Read Runyoro - rutooro Mat 2 Bible Online

Mat 2 - Runyoro - rutooro bible

Mat 2

¹Yesu obu yazairwe omu Betelehemu orwa Buyudaaya, omu businge bwa Herode Omukama, abasaija abanyamagezi bakaija Yerusaalemu nibaruga Burugaizooba, baakaguza bati:

²“Omukama w'Abayudaaya anyakuzairwe araha? Habwokuba tukarora enyunyuuzi ye Burugaizooba, hati twizire kumuramya.”

³Omukama Herode obu yahuliire eki, yatuntura hamu n'aba Yerusaalemu boona.

⁴Nubwo yasoroize banyakatagara abakuru n'abeegesa b'ebiragiro yabakaguliriza nambere Kristo ali w'okuzaarwa.

⁵Baamugarukamu bati: “Omu Betelehemu orwa Buyudaaya; habwokuba nukwo kyahandiikirwe omurangi kiti:

⁶‘Iwe Betelehemu orw'omu nsi ya Yuda, toli muke omu balemi baayo; habwokuba omuli iwe nuho haliruga omulemi ow'alirema abantu bange Abaisirairi’.”

⁷Nubwo Herode yayesire abanyamagezi kumurora omunsita, yabakaguza muno bamumanyise akasumi konyini aka baaroliiremu enyunyuuzi.

⁸Yabatuma Betelehemu ati: “Mugende muserre muno omwana, obu muraamuzoora, mwije mummanyise, nukwo na nyowe ngende mmuramye.”

⁹Obu baamazire kuhurra omukama ebi yabaragiire, baagenda; kandi enyunyuuzi eri ei baaroliire Burugaizooba yabeebembera kuhika obu yayemeriire omwana nambere akaba ali.

¹⁰Obu baarozire enyunyuuzi, baakyanganuka muno.

¹¹Kandi obu baataahire omunju, baarora omwana na Mariya nyina, baajumara, baamuramya, baasumurra ensaho zaabo, baamurabuka ebisembo: ezaabbu, obubbani, n'emigaju.

¹²Kandi obu baahabwirwe Ruhanga omu kirooto okutagaruka hali Herode, bakatwarwa omuhanda gundi kugarukayo owabu bo.

¹³Abanyamagezi obu baamazire kugenda, malaika wa MUKAMA yabonekera Yosefu omu kirooto, naagamba ati: “Imuka, otwale omwana na nyina, osingirwe Misiri, oikaleyo okuhika obu ndikugambira; habwokuba Herode ayeteekaniize kuseera omwana n'okumwita.”

¹⁴Nubwo Yosefu yaimukire ekiro, yatwara omwana na nyina, baagenda Misiri;

¹⁵baikarayo kuhikya Herode obu yafiire. Nukwo MUKAMA eki yagambisize omurangi kihikirre ngu: “Nkeeta omwana wange aruge Misiri.”

¹⁶Herode obu yayetegeriize abanyamagezi nkooku baamugobiize, yakwatwa ekiniga kingi muno. Yaragira kwita abaana aboojo boona abakaba bali omu Betelehemu n'omu byaro ebiherraineho, abakaba bahikize emyaka ebiri n'abatakagihikize, naihirra ha kasumi abanyamagezi aka baamugambiire.

¹⁷Aho omurangi Yeremiya eki yarangire kyahikirra ngu:

¹⁸“Iraka likahulirwa omu Rama, ery'okutaabaana n'okuteera empamo; Rakeeli naalirirra abaana be, atarukwenda kuhuu muzibwa, habwokuba boona bahoireho.”

¹⁹Herode obu yamazire kufa, malaika wa MUKAMA yabonekera Yosefu omu kirooto ali Misiri,

²⁰naagamba ati: “Imuka, otwale omwana na nyina, mugaruke omunsi ya Isirairi; habwokuba abaaserraga kwita omwana bafiire.”

²¹Nubwo yaimukire, yatwara omwana na nyina, baagarukayo omunsi ya Isirairi.

²²Baitu Yosefu obu yahuliire Akiraho nkooku nuwe atiire engoma ya Herode ise, yatiina kugyayo. Obu yahabwirwe Ruhanga omu kirooto, yarugayo yagenda omu isaza lya Galiraaya.

²³Yagenda yaikara omu rubuga orurukwetwa Nazareeti, nukwo ekyagambirwe abarangi kihikirre kiti: “Alyetwa Munyanazareeti.”