Read Runyoro - rutooro Mat 20 Bible Online

Mat 20 - Runyoro - rutooro bible

Mat 20

¹“Obukama bw'omwiguru nibusisana nyineeka ayazindukire nyenkya kara kugulirra abakozi b'okulima omu rugonjo rwe rw'emizaabbibbu.

²Obu yamazire kwikirraniza nabo empeera y'ekiro kimu, yaboohereza omu rugonjo rwe orw'emizaabbibbu.

³Obu yaturukire nka ha saaha isatu, yarora abandi beemeriire omu katale bataina eki barukukora;

⁴yabagambira ati: ‘Na inywe mugende omu rugonjo rwange mukole, ninyija kubaha ekibasemeriire.’ Baagenda.

⁵Yayongera yaturuka nka ha saaha mukaaga na ha saaha mwenda, nabwo yakora ati.

⁶Kandi ha saaha ikumi n'emu yaturuka aheeru, yasanga abandi beemeriire, yabakaguza ati: ‘Habwaki musiibire hanu ekiro kyona mutaina eki murukukora?’

⁷Baamugarukamu bati: ‘Habwokuba busaho muntu atwesire.’ Yabagambira ati: ‘Na inywe mugende omu rugonjo rwange mukole.’

⁸“Izooba obu lyagoroobere, mukama w'orugonjo rw'emizaabbibbu yagambira omukeeto we ati: ‘Yeta abakozi, obahe empeera yabo, obandize ha b'enyuma, omalirirre ha b'okubanza.’

⁹Abaatandikire ha saaha nka ikumi n'emu obu baizire, buli omu yatunga empeera y'ekiro kimu.

¹⁰Ab'okubanza obu baizire, baanihira ngu nibaija kusasurwa kukiraho; baitu buli omu omuli bo nawe akasasurwa empeera y'ekiro kimu.

¹¹Obu bakaba nibakyagiheebwa, baahyemera nyineeka,

¹²nibakaguza bati: ‘Abaizire hanyuma bakozire esaaha emu yonka, kandi obainganiize na itwe abakozire ekiro kyona tutiirwe n'omusana?’

¹³Uwe yagarukamu omu hali bo ati: ‘Mugenzi wange, tinkukozire kubi. Tituragainege empeera y'ekiro kimu?

¹⁴Twara eyawe, ogende; ngondeze kusasura owa hanyuma nkooku nkusaswire.

¹⁵Haroho arukuntanga kukozesa ebyange nkooku ndukugonza? Rundi nondora eriiso libi habw'obwenda bwange?’

¹⁶Nahabweki ab'enyuma baliba b'okubanza, kandi ab'okubanza baliba b'enyuma.”

¹⁷Yesu obu akaba naagenda Yerusaalemu, akagarra abeegesebwa be ikumi na babiri ha rubaju. Obu bakaba nibakyagenda yabagambira ati:

¹⁸“Hati nu, nitugenda Yerusaalemu; Omwana w'omuntu naija kuheebwayo hali abanyakatagara abakuru n'abeegesa b'ebiragiro, balimucwera omusango gw'okumwita,

¹⁹kandi balimuhayo hali Abanyamahanga kumusekeereza, okumuteera enkoba, n'okumubamba ha musaraba; baitu alihumburwa hahingwireho ebiro bisatu.”

²⁰Nubwo nyina batabani ba Zebedaayo yaija nabo hali Yesu, yateeza amaju omumaiso ge aina eki arukumusaba.

²¹Yesu yamukaguza ati: “Noyenda ki?” Yamugarukamu ati: “Ikiriza abaana bange banu baikarre, omu ha mukono gwawe ogw'obulyo ondi ha gw'emoso omu bukama bwawe.”

²²Baitu Yesu yagarukamu ati: “Timurukumanya eki murukusaba. Nimusobora kubagana ha mabone aga ndukwija kubonabona?” Baamugarukamu bati: “Nitusobora.”

²³Nandiki Yesu ati: “Amabone aga ndukwija kubonabona na inywe muligabona, baitu okwikarra ha mukono gwange ogw'obulyo n'ogw'emoso, tali nyowe arukukigaba, baitu ky'abo aba kiteekaniriziibwe Isenyowe.”

²⁴Kandi ikumi obu baahuliire eki, babiihirirwa banyineemu abo ababiri.

²⁵Baitu Yesu yayeta boona, yabagambira ati: “Mumanyire abalemi b'Abanyamahanga nkooku babalemesa itwale, kandi n'abakuru baabo nkooku babaragiza obusobozi.

²⁶Tikiriba kiti omuli inywe; baitu arukwenda kuba mukuru omuli inywe, naasemerra kuba muheereza wanyu;

²⁷kandi arukwenda kuba w'okubanza omuli inywe, naasemerra kuba muheereza wanyu,

²⁸nkooku Omwana w'omuntu ataraiziire kuheerezibwa baitu okuheereza, n'okuhayo obwomeezi bwe okucungura baingi.”

²⁹Obu bakaba nibaruga Yeriko, ekitebe kikooto ky'abantu kyahondera Yesu.

³⁰Kandi abafu b'amaiso babiri abakaba baikaliire ha muhanda rubaju, obu baahuliire ngu, Yesu naahingura, baayamirra nibagamba bati: “Omwana wa Daudi, tugirre embabazi!”

³¹Ekitebe ky'abantu kyabacoomera nikibaigaliriza ngu baculeere; baitu bbo baatokera haiguru okukiraho bati: “Waitu, Omwana wa Daudi, tugirre embabazi!”

³²Yesu yayemerra, yabeeta, yabakaguza ati: “Nimugonza mbakorre ki?”

³³Baamugarukamu bati: “Waitu, nitugonza amaiso gaitu gaiguke.”

³⁴Yesu yabakwatirwa embabazi, yabakora ha maiso, ahonaaho baarora, kandi baamuhondera.