Read Runyoro - rutooro Mat 15 Bible Online

Mat 15 - Runyoro - rutooro bible

Mat 15

¹Abafalisaayo n'abeegesa b'ebiragiro bakaruga Yerusaalemu baija hali Yesu baamukaguza bati:

²“Habwaki abeegesebwa baawe batakuraatira migenzo y'abaisenkuruitwe? Bbo balya batabandize kunaaba omu ngaro.”

³Uwe yabagarukamu ati: “Habwaki na inywe mucwa Ekiragiro kya Ruhanga nimuhondera emigenzo yanyu inywenka?

⁴Ningira Ruhanga akaragira ati: ‘Otiinege sso na nyoko’; kandi ati: ‘Weena araajumaga ise rundi nyina mazimakwo aitwege.’

⁵Baitu inywe mugamba muti: ‘Omuntu kakuba agambira ise rundi nyina ati: Eki naakukuhaire, hati nkihongiire Ruhanga; ogu aba aganyirwe Ekiragiro ky'okutiina ise.’

⁶Nahabweki habw'okuhondera emigenzo yanyu, nikyo mudibiza Ekiragiro kya Ruhanga.

⁷Ngobya inywe! Isaaya akahikya obu yabarangireho naagamba ati:

⁸‘Abantu banu bantamu ekitiinisa kya ha minwa, baitu emitima yabu tendoho;

⁹bandamiza busa, nibeegesa ebyatairweho abantu ngu, niyo nyegesa ya Ruhanga’.”

¹⁰Aho Yesu akeeta abantu kumwirra haihi, yabagambira ati: “Mumpurre kandi mwetegereze:

¹¹ekitaaha omu kanwa k'omuntu, tikiri nikyo ekimusiisa; baitu ekiruga omu kanwa, nikyo kimusiisa.”

¹²Nubwo abeegesebwa baija bamugambira bati: “Omanyire Abafalisaayo nkooku babiihiirwe obu baahuliire orufumo obacweriire?”

¹³Yesu yagarukamu ati: “Ekimera kyona Isenyowe ow'omu iguru eki atarabyaire, kiriihwa.

¹⁴Mubaleke abo, beebembezi abafiire amaiso. Omufu w'amaiso obu ayebembera omufu w'amaiso mugenzi we, bombi bagwa omu kiina.”

¹⁵Baitu Petero yamusaba ati: “Otusoborre amakuru g'orufumo runu”

¹⁶Yesu yamugarukamu ati: “Obu na inywe timukeetegeriize?

¹⁷Timurukumanya ngu, ekintu kyona ekitaaha omu kanwa, kiraba omu nda, kandi kituruka aheeru?

¹⁸Baitu ekireetwa omu kanwa kiba kirugire omu mutima; eki nikyo kisiisa omuntu.

¹⁹Habwokuba omu mutima nuho haruga ebiteekerezo ebibi, obwisi, obusiihani, orwanju, obusuma, okuhangirra, n'okugeya.

²⁰Ebi nibyo bisiisa omuntu; baitu okulya otanaabire omu ngaro tikisiisa muntu.”

²¹Yesu yarugayo, yagenda omunsi ya Taya na Sidooni.

²²Omukazi enzaarwa ya Kanaani, akaija naayamirra ati: “MUKAMA wange, Mwijukuru wa Daudi, ongirre embabazi; muhara wange akwasirwe omwoyo mubi, gumuli kubi muno.”

²³Baitu Yesu atamugarukemu kantu. Abeegesebwa be baija baamwesengereza bati: “Mubinge, naatutokerra.”

²⁴Yesu yabagarukamu ati: “Nyowe ntatumwe handi kwihaho omu ntaama ezaabuzire ez'omu ruganda rwa Isirairi.”

²⁵Nubwo mukazi yaija yamuteereza amaju, naagamba ati: “MUKAMA wange, nkoonyera.”

²⁶Yesu yagarukamu ati: “Tikirukuhika kwaka abaana ebyokulya okabinagira embwa.”

²⁷Nandiki omukazi ati: “Ego, MUKAMA wange, baitu embwa nazo zirya oburagalika oburuga ha meeza ya mukama wazo.”

²⁸Yesu yamugarukamu ati: “Mukazi iwe, okwikiriza kwawe ka kwingi! Kikukolerwe nkooku orukugonza.” Ahonaaho muhara we yakira.

²⁹Yesu obu yarugire oku, yaraba ha musa gw'enyanja ya Galiraaya. Yatemba omu nsozi, yaikarayo.

³⁰Ebitebe bingi byaija nambere ali, baamuleetera abalema, abazingamire, abafu b'amaiso, abafu b'eminwa n'abandi baingi. Baabahikya omumaiso ge, yabakiza.

³¹Abantu bakahunirra obu baarozire abafu b'eminwa nibabaza, abazingamire nibakira, abaramaire nibarubata, n'abafu b'amaiso nibarora; baahaisaniza Ruhanga wa Isirairi.

³²Yesu akeeta abeegesebwa be nambere ali yabagambira ati: “Abantu banu nibankwasa embabazi habwokuba baamazire na nyowe hanu ebiro bisatu bataina eki barukulya; tindukwenda kubaraga bakagenda njara, tibaikara kugwa ensazi omu muhanda.”

³³Abeegesebwa be baamukaguza bati: “Omwirungu munu turaiha nkaha emigaati eraamara kuliisa abantu abarukwingana aho?”

³⁴Yesu nukwo kubakaguza ati: “Mwinaho emigaati ingaha?” Baamugarukamu bati: “Musanju n'obucu buke.”

³⁵Aho yaragira ekitebe ky'abantu baikarre hansi,

³⁶yakwata emigaati musanju n'encu, obu yamazire kusiima, yabicwamu, yabiha abeegesebwa be, nabo baabigabira abantu.

³⁷Boona baalya, baiguta; nukwo abeegesebwa kusorooza oburagalika obwasigaireho, bwaijuza ebigega musanju.

³⁸Boona abaaliire baahikaga enkumi ina, otabaliiremu abakazi n'abaana.

³⁹Yesu yaraga abantu, yagwerra omu bwato, yagenda omu kicweka kya Magadani.