebwa ba Yohaana obu baamazire kurugayo, Yesu yakaguza ebitebe by'abantu hali Yohaana ati: “Omwirungu mukagenda kurorayo ki? Orubingo orurukutengesebwa omuyaga?

⁸Obu, mukagenderayo ki? Kurora omuntu ajwaire engoye ezirukunekaneka? Abo abajwara engoye ezirukunekaneka baikara omu bikaali by'abakama.

⁹Obu, mukagenderayo ki? Kurora omurangi? Ego, nimbagambira nti: Naakira n'omurangi.

¹⁰Nuwe ogu ou kyahandiikirweho kiti: “‘Dora, nintuma omukwenda wange akwebembere, nuwe akusemereze omuhanda.’

¹¹Mazima nimbagambira nti: Omu bantu abaazairwe abakazi, busamu n'omu arukukira Yohaana Omubatiza ekitiinisa; baitu omuto omu bukama bw'omwiguru nuwe arukumukira.

¹²Okuruga omu biro bya Yohaana Omubatiza n'okuhika hati, obukama bw'omwiguru burwanirirwa n'amaani, kandi ababurwanirra babunyaga n'amaani.

¹³Habwokuba Ebiragiro n'abarangi, boona bakaranga ebirukwija kubaho okuhika ha biro bya Yohaana;

¹⁴obu muraaba nimwikiriza ebyarangirwe ebi, Yohaana ogu nuwe Eriya ayanihirwaga kwija.

¹⁵Anyakwina amatu, ahurre.

¹⁶“Abantu ab'obusinge bunu ndabalengesaniza na ki? Nibasisana nk'abaana abaikaliire omu butale, nibeetangana bati:

¹⁷“‘Tukabaterra endere, timwazina; twabaterra empamo, timwarra.’

¹⁸Yohaana obu yaizire atarukulya byokulya kandi atarukunywa marwa, baagamba ngu: ‘Aroho omwoyo mubi’,

¹⁹kandi Omwana w'omuntu obu yaizire naalya kandi naanywa, baagamba bati: ‘Dora omukoizi kandi omutamiizi, enganjani y'abasorooza b'omusoro n'abasiisi!’ Amagezi ga Ruhanga gamanyirwa ha bikorwa byago.”

²⁰Nubwo Yesu yatandika kujunaana embuga nambere yakoliire ebyamahano ebirukukira obwingi, habwokuba bateegarukemu.

²¹“Olikibona iwe Korazini! Olikibona iwe Betisaida! Ebyamahano ebyakoliirwe omuli inywe, kakuba byakoliirwe Taya na Sidooni, baakubaire beegarukiremu ira, bajwaire ebiguniya, beesiigire n'iju!

²²Baitu nimbagambira nti: Ha kiro ky'okucwerwa omusango, Tiiro na Sidooni ziriganyirwa okukira inywe.

²³Na iwe Kafaranaumu olinyumizibwa ohike haiguru? Nangwa, oligarurwa hansi okuzimu. Omanye ebyamahano ebyakoliirwe omuli iwe, kakuba byakoliirwe omu Sodomu, yakwikaireho okuhika hati.

²⁴Baitu nimbagambira nti: Ha kiro ky'okucwerwa omusango, ensi ya Sodomu eriganyirwa kukira iwe.”

²⁵Omu kasumi ako, Yesu yagamba ati: “Taata, MUKAMA w'iguru n'ensi ninkusiima, habwokuba ebintu binu okabisereka ab'amagezi n'abarukwetegereza, wabisuukurra abaana bato.

²⁶Ego Taata, eki nikyo wasiimire.

²⁷Isenyowe akankwasa ebintu byona, kandi busaho n'omu amanyire Mwana okwihaho Ise, kandi busaho n'omu amanyire Ise okwihaho Mwana, na weena Mwana ou agonza kumusuukurra.

²⁸Mwije nambere ndi inywena abajwahire n'abalemeriirwe mbahuumuze.

²⁹Muhimbe ekikoligo kyange, mwegere hali nyowe; habwokuba ndi muculeezi kandi ninyebundaaza omu mutima, na inywe mulitungira emyoyo yanyu ekihuumuro.

³⁰Habwokuba ekikoligo kyange tikirukulemeera, kandi n'omutumba gwange nigwanguhirra.”