Read Runyoro - rutooro Mat 12 Bible Online

Mat 12 - Runyoro - rutooro bible

Mat 12

¹Omu kasumi ako Yesu akaba naaraba omu misiri y'engano ha kiro kya Sabbato; abeegesebwa be bakaba nibarumwa enjara, baatandika kucwa entwe z'engano nibazijungirra omu ngaro, nibalya.

²Baitu Abafalisaayo obu baarozire eki, baamugambira bati: “Dora abeegesebwa baawe nibakora ekitarukwikirizibwa ha Sabbato.”

³Nawe yabagarukamu ati: Timukasomaga Daudi eki yakozire obu yarumirwe enjara, hamu n'abo aba akaba ainabo;

⁴nkooku yataahire omunju ya Ruhanga yalya emigaati enyakuhongerwe etaraikirizibwaga kuliibwa muntu weena kwihaho abanyakatagara bonka?

⁵Rundi timukasomaga omu Biragiro bya Musa nkooku banyakatagara baasiisaga Sabbato nibakora omu Nju ya Ruhanga, kandi nkooku batarajunaanwaga musango?

⁶Nimbagambira nti: Hanu haroho arukukira Enju ya Ruhanga.

⁷Kakuba mubaire mumanyire amakuru g'ekigambo kinu ngu: “Ningonza mukole ebikorwa by'embabazi kukira kuntambira ebyonzira, timwakuhenderiire abataina musango.

⁸Habwokuba Omwana w'omuntu nuwe MUKAMA wa Sabbato.”

⁹Yesu yarugayo, yataaha omu isorrokaniro lyabo.

¹⁰Hakaba harumu omuntu akabire omukono. Baakaguza Yesu bati: “Nikiikirizibwa okukiza ha Sabbato?” Nukwo babone ekyokumunyegerra.

¹¹Yabagarukamu ati: “Nooha omuli inywe kakuba aba aina entaama ye, ekagwa omu kiina ha Sabbato, atagiihamu?

¹²Baitu omuntu tali w'omuhendo kukira entaama? Nahabweki nikiikirizibwa kukora ebirungi ha Sabbato.”

¹³Aho yagambira omusaija ati: “Gorra omukono gwawe.” Yagugorra, gwakira, gwaba nk'ogundi.

¹⁴Nubwo Abafalisaayo baaturuka aheeru kuhanuura nkooku baraamwita.

¹⁵Yesu obu yamanyire eki, yarugayo, abantu baingi baamuhondera, kandi boona yabakiza.

¹⁶Yabateererra kutamuranganiza.

¹⁷Kinu kikabaho okuhikiriza ekyagambirwe omurangi Isaaya ati:

¹⁸“Onu nuwe muheereza wange ou nkomere, omugonzibwa wange omwoyo gwange ou gusiimira kimu. Ndimutaho Mwoyo wange, amanyise Abanyamahanga emicwere y'obulyo.

¹⁹Taliteera mpaka, talitoka, kandi tihalibaho alihurra iraka lye omu makuute;

²⁰orubingo oruhendekere talirucwa, n'ekibugo ekirukucucuuka talikiraaza, okuhikya eby'obulyo obu birisingura;

²¹kandi Abanyamahanga nuwe balyesiga.”

²²Nubwo baaleesire omuntu akwasirwe omwoyo omubi, afiire amaiso n'omunwa. Yesu yamukiza, kateta yabaza, n'amaiso ge gaiguka.

²³Abantu boona baahunirra, baakaguza bati: “Onu taakuba Mwana wa Daudi?”

²⁴Baitu Abafalisaayo obu baahuliire eki, baagamba bati: “Ogu abinga emyoyo emibi habwa Beelizebuli, mukuru wayo.”

²⁵Yesu obu yakengere ebiteekerezo byabo, yabagambira ati: “Obukama bwona obu bwecwamu kurwanisangana, buhwerekerra; kandi busaho rubuga rundi eka, obu byebaganizaamu, ebisobora kwikaraho.

²⁶Sitaani nawe obu araaba naabinga Sitaani mutaahi we, ayebaganiizeemu kwerwanisa wenka; obukama bwe buliikaraho buta?

²⁷Nyowe obu ndaaba nimbinga emyoyo emibi habwa mukuru wayo, abeegesebwa banyu bagibinga habw'oha? Nahabweki nubo balibacwera omusango.

