Read Runyoro - rutooro Mat 13 Bible Online

Mat 13 - Runyoro - rutooro bible

Mat 13

¹Ha kiro eki Yesu akaruga omunju, yagenda yaikarra ha musa gw'enyanja.

²Ebitebe bingi byamwesoroolezaaho; nukwo kutemba omu bwato, yabwikarramu, kandi ekitebe kyona kyayemerra ha musa gw'enyanja.

³Aho yabagambira ebintu bingi omu nfumo ati: Omusigi akatura okusiga.

⁴Obu akaba naasiga, embibo ezimu zaaragara ha muhanda rubaju, enyonyi zaija, zaazisoma.

⁵Ezindi zaagwa ha mwandara, nambere hakaba hatali itaka lingi; ahonaaho zaamera. Baitu habw'itaka kutahama,

⁶omusana obu gwajwire, gwazookya, kandi habw'okutagira mihama zaahotoka.

⁷N'ezindi zaagwa omu nahwa, amahwa obu gaakuzire, gaazinyoroza.

⁸Embibo ezindi zaagwa omwitaka erirungi, zaayana; ezimu zaayana kikumi, ezindi nkaaga, n'ezindi makumi asatu.

⁹Nukwo Yesu kugamba ati: “Anyakwina amatu, ahurre!”

¹⁰Nubwo abeegesebwa baija baamukaguza bati: “Habwaki oikara noobaliza abantu omu nfumo?”

¹¹Yesu yabagarukamu ati: “Inywe mukaheebwa okumanya ensita z'obukama bw'omwiguru, baitu bbo eki batakiheebwe.

¹²Habwokuba weena anyakwina alyongerwaho, atunge bingi; baitu anyakwina ebike, n'ebi ainabyo birimwihwaho.

¹³Kinu nikyo mbagambirirra omu nfumo: habwokuba obu barora, tibahweza; n'obu bahurra, basisa abatahulire; kandi n'okwetegereza tibeetegereza.

¹⁴Mazimakwo Isaaya eki yarangire nikihikirra hali bo obu yagambire ati: ‘Mazimakwo okuhurra mulihurra, baitu timuhwituka, okurora mulirora, baitu timulihweza.

¹⁵Habwokuba emitima y'abantu banu egaraihire, n'amatu gaabo nigahurra kubi, n'amaiso gaabo bagazibiriize. Habw'amaiso gaabo okutarora, n'amatu gaabo okutahurra, n'emitima yabo okuteetegereza, nikyo bayangiire okumpindukira mbakize.’

¹⁶Amaiso ganyu g'omugisa habwokuba nigarora, n'amatu ganyu habwokuba nigahurra.

¹⁷Mazimakwo nimbagambira nti: Abarangi baingi n'abahikiriire bakeegomba kurora ebi murukurora, baitu batabirole, n'okuhurra ebi murukuhurra, baitu batabihurre.”

¹⁸Muhurre nu orufumo rw'omusigi:

¹⁹Omuntu weena obu ahurra ekigambo ky'obukama bwa Ruhanga atakyetegeriize, omubi aija asahura ekigambo ekisigirwe omu mutima gwe; egi niyo mbibo eyaragaire omu muhanda.

²⁰Kandi eyaragaire ha itaka erya ha mwandara, nuwe muntu anyakuhurra ekigambo, ahonaaho akiikiriza n'okusemererwa;

²¹baitu yo habw'okutahama omu mutima gwe, agumiisiriza akasumi kake; obu habaho emihito rundi okuhiiganizibwa habw'ekigambo eki, ahonaaho agwa.

²²Kandi egi eyaragaire omu mahwa, nuwe ogu anyakuhurra ekigambo, baitu habw'okumaliza omutima ha by'ensi, n'okutwalirizibwa obuguuda, binyoroza ekigambo eki, tikyaana bijuma.

²³Kandi embibo eyasigirwe omwitaka erirungi, nuwe muntu anyakuhurra ekigambo akakikenga; hanyuma akakora ebikorwa ebirungi: omu kukira ha kikumi, ondi nkaaga, n'ondi makumi asatu.

²⁴Yesu akabaganikiza oruganikyo orundi ati: “Obukama bw'omwiguru nibusisanizibwa nk'omuntu ayasigire embibo nungi omu musiri gwe.

²⁵Ekiro, abantu obu bakaba bagwijagiire, omunyanzigwa akaija yasiga emberya omu buro, yayegendera.

²⁶Oburo obu bwakuzire butandikire kutungurra, emberya nayo yazookamu.

²⁷Abakozi ba nyineeka nukwo kwija baamukaguza bati: ‘Waitu, omu musiri gwawe otasigemu embibo nungi? Kandi emberya iziremu eta?’

²⁸Yabagarukamu ati: ‘Omunyanzigwa nuwe yakozire kinu.’ Nubwo abakozi baamukagwize bati: ‘Noogonza tugende tugyomberemu?’

²⁹Nandiki nyineeka ati: ‘Nangwa, habwokuba obu muraaba nimwomberamu emberya, timwikara kutwarranizaamu oburo.

