Read Runyoro - rutooro Mat 18 Bible Online

Mat 18 - Runyoro - rutooro bible

Mat 18

¹Omu kasumi ako, abeegesebwa bakaija hali Yesu baamukaguza bati: “Arukukira obukuru omu bukama bw'omu iguru, nooha?”

²Yesu yayeta omwana omuto, yamwemereza hagati yabu,

³yagamba ati: “Mazima nimbagambira nti: Obu mutalihinduka, mukaba nk'abaana abato, timulitaaha omu bukama bw'omwiguru.

⁴Weena anyakwebundaaza nk'omwana omuto onu, nuwe arukukira obukuru omu bukama bw'omwiguru.”

⁵“Weena anyakujwahukirra omwana omuto nk'onu omu ibara lyange, buli ajwahukiriire nyowe.

⁶Baitu weena alyesiitaza omu ha baana abato banu abarukunyikiriza, haakire abohwe omu bikya orubengo, anagwe omu nziha y'enyanja.

⁷“Ensi erikibona habw'ebyesiitazo! Mazima ebyesiitazo tibiri by'okuburaho, baitu alikibona ogu anyakubireeta!

⁸Kakuba omukono gwawe rundi okuguru kwawe bikuleetereza kusiisa, bitemeho obinage hara; haakire otaahe omu bwomeezi oramaire rundi ogookere, kukira kunagwa omu murro ogutahwaho oina emikono ebiri rundi amaguru abiri.

⁹Kandi eriiso lyawe obu liraaba nirikuleetereza kusiisa, liihemu, olinage hara; haakire otaahe omu bwomeezi oina eriiso limu, okukira kunagwa omu murro ogutaraara oina amaiso abiri.

¹⁰ “Mwerinde, muleke kugaya omu ha bato banu, habwokuba nimbagambira nti: Omwiguru bamalaika baabo baikara nibarora amaiso ga Isenyowe anyakuli omu iguru. [

¹¹Ningira Omwana w'omuntu akaija kugarra ekyabuzire.]”

¹²Nimuteekereza muta? Omuntu kakuba aba aina entaama kikumi, emu hali zo ekabura, tasiga kyenda na mwenda ha nsozi akagenda kuserra enyakubuzire?

¹³Kakuba agizoora, mazimakwo nimbagambira nti: “Agisemererwa okukira ziri kyenda na mwenda ezitarabuzire.

¹⁴Na Isenyowe ow'omu iguru nukwo atagonza omu ha bato abo ahwerekerre.”

¹⁵“Mugenzi waawe obu araakusiisiraga, genda omugambire eki asobeze muli inywenka. Kakuba akuhuliriza, buli mugenzi waawe omwegaruliire.

¹⁶Baitu kakuba atakuhuliriza, genda n'omuntu omu rundi babiri, nukwo kyona eki muraagamba kigumibwe baakaiso babiri rundi basatu.

¹⁷Kakuba ayanga kubahuliriza, kigambire ekitebe ky'abaikiriza; kandi kakuba nabo ayanga kubahuliriza, omusisanize Omunyaihanga rundi omusorooza w'omusoro.

¹⁸“Mazima nimbagambira nti: Kyona kyona eki muliboha omunsi, kiribohwa n'omwiguru; kandi kyona eki mulisumurra omunsi, kirisumururwa n'omwiguru.

¹⁹Ninyongera kubagambira nti: Kakuba babiri hali inywe muraikirraniza omunsi ha kintu kyona eki murukusaba, Isenyowe ow'omwiguru alikibaha.

²⁰Nambere ababiri rundi abasatu beesorooleza omu ibara lyange, ndaabaga hagati yabo.”

²¹Nubwo Petero yaizire yamukaguza ati: “Waitu, mugenzi wange obu aransiisiraga, ndamuganyiraga emirundi ingaha? Okuhika emirundi musanju?”

²²Yesu yamugarukamu ati: “Tindukukugambira ngu okuhika emirundi musanju; baitu ohikyege nsanju emirundi musanju.”

²³“Nahabweki obukama bw'omu iguru nibulengesanizibwa nk'omukama ayagondeze abaheereza be bamubarre ebintu bye.

²⁴Obu yatandikire kubara nabo, baamuleetera omu anyakwina ibanja lye ly'obukaikuru bwa siringi;

²⁵kandi habw'okutasobora kusasura, mukama we yaragira kumutunda hamu na mukazi we, n'abaana be, na byona ebi akaba ainabyo, nukwo amale ibanja.

²⁶Omuheereza yateeza amaju yamwesengereza ati; ‘Mukama wange, ngumiisiriza, ndaakusasura zoona.’

²⁷Mukama we yamugirra embabazi, yamulekera, kandi yamuganyira ibanja eri.

²⁸“Baitu omuheereza ogu obu yaturukire aheeru, yatangaana omu ha baheereza bataahi be, ow'akaba amuliireho ibanja erya sente nke muno; yamukwata, yamuniga naagamba ati: ‘Nsasura.’

²⁹Omuheereza mutaahi we yagwa hansi, yamwesengereza ati: ‘Ngumiisiriza, ndaakusasura.’

³⁰Baitu uwe yayanga, yagenda yamuta omu nkomo okuhika obu alikamara ibanja.

³¹Abaheereza bataahi be obu baarozire ebibaireho, baasaalirwa muno, baagenda baagambira mukama wabu byona ebibaireho.

³²Nubwo mukama we yamweta yamugambira ati: ‘Iwe omuheereza omubi! Nkuganyiirege ibanja eri lyona habw'okunyesengereza;

³³na iwe tokuganyiire omuheereza mutaahi waawe, nkooku nyowe nkuganyiire?’

³⁴Mukama we yabiihirwa, yamukwasa abalinzi b'enkomo okuhika obu alikasasura ibanja lyona.

³⁵Isenyowe ow'omu iguru nukwo alibakora ati, obu muraaba mutarukuganyirangana n'omutima gumu.”