²⁸Baitu Omwoyo wa Ruhanga obu araaba ali nuwe ambingisa emyoyo emibi, buli obukama bwa Ruhanga bubahikireho.

²⁹“Rundi omuntu asobora ata kutaahirra omusaija ow'amaani akanyaga ebintu bye, atabandize kumukwata akamuboha? Obu nubwo asobora kunyaga eby'omu nju ye.

³⁰“Atali habwange, buli nampakaniza; kandi atasorooza na nyowe, ararangya.

³¹Nahabweki nimbagambira nti: Abantu baliganyirwa ebibi byona n'ebijumo byona; baitu anyakujuma Mwoyo Ahikiriire taliganyirwa.

³²Kandi weena aligamba kubi Omwana w'omuntu aliganyirwa; baitu alijuma Mwoyo Ahikiriire taliganyirwa omu businge bunu, noobu bwakuba omu businge obuliija.”

³³“Semeza omuti, n'ebijuma biraasemera; rundi guleke gusiisikale, n'ebijuma byagwo biraabiiha; habwokuba omuti gumanyirwa ha bijuma byagwo.

³⁴Baana b'encwera inywe! Musobora muta kubaza ebigambo ebirungi, kunu muli babi? Habwokuba ebiijura omutima, nibyo akanwa kagamba.

³⁵Omuntu omurungi aiha ebirungi omu lyahurro lye erirungi; n'omuntu omubi aiha ebibi omu lyahurro lye eribi.

³⁶Nimbagambira nti: Ha kiro ky'okucwerwa omusango abantu balyesoborra ha buli kigambo ekibi eki baabalize;

³⁷habwokuba ebigambo byawe nibyo birikwihisaaho omusango, kandi nibyo birigukusingisa.”

³⁸Abeegesa abamu ab'ebiragiro n'Abafalisaayo baasaba Yesu bati: “Mwegesa, nitugonza otuhe akarorwaho.”

³⁹Yabagarukamu ati: “Abantu ab'obusinge bunu obubi kandi obutarukwesigwa nibasaba akarorwaho; baitu tibaliheebwa karorwaho koona kwihaho aka Yona omurangi.

⁴⁰Yona nkooku yamazire omu nda y'encu emisana esatu n'ebiro bisatu, n'Omwana w'omuntu nukwo alimara ati okuzimu ebiro bisatu n'emisana esatu.

⁴¹Ha kiro ky'okucwerwa omusango, abantu aba Nineve balyemerra n'abantu ab'obusinge bunu, babasingise omusango; habwokuba Yona obu yabarangiriire, bakeegarukamu; kandi hanu haroho arukukira Yona.

⁴²Ha kiro ky'okucwerwa omusango, Omukamakati owa Bukiizi obw'obulyo alyemerra, asingise omusango abantu ab'ebiro binu; habwokuba akaruga ha mpero y'ensi, yaija okuhurra amagezi ga Solomooni; kandi hanu haroho arukukira Solomooni.”

⁴³“Omwoyo omubi obu guruga omu muntu, gugenda niguraba omu biikaro ebitarumu maizi niguserra h'okuhumurra, baitu tiguzooraho.

⁴⁴Nubwo gugamba guti: ‘Kangaruke owange nambere narugire.’ Obu gugaruka, gusanga enju eri kwonka, esingoliirwe, eteekaniziibwe.

⁴⁵Gugenda guleeta emyoyo emibi endi musanju erukugukira obubi, ija ikara omu; obwomeezi bw'omuntu ogu obwa hanyuma buba bubi kukira obw'okubanza. Ab'ebiro binu nabo nukwo baliba bati.”

⁴⁶Yesu obu akaba naakyabaza n'abantu, aho nyina n'abagenzi be baija, baayemerra aheeru, nibagonza kubaza nawe.

⁴⁷Omuntu omu nukwo kumugambira ati: “Nyoko n'abagenzi baawe beemeriire aheeru nibagonza kubaza na iwe.”

⁴⁸Baitu Yesu yamugarukamu ati: “Mau nooha? Kandi bagenzi bange nubo baha?”

⁴⁹Nubwo yamuragirra abeegesebwa be naagamba ati: “Mau n'abagenzi bange nubo banu!

⁵⁰Weena anyakukora Isenyowe ow'omwiguru ebi agonza, nuwe mugenzi wange, nuwe munyaanya nyowe, kandi nuwe mau.”