Read Runyoro - rutooro Mat 24 Bible Online

Mat 24 - Runyoro - rutooro bible

Mat 24

¹Yesu obu akaba naaruga omu Nju ya Ruhanga, nubwo abeegesebwa be baizire kumuragirra enyombeka yayo.

²Uwe yabagarukamu ati: “Ebi byona timurukubirora? Mazima nimbagambira nti: Hanu tihalisigaraho ibaale eriri ha lindi, eritalinagwa hansi.”

³Yesu obu akaba aikaliire ha rusozi rw'emiti Oliva, abeegesebwa be baija nambere ali baamukaguza omu nsita bati: “Tugambire, binu biribaho di, kandi karorwaho ki akalyoleka okwija kwawe n'okuhwaho kw'ensi?”

⁴Yesu yabagarukamu ati: “Mwerinde, hatalibaho muntu weena arukubahabisa.

⁵Habwokuba baingi abaliija omu ibara lyange, nibagamba bati: ‘Ninyowe Kristo’, kandi balihabisa baingi.

⁶Mulihurra obulemu n'engambo zabwo; mwerinde mutalyekanga; habwokuba ebi by'okubaho, baitu empero eriba etakahikire.

⁷Ihanga lirimukirra erindi, n'obukama bulirwanisa obundi, haligwa kiihe kandi halibaho emisisa omu biikaro bingi.

⁸Ebi byona eriba ntandiko y'emihito.

⁹“Nubwo balibahayo okubonabonesibwa n'okwitwa; amahanga goona galibanoba habwange.

¹⁰Abaingi balinaga okwikiriza, bagobezangane, kandi banobangane.

¹¹Haliimuka abarangi baingi ab'ebisuba kandi balihabisa baingi.

¹²Habw'obubi kuhingurana buti, okugonza okwa baingi kulifuka.

¹³Baitu ogu aligumiisiriza kuhika ha mpero, nuwe alijunwa.

¹⁴Kandi Amakuru Amarungi ganu ag'obukama bwa Ruhanga galirangirirwa omunsi yoona, gabe bwakaiso ha mahanga goona; obu nubwo empero erihika.”

¹⁵“Obu mulirora ekintu ekirukunugwa kandi ekirukuhwerekereza[6], ekyagambirweho Daneeri omurangi, kitairwe omu kiikaro ekirukwera (arukusoma binu abyetegereze),

¹⁶abo abaliba bali omu Buyudaaya bairukire ha nsozi;

¹⁷alisangwa hanju eruguru, atalisirimuka kwiha ekintu omunju ye;

¹⁸n'alisangwa ali omu musiri, ataligaruka omu ka kutabarra omwenagiro gwe.

¹⁹Kandi bambi, abaliba baina enda n'abarukwonkya omu biro ebi balikibona!

²⁰Musabe muleke kusingwa omu biro by'obutiti rundi ha Sabbato.

²¹Habwokuba omu biro ebi halibaho omuhito mwingi ogutakabahoga okuruga Ruhanga ahanga ensi n'okuhika hati, kandi ogutaligaruka kubaho.

²²Kakuba ebiro ebi bitarakeehiibweho, tihaakujunirwe muntu n'omu; baitu habw'abakomerwemu be, ebiro ebi Ruhanga akabikeehyaho.

²³Omuntu weena obu alibagambira ati: ‘Dora Kristo ngunu!’ Rundi: ‘Ngugwo!’ Mutalimwikiriza.

²⁴Habwokuba halizooka abarangi ab'ebisuba n'abarukweyeta Kristo, booleke ebihuniriza bingi n'ebyamahano, nukwo bahabise noobu baakubaire abakomerwemu.

²⁵Binu mbibagambiire bitakabaireho.

²⁶Nahabweki obu balibagambira bati: ‘Darawe ali omwirungu,’ mutaligyayo. Rundi: ‘Ngunu ali omu kisiika’, mutaliikiriza.

