Read Runyoro - rutooro Mat 21 Bible Online

Mat 21 - Runyoro - rutooro bible

Mat 21

¹Obu bairiire haihi na Yerusaalemu, baahika Betifage, ha rusozi rw'emiti Oliva. Nubwo Yesu yatumire babiri ha beegesebwa be,

²naabagambira ati: “Mugende omu kyaro eki muroleriire, nimwija kusangayo endogoyi esibikirwe, ina omwana gwayo; muzisibule, muzindeetere.

³Obu haraabaho omuntu arukubakaguza, mumugarukemu muti: ‘Mukama waitu naazeetaaga’; naija kuzigarra bwango.”

⁴Kinu kikabaho kuhikiriza ekyagambirwe omurangi ati:

⁵“Mugambire abantu ba Siyoni muti: Dora, omukama waawe naija nambere oli, ayebundaize, atembere endogoyi, endogoyi ento, omwana gw'endogoyi.”

⁶Abeegesebwa baagenda, baakora nkooku Yesu yabaragiriire;

⁷baaleeta endogoyi n'omwana gwayo, baazitaho ebijwaro byabo, Yesu yaikarraho.

⁸Abantu baingi baayarra ebijwaro byabo omu muhanda, abandi baacwa amataagi g'emiti, baagarra omu muhanda.

⁹Ebitebe by'abantu ebikaba bimwebembiire n'ebyamukuraatiire baakatoka nibagamba bati: “Hangiriza Omwana wa Daudi! Ahaisanizibwe arukwija omu ibara lya Atahwaho! Hangiriza anyakusinga haiguru muno!”

¹⁰Obu yataahire Yerusaalemu, orubuga rwona rwayooka, abantu baakaguzangana bati: “Ogu nooha?”

¹¹Ebitebe by'abantu baagarukamu nibagamba bati: “Onu nuwe Yesu, omurangi anyakurugire Nazareeti orwa Galiraaya.”

¹²Yesu akataaha omu Nju ya Ruhanga, yatandika kubinga boona abakaba nibatundiramu n'abakaba nibagurramu, yajuumika emeeza ez'abakaba nibahingisa sente, n'entebe z'abo abakaba nibatunda amaiba.

¹³Yabagambira ati: “Kikahandiikwa kiti: ‘Enju yange eraayetwaga nju y'okusabiramu’; baitu inywe mugifoire bwingira bw'abanyagi.”

¹⁴Abafu b'amaiso n'abalema baija nambere ali omu Nju ya Ruhanga, yabakiza.

¹⁵Baanyakatagara abakuru n'abeegesa b'ebiragiro obu baarozire ebyamahano ebi yakozire, kandi n'abaana nibatokera omu Nju ya Ruhanga bati: “Hangiriza Omwana wa Daudi!” Baabiihirwa muno;

¹⁶baamukaguza bati: “Noohurra abo ebi barukugamba?” Yesu yabagarukamu ati: “Ego, mbihuliire; inywe timukasomaga muti: ‘Omu kanwa k'abaana abato n'enkerembe numwo watungire okukugizibwa okuhikire?’ ”

¹⁷Nubwo yabarugireho, yaturuka orubuga, yagenda Betaniya kugonyayo.

¹⁸Nyenkya, Yesu obu akaba naagaruka omu rubuga, yarumwa enjara.

¹⁹Obu yarozire omuti omutini ha muhanda rubaju, yaguhikaho, baitu tiyasangaho kantu okwihaho ebikoora byonka. Yagugambira ati: “Otaligarukira kwana ebijuma ebiro byona!” Ahonaaho omutini ogu gwahotoka.

²⁰Abeegesebwa be obu baakirozire baahunirra muno, nibagamba bati: “Omutini gunu gwahotoka guta bwango?”

²¹Yesu yabagarukamu ati: “Mazimakwo nimbagambira nti: Obu muraaba mwina okwikiriza mutarukugurukyagurukya, timulikora nk'ekyakorwa ha muti gunu kyonka, baitu noobu muligambira orusozi oru muti: ‘Sinduka ogwe omu nyanja’, nukwo kiriba.

²²Obu muraaba mwina okwikiriza, kyona eki muraasabaga nimwesengereza, muraakiheebwaga.”

²³Yesu obu yataahire omunju ya Ruhanga, banyakatagara abakuru n'abakuru b'abantu baija nambere ali nakyayegesa, baamukaguza bati: “Busobozi ki oburukukukoza binu, kandi okabuheebwa oha?”

