Read Runyoro - rutooro Mat 23 Bible Online

Mat 23 - Runyoro - rutooro bible

Mat 23

¹Nubwo Yesu yagambiire ebitebe by'abantu n'abeegesebwa be ati:

²“Abeegesa b'ebiragiro n'Abafalisaayo balema omu kiikaro kya Musa;

³nahabweki muhurrege kandi mukuraatire byona ebi baraabagambiraga, baitu muleke kukora nka bo, habwokuba ebi bagamba, tibiri nibyo bakora.

⁴Baboha emigugu erukulemeera, etarukusobora kwetwekwa, bagyetwekesa abandi ha mitwe; baitu bbo bonka tibagonza kugitengesaaho n'orukumo rwabo.

⁵Bakora ebikorwa byabo byona nibagonza kurorwa abantu. Banyeesa ebihuuta byabo ebyahurwamu Ebiragiro, baraihya ebitutu by'ebijwaro byabo,

⁶bagonza ebiikaro by'omu maiso omu magenyi, n'entebe ez'ekitiinisa omu masorrokaniro,

⁷n'okuramukibwa omu butale, n'abantu okubeeta: Mwegesa.

⁸Baitu inywe mutalyetwa Mwegesa, habwokuba mwina omwegesa omu, kandi inywena muli iseemu.

⁹Mutalyeta muntu weena ow'omunsi isiinywe, habwokuba mwina Isiinywe omu, anyakuli omu iguru.

¹⁰Kandi mutalyetwa bakama, habwokuba mwina Mukama omu, nuwe Kristo.

¹¹Arukukira obukuru omuli inywe, araabaga muheereza wanyu;

¹²weena anyakwenyumiza, alibundaazibwa; kandi weena anyakwebundaaza, alinyumizibwa.”

¹³“Mulikibona ngobya inywe, abeegesa b'ebiragiro n'Abafalisaayo! Habwokuba mukingira abantu obukama bw'omu iguru na inywe timubutaahamu, kandi n'abarukugonza kubutaahamu timubaikiriza. [

¹⁴Mulikibona ngobya inywe, abeegesa b'ebiragiro n'Abafalisaayo! Habwokuba munyaga ebintu eby'omu maju g'abafaakati, kandi musaba endanda abantu babarole; nikyo mulicwererwa omusango ogurukukira obukooto.]

¹⁵“Mulikibona ngobya inywe, abeegesa b'ebiragiro n'Abafalisaayo! Habwokuba mwambuka amayanja mugendagenda omu mahanga habw'okuhindura omuntu omu. Obu mumara kumuhindura, mumufoora muntu w'okunagwa omu kiinongoro ky'omurro, mubi okukira inywe emirundi ebiri.

¹⁶“Mulikibona inywe abeebembezi abafu b'amaiso abagamba muti: ‘Kakuba omuntu naarahira Enju ya Ruhanga, tikiri kigambo; baitu kakuba naarahira ezaabbu y'omu Nju ya Ruhanga, kimusemeriire kuhikiriza endahiro ye.’

¹⁷Badoma inywe abafu b'amaiso! Ekirukukira obukuru nikiha, zaabbu rundi Enju ya Ruhanga enyakweza zaabbu egi?

¹⁸Kandi mugamba muti: ‘Kakuba omuntu naarahira itambiro, tikiri kigambo; baitu kakuba arahira ebinyakuli ha itambiro, kimusemeriire kuhikiriza endahiro ye.’

¹⁹Inywe abafu b'amaiso! Ekirukukiraho obukuru nikiha, ekihongwa rundi itambiro erirukweza ekihongwa?

²⁰Nahabweki ogu nanyakurahira itambiro, aba alirahire na byona ebinyakuliroho.

²¹Kandi na weena anyakurahira Enju ya Ruhanga aba agirahiire, kandi arahiire n'Ogu anyakugiikaramu.

²²N'anyakurahira iguru, aba arahiire ekitebe kya Ruhanga n'Ogu anyakukiikaliireho.

²³“Mulikibona ngobya inywe, abeegesa b'ebiragiro n'Abafalisaayo! Habwokuba muha ekicweka kya ikumi eky'omubwiga, n'eyobyo, n'emikubi endi; kandi timutaho mutima ebigambo ebikuru ebiri omu Biragiro: obwinganiza, embabazi n'okwikiriza. Binu nibyo mwakukozire, kandi ebindi nabyo muleke kubinagaija.

²⁴Inywe abeebembezi abafu b'amaiso, musengiija ebyokunywa kubiihamu omubu, kandi mumira engamiya!

²⁵“Mulikibona ngobya inywe, abeegesa b'ebiragiro n'Abafalisaayo! Habwokuba mwogya ekikopo n'esahaani haruguru, kandi kunu omu nda mwijwire obunyagi n'obubi.

²⁶Mufalisaayo iwe omufu w'amaiso: Banza oyogye ekikopo n'esahaani omu nda, nukwo na haruguru yabyo hasemere.

²⁷“Mulikibona ngobya inywe, abeegesa b'ebiragiro n'Abafalisaayo! Habwokuba musisana nk'ebituuro ebisiigirwe inoni, ebizooka kurungi aheeru, kandi kunu omu nda bijwire amagufa g'abafu n'oburofu bwona.

²⁸Na inywe haruguru muzooka nk'abahikiriire omumaiso g'abantu, baitu omu nda mwijwire obugobya n'obubi.

²⁹“Mulikibona ngobya inywe, abeegesa b'ebiragiro n'Abafalisaayo! Habwokuba mwombekera abarangi ebituuro, musemeza n'ebiijukyo by'abahikiriire,

³⁰nimugamba muti: ‘Kakuba twabaire turoho omu biro by'abaisenkuruitwe, titwakuteraine nabo kuseesa esagama y'abarangi.’

³¹Habweki nimwerumiriza inywenka nkooku muli baijukuru b'abo abaisire abarangi.

³²Na inywe muba nimumaliriza baisenkuru inywe eki baatandikire.

³³Njoka inywe, baana b'encwera, mulitabuka muta omusango ogw'okunagwa omu kiinongoro ky'omurro?

³⁴Nikyo ndukubatumira abarangi, abantu b'amagezi, n'abeegesa b'ebiragiro: abamu mulibo mulibaita nimubabamba ha musaraba, abandi mulibateera enkoba omu masorrokaniro ganyu, kandi abandi mubahiiganize omu mbuga zoona,

³⁵nukwo esagama y'abahikiriire boona eyasesirwe omunsi ebaimukirre: okurugirra ha sagama y'Abberi ayaitiirwe busa, okuhika ha sagama ya Zakaliya mutabani wa Barakiya, ou mwaitiire hagati y'ekiikaro ekirukwera n'itambiro.

³⁶Mazimakwo nimbagambira nti: Binu byona birihikaho abantu ab'obusinge bunu.”

³⁷“Ai bambi Yerusaalemu, Yerusaalemu iwe anyakwita abarangi nooteeza amabaale abakutumirwa! Kaingaha obu naagondeze kusorooza hamu abaana baawe nk'enkoko oku ebumbatira obwana bwayo omu mapapa gaayo, baitu iwe otaikirize!

³⁸Dora, enju yaawe neija kusigara eri kifurukwa.

³⁹Nyowe nimbagambira nti: Timuligaruka kundora okuhika obu mulikagamba muti: ‘W'omugisa ogu arukwija omu ibara lya MUKAMA.’ ”