Read Runyoro - rutooro Mat 22 Bible Online

Mat 22 - Runyoro - rutooro bible

Mat 22

¹Yesu yayongera kubaganikiza oruganikyo orundi ati:

²“Obukama bw'omwiguru nibulengesanizibwa nk'omukama ayakoliire mutabani we obugenyi bw'okuswera.

³Yatuma abaheereza be kweta abo abakaba baraaliziibwe kwija ha bugenyi; baitu bbo batagonze kwija.

⁴Yagaruka yatuma abaheereza abandi naagamba ati: ‘Mugende mugambire abo abaraaliziibwe muti: Nteekaniize obugenyi bwange, nyisire enimi y'esajwa, kandi nteekaniize buli kintu, mwije mutaahe obugenyi.’

⁵Baitu abagenyi abaraaliziibwe batakifeeho, baayegendera, omu yagenda ha musiri gwe, ondi omu busubuzi bwe,

⁶abasigaireho baakwata abaheereza be, baabaswaza, baabaita.

⁷Omukama yabiihirwa muno, yatuma amahe ge, gaahwerekereza abaisi abo, gaayokya n'orubuga rwabo.

⁸Nubwo yagambiire abaheereza be ati: ‘Obugenyi buteekaniziibwe, baitu abaraaliziibwe tibabusemeriire.

⁹Hati nu, mugende omu ntangatangano z'emihanda, abantu baingi aba muraasangayo mubeete, baije ha bugenyi.’

¹⁰Abaheereza baagenda omu mihanda, baasorooza boona abaakasangirweyo, ababi n'abarungi; enju yaijura abagenyi.

¹¹“Baitu omukama obu yaizire kurora abagenyi, yasangamu omusaija atajwaire kijwaro ky'obugenyi;

¹²yamukaguza ati: ‘Mutaahi wange, munu otaahiremu ota, otajwaire kijwaro ky'obugenyi?’ Baitu uwe yaburwa eky'okugarukamu.

¹³Nubwo omukama yaragiire abaheereza be ati: ‘Mumubohe emikono n'amaguru, mumunage aheeru omu mwirima nambere abantu baliririrra kandi banene ensaya.’

¹⁴Habwokuba abeetwa baingi, baitu abakomwamu bake.”

¹⁵Abafalisaayo baagenda, baahanuura nkooku baraatega Yesu omu bigambo.

¹⁶Baamutumaho abeegesebwa baabo hamu n'ab'ekitebe kya Herode, baamugambira bati: “Mwegesa, tumanyire nkooku oli w'amazima, oyegesa omuhanda gwa Ruhanga omu mazima otaina n'omu ou orukutiina kandi tororra ha kitiinisa ky'abantu.

¹⁷Tugambire eki orukuteekereza. Kihikire kuha Kaisaali omusoro, rundi nangwa?”

¹⁸Baitu Yesu yakenga obugobya bwabo, yagamba ati: “Nimuntegera ki, bagobya inywe?

¹⁹Munyoleke siringi ei muha omusoro.” Baamuleetera siringi.

²⁰Yesu yabakaguza ati: “Ekisisani kinu n'ebihandiikirweho by'oha?”

²¹Baamugarukamu bati: “Bya Kaisaali.” Yesu yabagambira ati: “Ebya Kaisaali mubihe Kaisaali, n'ebya Ruhanga mubihe Ruhanga.”

²²Obu bahuliire eki, baahunirra, baamurugaho, baagenda.

²³Ha kiro eki, Abasadukaayo abagamba ngu, tiharoho okuhumbuuka kw'abafu, bakaija hali Yesu baamukaguza bati:

²⁴“Mwegesa, Musa akagamba ati: ‘Kakuba omuntu afa atazaire baana, mugenzi we aswere omufaakati ogu, nukwo bazaare kifa abaana.’

²⁵Owaitu oku, hakaba haliyo banyineemu musanju: Mukuru waabo akaswera omukazi, baitu yafa atakamuzaireho baana, yamugwetera mugenzi we.

²⁶Owa kabiri n'owa kasatu nabo nukwo bati, okuhikiza kimu ha wa musanju, boona batazaale.

²⁷Abo boona obu baahoireho omukazi nawe yafa.

²⁸Ha kuhumbuuka kw'abafu, omukazi ogu aliba muk'oha hali abo omusanju? Habwokuba boona bakamuswera.”

²⁹Yesu yabagarukamu ati: “Muhabire habw'okutamanya ebyahandiikirwe noobu bwakuba obusobozi bwa Ruhanga.

³⁰Habwokuba ha kuhumbuuka, tibaliswera kandi tibaliswerwa, baitu baliba bali nk'abamalaika omwiguru.

³¹Kandi ha by'okuhumbuuka kw'abafu, timukasomaga Ruhanga eki yabagambiire ati:

³²‘Ninyowe Ruhanga owa Abburahamu, Ruhanga wa Isaaka, kandi Ruhanga wa Yakobbo?’ Tali Ruhanga w'abafiire, baitu w'aboomeezi.”

³³Abantu obu baahuliire eki, baahunirra habw'okwegesa kwe.

³⁴Baitu Abafalisaayo obu baahuliire Yesu nkooku aculiize Abasadukaayo abatiire ibumbakanwa, baayesorooza hamu.

³⁵Omu hali bo, akaba ali looya, yamukaguza naamutega ati:

³⁶“Mwegesa, kiragiro ki ekikuru omu Biragiro?”

³⁷Yesu yamugarukamu ati: “Ogonzeege MUKAMA Ruhanga waawe n'omutima gwawe gwona, n'omwoyo gwawe gwona, n'amagezi gaawe goona.

³⁸Eki nikyo kiragiro ekikuru ekirukubanza.

³⁹Kandi ekya kabiri ekirukusisana n'eki, nikyo kinu: Ogonzeege mutaahi waawe nkooku oyegonza wenka.

⁴⁰Omu biragiro binu ebibiri, ebindi byona n'eby'abarangi numwo bisigikira.”

⁴¹Abafalisaayo obu bakaba beesoroize hamu, Yesu yabakaguza ati:

⁴²“Kristo nimumuteekerezaaho muta? Mwijukuru w'oha?” Baamugarukamu bati: “Mwijukuru wa Daudi.”

⁴³Yesu yagaruka yabakaguza ati: “Daudi, obu yagambisiibwe Mwoyo Ahikiriire, habwaki yamwesire MUKAMA we ati:

⁴⁴‘MUKAMA akagambira MUKAMA wange ati: Ikarra ha mukono gwange ogw'obulyo okuhika obu ndifoora abanyazigwa baawe akatebe k'ebigere byawe’?

⁴⁵Daudi obu araaba yayesire Kristo MUKAMA we, kandi obu, aba ata mwijukuru we?”

⁴⁶Busaho n'omu ayasoboire kumugarukamu; kandi okuruga ha kiro eki, hatabeho n'omu ayalengereho kumukaguza ebikaguzo ebindi.