Read Runyoro - rutooro Mat 14 Bible Online

Mat 14 - Runyoro - rutooro bible

Mat 14

¹Omu kasumi ako, ow'isaza Herode akahurra okurangaanwa kwa Yesu;

²yagambira abagaragara be ati: “Ogu nuwe Yohaana Omubatiza ahumbuukire omu bafu; nikyo arukukorra eby'amaani ebi.”

³Herode akaba akwasire Yohaana, yamuboha, yamuta omu nkomo habwa Herodiya, muka Filipo mugenzi we.

⁴Habwokuba Yohaana akahana Herode ati: “Ebiragiro bya Musa tibirukukwikiriza kuswera muramu waawe!”

⁵Herode noobu araaba yagondeze kumwita, baitu akatiina abantu, habwokuba Yohaana baamwetaga murangi.

⁶Ekiro ky'okuzaarwa kwa Herode obu kyahikire, muhara wa Herodiya akacekeca omumaiso g'abagenyi boona, Herode nawe yasemererwa,

⁷yaraganiza naarahira kumuha eki arakasaba kyona.

⁸Omwisiki habw'okuhanulirwa nyina, yagamba ati: “Mpeera ha sahaani hanu omutwe gwa Yohaana Omubatiza.”

⁹Ow'isaza yasaalirwa; baitu habw'okusangwa arahiire omu maiso g'abagenyi be, yaragira bagumuhe.

¹⁰Yatuma bagende omu nkomo batemeho Yohaana omutwe.

¹¹Baaguleetera ha sahaani, baaguha omwisiki, nawe yagutwarra nyina.

¹²Abeegesebwa ba Yohaana bakaija baatwara omutumbi, baaguziika; nubwo baagenzire kugambira Yesu.

¹³Yesu obu yahuliire amakuru ago, yarugayo ali omu bwato, yagenda omu irungu. Abantu obu baamanyire eki, baaruga omu mbuga, baamuhondera nibarubata.

¹⁴Obu yarugire omu bwato, yarora ekitebe kikooto ky'abantu, yabakwatirwa embabazi, yakiza abarwaire baabo.

¹⁵Izooba obu lyagoroobere, abeegesebwa bakaija baamugambira bati: “Hanu tuli omwirungu, kandi n'obwire bwaira; raga abantu bagende omu byaro beegurre ebyokulya.”

¹⁶Yesu yagamba ati: “Tibasemeriire kugenda; inywe mubahe ebyokulya.”

¹⁷Baamugambira bati: “Hanu twinaho emigaati etaano yonka n'encu ibiri.”

¹⁸Uwe yagamba ati: “Mubindeetere hanu.”

¹⁹Yaragira abantu kwikarra ha bunyansi; yakwata emigaati etaano n'encu ibiri, yararamira haiguru, yasiima, yabicwamu, emigaati yagiha abeegesebwa be, bagigabire abantu.

²⁰Boona baalya, baiguta. Abeegesebwa obu baasoroize oburagalika obwasaagireho, bwaijuza ebigega ikumi na bibiri.

²¹Abasaija abaaliire baahikaga nk'enkumi itaano, otabaliiremu abakazi n'abaana.

²²Yesu yaragira abeegesebwa be kugwerra omu bwato, bamubanze kwambuka nseeri y'enyanja, uwe abe naakyaraga abantu.

²³Obu yamazire kubaraga, yatemba orusozi ali wenka kubaza na Ruhanga. Obwire bwaira akyaliyo wenka,

²⁴baitu omu kasumi ako obwato bukaba buhikire omu nyanja hagati, nibuzongazonga habw'ebigonzi, habwokuba omuyaga gukaba gubaturukire omu maiso.

²⁵Ha nkoko y'okubanza, Yesu yaija nambere bali naarubatira ha maizi.

²⁶Abeegesebwa obu baamurozire naarubatira ha maizi baayekanga muno nibagamba bati: “Muzimu!” Baatoka habw'obutiini.

²⁷Ahonaaho Yesu yabahuumuza ati: “Muhuumule, ninyowe; mutatiina.”

²⁸Nukwo Petero kumugarukamu ati: “MUKAMA wange obu araaba ali iwe, ndagira nyije nambere oli nindubatira ha maizi.”

²⁹Yesu yamugarukamu ati: “Rugayo.” Nubwo Petero yarugire omu bwato, yarubatira ha maizi ahike hali Yesu;

³⁰baitu obu yarozire omuyaga gwaba mwingi, yatiina, yatandika kudikira omu maizi yayamirra ati: “MUKAMA wange, njuna!”

³¹Ahonaaho Yesu yagorra omukono gwe, yamukwata naagamba ati: “Iwe ow'okwikiriza kuke, habwaki noogurukyagurukya?”

³²Obu baataahire omu bwato, omuyaga gwaculeera.

³³Abakaba bali omu bwato baamuramya nibagamba bati: “Mazimakwo oli Mwana wa Ruhanga.”

³⁴Obu baamazire kwambuka enyanja, baahika omu nsi ya Genesareeti.

³⁵Abantu ab'omu kiikaro eki obu baamumanyiriire, baatuma hoona hoona omu kicweka eki, baamuleetera boona abarwaire.

³⁶Baamwesengereza ngu, haakire abarwaire bakwate ha mukugiro gw'ekijwaro kye; kandi boona abaakwasireho bakakira.