Read Runyoro - rutooro Mat 19 Bible Online

Mat 19 - Runyoro - rutooro bible

Mat 19

¹Yesu obu yamazire kugamba ebi, yaruga Galiraaya yagenda omu kicweka kya Buyudaaya nseeri y'ekisaaru Yorudaani;

²ebitebe by'abantu baingi byamuhonderayo, yabakiza endwara.

³Abafalisaayo baija nambere ali, baamulenga nibamukaguza bati: “Ebiragiro bya Musa nibiikiriza omusaija kubinga mukazi we naamujunaana ensonga yoona?”

⁴Yesu yabagarukamu ati: “Timukasomaga ngu, Ogu ayabahangire kuruga omu kubanza, akahanga omusaija n'omukazi?

⁵Yayongera ati: ‘Nikyo omusaija araalekeraga ise na nyina agumire hali mukazi we, kandi ababiri abo bafooke mubiri gumu.’

⁶Nahabweki baba batakyali babiri, baitu omu Ruhanga eki yateeraniize, hatalibaho muntu akyahukaniza.”

⁷Abafalisaayo baagaruka baamukaguza bati: “Kandi habwaki Musa yaikiriize omuntu kuha mukazi we ebbaruha y'okwahukana, nukwo amubinge?”

⁸Yabagarukamu ati: “Habw'okugumangana kw'emitima yanyu nikyo Musa yabaikiriize okubinga bakazi banyu, baitu okuruga kara koona kikaba kitalikwo.

⁹Kandi nimbagambira nti: Omuntu weena anyakubinga mukazi we atamutuzire obusiihani, akaswera ondi, buli asiihaine; kandi weena aliswera omukazi anyakubingirwe, buli nawe asiihaine.”

¹⁰Abeegesebwa be baamugambira bati: “Eby'omusaija n'omukazi obu biraaba biri biti, haakire omuntu okutaswera.”

¹¹Baitu uwe yabagarukamu ati: “Tibali boona abasobora kuhondera eki ngambire, kwihaho abo bonka Ruhanga aba akihaire.

¹²Habwokuba haroho abakonwa abaazairwe kwo, kandi haroho abaakonerwe abantu, kandi haroho abaayekonere bonka habw'obukama bw'omwiguru. Arukusobora kukwata kinu, akikwate.”

¹³Nubwo baamuleetiire abaana abato abakwateho, abasabire. Abeegesebwa be baacoomera ababalesire;

¹⁴baitu Yesu yabagambira ati: “Muleke abaana bato baije nambere ndi, mutabatanga; habwokuba abali nk'abo, obukama bw'omwiguru bwabo.”

¹⁵Nubwo yabataho emikono, yarugayo.

¹⁶Omuntu akaija hali Yesu, yamukaguza ati: “Mwegesa, kikorwa ki ekirungi eki nsemeriire kukora, nukwo ntunge obwomeezi obutahwaho?”

¹⁷Yamugarukamu ati: “Nonkaguliza ki ha kintu ekirungi? Haroho omurungi omu wenka. Obu oraaba noogonza kutaaha omu bwomeezi, okwatege Ebiragiro.”

¹⁸Uwe yamukaguza ati: “Biragiro ki?” Yesu yamugarukamu ati: “Otaliita. Otalisiihana. Otaliiba. Otalihangirra.

¹⁹Otiinege sso na nyoko. Ogonzeege mutaahi wawe nkooku oyegonza wenka.”

²⁰Omusigazi ogu yamugarukamu ati: “Ebi byona nkabikwata, ninkuyaburwaho kiha?”

²¹Nandiki Yesu ati: “Obu oraaba noogonza kuhikirra, genda otunde ebyawe byona, sente eziraarugamu ozigabire abaseege, nubwo olitunga itungo omwiguru; nukwo oije onkuraatire.”

²²Omusigazi obu yahuliire eki, yagenda agwerirwe, habwokuba akaba aina itungo lingi.

²³Yesu yagambira abeegesebwa be ati: “Mazimakwo nimbagambira nti: Ka nikiremeera omuguuda kutaaha omu bukama bw'omwiguru.

²⁴Ninyongera kubagambira nti: Nikirahuka engamiya kuraba omu nyindo y'enkinzo, kukira omuguuda kutaaha omu bukama bwa Ruhanga.”

²⁵Abeegesebwa be obu baahuliire kinu, baahunirra muno, baagamba bati: “Mara nooha alisobora kujunwa?”

²⁶Baitu Yesu yabarolerra naabagambira ati: “Kinu abantu tibarukukisobora, baitu Ruhanga naasobora byona.”

²⁷Nubwo Petero yamukaguza ati: “Dora itwe tukasiga byona twakuhondera; obu, tulitunga ki?”

²⁸Nandiki Yesu ati: “Mazimakwo nimbagambira nti: Omu bwomeezi oburukwija, Omwana w'omuntu obu aliikarra ha kitebe kye eky'ekitiinisa, na inywe abampondiire mulikarra ha bitebe ikumi na bibiri, mucwere emisango enganda ikumi na ibiri eza Isirairi.

²⁹Omuntu weena ayasigire amaju ge, rundi bagenzi be, rundi banyaanya, rundi ise, rundi nyina, rundi abaana be, rundi ebibanja bye habwange, aliheebwa emirundi kikumi, kandi atunge n'obwomeezi obutahwaho.

³⁰Baitu baingi ab'okubanza baliba b'enyuma, kandi ab'enyuma baliba b'okubanza.”