³⁰Muleke byombi bikurre hamu okuhika ha igesa; omu kasumi k'igesa, ndigambira abagesi nti: Mubanze musorooze emberya, mugibohe enganda, eyokebwe; baitu oburo bwo mubuhunike omu nguli yange.’ ”

³¹Yesu akabacwera orufumo orundi ati: “Obukama bw'omwiguru nibusisanizibwa nk'akasigo ka karadaali, omuntu aka yatwaire yasiga omu musiri gwe;[2]

³²ko kaba katoito okukira embibo zoona, baitu obu kakura, kanyeeta okukira ebisaka byona, kafooka muti, kandi enyonyi ziija zoombeka ebiju omu mataagi gaagwo.”

³³Akabacwera orufumo orundi ati: “Obukama bw'omwiguru nibusisanizibwa nk'ekitumbisa omukazi eki yatwaire yajwanganiza omu bihi bisatu by'ensaano, okuhika ensaano yoona obu yatumbire.”

³⁴Ebigambo ebi byona Yesu yabigambiraga ebitebe by'abantu nabirabya omu nfumo; busaho kigambo kyona eki yabagambiraga atacwire rufumo.

³⁵Kinu kikahikiriza omurangi eki yagambire ati: “Ndaabaza omu nfumo, nyatule ebyaserekerwe kuruga ha kuhangwa kw'ensi.”

³⁶Hanyuma Yesu yaruga omu kitebe yataaha omu nju. Abeegesebwa be baija nambere ali nibasaba bati: “Tusoborre orufumo rw'emberya y'omu musiri.”

³⁷Yabagarukamu ati: “Ogu anyakusiga embibo enungi, nuwe Mwana w'omuntu;

³⁸omusiri niyo ensi; embibo enungi nubo baana b'engoma y'omwiguru; emberya nubo baana b'Omubi;

³⁹kandi omunyanzigwa ayagisigire omu musiri nuwe Sitaani. Igesa niyo mpero y'ensi, kandi abagesi nubo bamalaika.

⁴⁰Emberya nkooku esoroozibwa kwokebwa omu murro, nukwo kiriba kiti ha mpero y'ensi.

⁴¹Omwana w'omuntu alituma bamalaika be, baihe omu bukama bwe byona ebirukwesiitaza n'enkozi z'ebibi zoona,

⁴²babanage omu kikoomi ky'omurro; oku nuho abantu balirirra banene ensaya.

⁴³Obu nubwo abahikiriire balyangasana nk'izooba omu bukama bwa Isebo. Anyakwina amatu, ahurre.”

⁴⁴“Obukama bw'omwiguru nibusisana nk'itungo eryaserekerwe omu musiri, omuntu eri yagwireho; nawe yaliswekerra. Habw'okusemererwa yagenda yatunda byona ebi akaba ainabyo, yagura omusiri ogu.”

⁴⁵“Kandi obukama bw'omwiguru nibusisana nk'omusuubuzi arukuserra amabaale amarungi ag'omuhendo.

⁴⁶Obu yazoireho limu ery'omuhendo mwingi, akagenda yatunda byona ebi akaba ainabyo, yaligura.”

⁴⁷“Kandi obukama bw'omu iguru nibusisanizibwa nk'akatimba akaategerwe omu nyanja, kaakwata encu eza buli mulingo;

⁴⁸obu kaijwire, abantu baakacundamu, baakata ha bwerre, baikarra, baakomorramu encu enungi, baazita omu bigega byabo, baitu embi baazinaga.

⁴⁹Nukwo kiriba kiti ha mpero y'ensi. Abamalaika baliija baihe abantu ababi omu bahikiriire,

⁵⁰nukwo ababi babanage omu kikoomi ky'omurro; oku nuho abantu balirirra kandi bakanena ensaya.

⁵¹“Ebigambo binu byona mubyetegeriize?” Baamugarukamu bati: “Ego.”

⁵²Uwe yabagambira ati: “Nahabweki buli mwegesa w'ebiragiro anyakutendekerwe habw'obukama bw'omwiguru, naasisana nyineeka anyakwiha omu lyahurro lye ebintu ebihyaka n'ebikuru.”

⁵³Yesu obu yamazire kubacwera enfumo ezi, yarugayo,

⁵⁴kandi obu yahikire omunsi y'owaabu, yabeegesa omu isorrokaniro lyabo. Abaamuhuliire bakahunirra nibakaguzangana bati: “Omuntu onu, amagezi ganu n'ebyamahano binu, akabiiha nkaha?

⁵⁵Onu tinuwe mutabani w'omubaizi? Nyina tinuwe Mariya? Kandi Yakobbo, Yosefu, Simooni na Yuda tinubo bagenzi be?

⁵⁶Banyaanya boona tibali owaitu hanu? Binu byona akabiiha nkaha?”

⁵⁷Nukwo kumwanga. Baitu Yesu yabagambira ati: “Omurangi aheebwa ekitiinisa hoona hoona, okwihaho omunsi y'owaabu n'omu ka ye.”

⁵⁸Oku, Yesu atakorreyo byamahano bingi habw'okutaikiriza kwabo.