²⁴Yesu yabagarukamu ati: “Na nyowe ka mbakaguze ekikaguzo kinu; obu murangarukamu, nubwo ndabagambira obusobozi oburukunkoza binu.

²⁵Okubatiza kwa Yohaana kukaruga nkaha? Kukaruga hali Ruhanga rundi omu bantu?” Bbo baatandika kuhakanizangana bati: “Obu turaagamba ngu: ‘Kukaruga hali Ruhanga’, naija kutukaguza ati: ‘Habwaki mutaramwikiriize?’

²⁶Baitu obu turaagamba ngu: ‘Kukaruga omu bantu’, nitutiina ekitebe ky'abantu, habwokuba boona bananukire Yohaana nkooku akaba ali murangi.”

²⁷Nukwo baagarukamu Yesu bati: “Titumanyire.” Uwe yabagambira ati: “Na nyowe tindukwija kubagambira obusobozi oburukunkoza binu.”

²⁸“Nimuteekereza muta? Omusaija akaba aina abatabani be babiri; akagenda yagambira omukuru ati: ‘Mwana wange, hati genda okole omu rugonjo rw'emizaabbibbu.’

²⁹Omwana yamugarukamu ati: ‘Tindukugyayo’, baitu hanyuma yayegarukamu, yagenda.

³⁰Isebo yagenda hali omuto yamugambira nk'ebi yagambiire omukuru. Nandiki uwe ati: ‘Ego taata,’ ka ngende; baitu tiyagyayo.

³¹Hali abo ababiri, nooha ayakozire ise eki akaba naagonza?” Baamugarukamu bati: “Omukuru.” Nandiki Yesu ati: “Mazimakwo nimbagambira nti: Abasorooza b'omusoro n'abamalaaya nibaija kubabanza kutaaha omu bukama bwa Ruhanga.

³²Habwokuba Yohaana Omubatiza akaija hali inywe naabooleka omuhanda ogu musemeriire kurabamu, mutamwikirize; baitu abasorooza b'omusoro n'abamalaaya bbo bakamwikiriza. Inywe noobu mwarozire eki, nabwo muteegarukemu mukamwikiriza.”

³³Yesu yabagambira ati: “Muhurre oruganikyo orundi. Hakaba haroho nyineeka ayabyaire orugonjo rw'emizaabbibbu, yaruzitirra, yalimamu endeeba, yayombekamu endindiro, yarusigira abapangisa, yagenda omu ihanga erindi.

³⁴Obusumi bw'okunoga emizaabbibbu obu bwahikire, yatuma abaheereza be hali abapangisa abo, bamutwekere ha bijuma by'emizaabbibbu ye;

³⁵abapangisa baakwata abaheereza be, omu baamuteera, owa kabiri baamwita, owa kasatu baamuteera amabaale.

³⁶Yagaruka yatumayo abaheereza abandi baingi okukiraho ab'okubanza; nabo nukwo baabakozire.

³⁷Hanyuma yabatumira mutabani we naateekereza ati: ‘Omwana wange baraamugayuka.’

³⁸Baitu abapangisa abo obu baarozire omutabani, baagambirangana bati: ‘Onu nuwe mugwetwa, leka tumwite, obugwetwa bube bwaitu.’

³⁹Baamukwata, baamuturukya aheeru y'orugonjo, baamwita.

⁴⁰Boojo, mukama w'orugonjo obu aliija, abapangisa abo alibakoraki?”

⁴¹Baamugarukamu bati: “Abapangisa abo ababi alibahwerekereza, bafe kubi, kandi orugonjo rwe arukwase abakozi abandi abaraamuha ebijuma omu kasumi kaabyo.”

⁴²Yesu yabagambira ati: “Timukasomaga Ekyahandiikirwe ekirukugamba kiti: ‘Ibaale lyonyini aboombeki eri baayangire niryo lyafookere bugumizo bw'enju; kinu nikyo Ruhanga yakozire, kandi nituhunirra kukirora’?

⁴³Nahabweki nimbagambira nti: Obukama bwa Ruhanga bulibaihwaho buheebwe ihanga erirukukora ebikorwa ebirungi. [

⁴⁴Omuntu weena anyakugwa ha ibaale eri, alicwacwanuka; baitu ibaale ou lirigwera, lirimusasangura.]”

⁴⁵Baanyakatagara abakuru n'Abafalisaayo obu baahuliire enganikyo ze, baamanya nkooku bali nubo arukugambaho.

⁴⁶Baitu obu baagondeze kumukwata, baatiina enkuyanja y'abantu, habwokuba baamwetaga murangi.