²⁷Omurabyo nkooku gumulikya niguruga Burugaizooba kuhika Bugwaizooba, n'okwija kw'Omwana w'omuntu nukwo kuliba kuti.

²⁸Nambere hali omutumbi, nuho esega zeesorooleza.”

²⁹“Emihito y'ebiro ebi obu erihwa, ahonaaho izooba lirisiikirizibwa omwirima, n'okwezi tikulijwa, n'enyunyuuzi zirigwa hansi, kandi amaani ag'omwiguru galitengesebwa.

³⁰Nubwo akarorwaho k'Omwana w'omuntu kalizooka omu iguru, kandi enganda zoona ez'omunsi ziriganya. Aho balirora Omwana w'omuntu naizira omu bicu by'omwiguru, aina obusobozi n'ekitiinisa kingi.

³¹Nubwo alituma bamalaika be nibateera engwara ezirukugamba muno, basorooze abakomerwemu be nibabaiha omu mbaju ina, okuruga ha mpero emu y'iguru okuhika hali endi.”

³²“Mwegere ha muti omutini, itaagi lyagwo obu lirokera, likanjurra amababi, mumanya nkooku ekyanda kiri haihi.

³³Na inywe obu mulirora ebi byona, mumanye nkooku ali haihi, ahikiire kimu ha irembo.

³⁴Mazimakwo nimbagambira nti: Ab'obusinge bunu tibalihwaho, ebi byona bitakabaireho.

³⁵Iguru n'ensi birihwaho, baitu ebigambo byange tibirihwaho.”

³⁶“Baitu ekiro eki n'esaaha egi busaho n'omu abimanyire, noobu baakuba bamalaika ab'omu iguru, noobu yakuba Omwana w'omuntu, kwihaho Isenyowe wenka.

³⁷Nkooku kyabaire omu biro bya Noha, n'okwija kw'Omwana w'omuntu nukwo kuliba kuti.

³⁸Omu biro ebyayebembiire okusandaara kw'amaizi, abantu baalyaaga, baanywaga, basweranganaga, okuhika ha kiro Noha eki yataahiireho omu lyato erikooto,

³⁹kandi batakimanye okuhika okusandaara kw'amaizi obu kwaizire kwabahwerekereza boona; n'okwija kw'Omwana w'omuntu nukwo kuliba kuti.

⁴⁰Abasaija babiri obu balisangwa omu musiri: omu alitwarwa, ondi asigale.

⁴¹Abakazi babiri obu baliba nibasa hamu: omu alitwarwa, ondi asigale.

⁴²Nahabweki mwikale nimurora, habwokuba timumanyire kiro MUKAMA eki aliiziramu.

⁴³Baitu kinu mukimanye, kakuba nyineeka yamanyire akasumi omusuma ak'arukwiziramu omu bwire bw'ekiro, yaakwikaire naarora, taakulekere enju ye kucwibwa.

⁴⁴Nahabweki na inywe musemeriire kwikara mweteekaniize; habwokuba Omwana w'omuntu aliija ha saaha ei mutarukumunihirranu.”

⁴⁵“Nooha omuheereza ogu omwesigwa kandi ow'amagezi, mukama we ou yasigiire kurolerra ab'omu ka ye, abahe ebyokulya omu kasumi akahikire?

⁴⁶W'omugisa omuheereza ogu, mukama we obu aligaruka, akamusanga naakora ati!

⁴⁷Mazimakwo nimbagambira nti: Alimukwasa okurolerra ebintu bye byona.

⁴⁸Baitu omuheereza omubi kakuba ateekereza ati: ‘Mukama wange aikaireyo’,

⁴⁹kandi akatandika kuteera abaheereza bataahi be, akeeta ha kulya n'okunywa n'abatamiizi.

⁵⁰Mukama w'omuheereza ogu obu aligaruka ha kiro eki atarukumunihirramu na ha saaha ei atarukumanya,

⁵¹alimufubira, amubarre omuli abo abatarukwesigwa; oku nuho abantu baliririrra kandi banene ensaya.”