Read Runyoro - rutooro Mat 16 Bible Online

Mat 16 - Runyoro - rutooro bible

Mat 16

¹Abafalisaayo n'Abasadukaayo bakaija hali Yesu kumulenga nibamusaba abooleke akokurorraho akarukuruga omwiguru.

²Yabagarukamu ati: “Omu bwire bwa rwebagyo mugamba muti: ‘Obwire buraaba burungi; habwokuba iguru niritukura.’

³Nyenkya kara mugamba muti: ‘Harabaho enjura y'ekiyaga, habwokuba iguru niritukura kandi libiihire.’ Mumanyire kukenga iguru nkooku lirukusisana, baitu timusobora kukenga ebihuniriza eby'obusumi bunu obunyakuroho.

⁴Abantu ab'obusinge obubi kandi obuhabire, nubo barukuserra ekihuniriza; baitu tibaliheebwa kihuniriza kwihaho kya Yona.” Nubwo yabarugireho, yagenda.

⁵Abeegesebwa be obu baahikire nseeri y'enyanja, baarora nkooku beeberwe kutwara emigaati.

⁶Yesu yabagambira ati: “Mwerinde kandi mwegendereze ekitumbisa ky'Abafalisaayo n'Abasadukaayo.”

⁷Baatandika kukaguzangana bati: “Ekirukumugambisa kiti, habwokuba titwina migaati.”

⁸Yesu obu yayetegeriize eki, nubwo yabagambiire ati: “Inywe ab'okwikiriza okuke! Eby'okutaba n'emigaati nimukibalizaho ki?

⁹Timukeetegeriize? Timurukwijuka nkooku naliisize abantu enkumi itaano emigaati etaano yonka? Mukasorooza ebigega bingaha eby'oburagalika?

¹⁰Rundi obu naaliisize abantu enkumi ina n'emigaati musanju, mukasorooza ebigega bingaha?

¹¹Habwaki mulemerwe kwetegereza nkooku ntabagambire ha by'emigaati? Mwerinde nu ekitumbisa ky'Abafalisaayo n'Abasadukaayo.”

¹²Nubwo baayetegeriize nkooku atabagambire okwerinda ekitumbisa ky'Emigaati, baitu okwerinda enyegesa y'Abafalisaayo n'Abasadukaayo.

¹³Yesu yahika omu kicweka kya Kaisaariya orwa Filipi, yakaguza abeegesebwa be ati: “Omwana w'omuntu abantu bamweta bata?”

¹⁴Baamugarukamu bati: “Abamu bagamba ngu: Nuwe Yohaana Omubatiza; abandi ngu: Nuwe Eriya; abandi ngu: Nuwe Yeremiya rundi omu hali abarangi.”

¹⁵Nandiki Yesu ati: “Baitu inywe munyeta muta?”

¹⁶Simooni Petero yamugarukamu ati: “Niiwe Kristo, Omwana wa Ruhanga Atafa.”

¹⁷Yesu yamugarukamu ati: “Oli w'omugisa Simooni, mutabani wa Yona, habwokuba amazima ganu togamanyisiibwe muntu kwonka, baitu ogasuukuliirwe Isenyowe anyakuli omu iguru.

¹⁸Kandi ninkugambira nti: Niiwe Petero[3], kandi ha mwandara gunu nuho ndyombeka ekitebe ky'abeeserwe bange[4], n'amaani g'okuzima tigalikisingura.

¹⁹Ndikuha ebisumuruzo by'obukama bw'omu iguru. Kyona kyona eki oliboha omu nsi, kiribohwa n'omu iguru; kandi kyona eki olisumurra omu nsi, kirisumururwa n'omu iguru.”

²⁰Nubwo yateererra muno abeegesebwa be kutagambiraho muntu n'omu nkooku ali Kristo.

²¹Okuruga obu Yesu yatandika kumanyisa abeegesebwa be nkooku ali w'okugenda Yerusaalemu kubonabonesibwa muno bakuru b'abantu, abanyakatagara abakuru, n'abeegesa b'ebiragiro; n'okwitwa kandi ahumbuurwe haahingwireho ebiro bisatu.

²²Petero yamugarra ha rubaju, yatandika kumuhana ati: “MUKAMA wange, eki nikikafuuhe! Tikirukwija kukubaho.”

²³Baitu Yesu yahinduka, yagambira Petero ati: “Ngaruka enyuma iwe Sitaani! Onfookiire muhingo, habwokuba ebi orukuteekereza tibiri bya Ruhanga, baitu by'abantu.”

²⁴Nubwo Yesu yagambiire abeegesebwa be ati: “Weena anyakugonza kumpondera, ayehwemu wenka, ahimbe omusaraba gwe, ampondere.

²⁵Weena anyakutaatira obwomeezi bwe, alibufeerwa; kandi weena anyakuhayo obwomeezi bwe habwange, alibutunga.

²⁶Omuntu kirimugasira ki okulya ensi yoona, baitu akafeerwa obwomeezi bwe? Rundi kintu ki omuntu eki alihayo kucungura obwomeezi bwe?

²⁷Omwana w'omuntu aliija n'abamalaika be omu kitiinisa kya Ise, nubwo alisasura buli muntu naasigikira ha bikorwa bye.

²⁸Mali mali nimbagambira nti: Haroho abeemeriire hanu abatalihikwaho rufu batakarozire Omwana w'omuntu naizira omu bukama bwe.”