Read Runyoro - rutooro Mat 17 Bible Online

Mat 17 - Runyoro - rutooro bible

Mat 17

¹Obu haahingwireho ebiro mukaaga, Yesu yatwara Petero, Yakobbo na Yohaana mugenzi we, yabatembya ha rusozi oruraihire bali bonka.

²Yahinduka omumaiso gaabo, amaiso ge gaayangasana nk'izooba, n'ebijwaro bye byayera tiitiiti.

³Nubwo Musa na Eriya baazooka nibabaza nawe.

⁴Petero yagambire Yesu ati; “MUKAMA wange, kibaire kirungi itwe kusangwa hanu; obu oraaba nogonza, kanyombeke hanu obusiisira busatu: akamu kaawe, akandi ka Musa, n'akandi ka Eriya.”

⁵Obu akaba naakyabaza, haija ekicu ekirukwangasana, kyabasiikiriza; kandi iraka lyaruga omu kicu, nirigamba liti: “Onu nuwe Mwana wange omugonzibwa ou nsiima; mumuhurre.”

⁶Abeegesebwa obu baahuliire eki, baagwa bajuumaire, bakwasirwe obutiini bwingi.

⁷Yesu yaija yabakwataho naagamba ati: “Mwimuke, muleke kutiina,”

⁸Obu bainunwire amaiso gaabo, batarole muntu, kwihaho Yesu wenka.

⁹Obu bakaba nibasirimuka orusozi, Yesu yabateererra ati: “Eki mwolekerwe, mutakigambiraho muntu weena, okuhikya Omwana w'omuntu obu alikamara kuhumbuuka omu bafu.”

¹⁰Abeegesebwa be nukwo kumukaguza bati: “Habwaki abeegesa b'ebiragiro bagamba ngu: Eriya nuwe alibanza kwija?”

¹¹Yabagarukamu ati: “Mazimakwo Eriya nuwe alibanza kwija, nukwo atereekereze byona.

¹²Nyowe nimbagambira nti: Eriya akaija ira, abantu batamumanye, baitu bakamukora kyona eki baagondeze. Omwana w'omuntu nawe nukwo balimubonabonesa bati.”

¹³Aho nuho abeegesebwa be baayetegereriize nkooku arukubagambira ebyo Yohaana Omubatiza.

¹⁴Obu baahikire ha kitebe ky'abantu, omusaija akaija yamutereza amaju, naagamba ati:

¹⁵“MUKAMA wange, girra mutabani wange embabazi, habwokuba agwa ensimbo kandi zimubonabonesa muno; emirundi nyingi zimunaga omu murro n'omu maizi.

¹⁶Nkamuleetera abeegesebwa baawe, baitu batasobole kumukiza.”

¹⁷Yesu yamugarukamu ati: “Haa! Inywe ab'akasumi kanu ak'obutaikiriza kandi abahabire, ndihikya nkaha okwikara na inywe nti? Ndibagumiisiriza kuhikya di? Mumundeetere hanu.”

¹⁸Yesu yacoomera omwoyo omubi, gwamurugamu, omwojo yakira ahonaaho.

¹⁹Ebi obu byahoire nubwo abeegesebwa baizire hali Yesu baamukaguza omu nsita bati: “Habwaki itwe tukalemwa kugubinga?”

²⁰Uwe yabagarukamu ati: Habw'okwikiriza kwanyu okuke. Mazimakwo nimbagambira nti: Obu muraaba mwina okwikiriza okurukwingana nk'akasigo ka karadaali, muligambira orusozi oru muti: “Sinduka hanu, ogende hali kandi rulirugaho; busaho kintu kyona ekiribalema.” [

²¹Omwoyo omubi ogwa mulingo gunu tigubingwa kindi, kwihaho okusaba n'okusiiba.]

²²Yesu n'abeegesebwa be obu bakaba bakyali Galiraaya, nubwo yabagambiire ati: “Omwana w'omuntu naija kuheebwayo omu mikono y'abantu,

²³balimwita, kandi obu halihinguraho ebiro bisatu alihumbuurwa.” Aho bbo baatuntura muno.

²⁴Obu baahikire Kafaranaumu, abasorooza b'omusoro gw'Enju ya Ruhanga baizira Petero baamukaguza bati: “Omwegesa wanyu taha musoro?”

²⁵Yabagarukamu ati: “Aguha.” Petero obu yataahire omu ka, Yesu yabanza kumukaguza ati: “Simooni nooteekereza ki? Abakama ab'omunsi, omusoro n'obusuuru babiihaho bantu ki? Babiihaho abaana baabo rundi abantu abandi?”

²⁶Petero obu yamugarukiremu ati: “Abantu abandi”, nubwo Yesu yamugambira ati: “Nahabweki abaana baabu, ebi tibirukubakwataho.

²⁷Baitu habw'okutabeesiitaza, genda ha nyanja, onagemu irobo, encu ei orabanza kukwasa, ogiihemu; obu orayesamya akanwa kaayo, orasangamu sente;[5] ogibasasule, gube musoro gwange n'ogwawe.”